MATTHAI 10

Sawltak Sawmlehnihte

(Mk. 3.13-19; Lk. 6.12-16)

1Huai zoh in a nungzui sawm lehnihte a kiang ah a samkhawm a, a kiang uah khaninte tung leh amau hawlkhe ding, damlouhna chiteng leh natna chiteng hihdam ding in a thuneihna a pia hi. 2Huai sawltak sawmlehnihte min hiaite ahi: A masapen in Simon Peter, leh a unau Andru; Zebedai tapa Jakob leh a unau Johan, 3Philip leh Bartholomai; Thomas leh siahkhawn Matthai: Alphai tapa Jakob leh Thaddai; 4Kanan mi Simon leh zuausan a mansakpa Judas Iskariot.

Sawltak Sawmlehnihte Sepdingte

(Mk. 6.7-13; Lk. 9.1-6)

5Hiai sawmlehnihte Jesu’n a sawlkhia a, a kiang uah huchi in thu a pia hi. “Jentelte lam ah paikei unla, Samari mite khua ah leng lut kei un. 6Himahleh Israel inkuan belam mangte kiang ah paizaw un. 7Huan, na pai un, van gam a naita, chi in, thu genzel un. 8Damloute hihdam unla, misite kaithou unla, phakte hihsiangthou unla; dawite hawlkhia un, a thawn in na mu ua, a thawn in pia un. 9Na kawnggak uah dangkaeng hiam, dangka hiam, dal dangka hiam tawi kei un. 10Zinna ading in kawlzal hiam, puanak nih hiam, khedap hiam, chiangkhun hiam tawisam kei un; nasemmi nekding mutak ahi.

11“Huan kholian hi in khoneu hitaleh na lutna peuh uah nou hon tungsaktak mi zongkhia unla, na pawtnawn mateng uh huai inn ah tungden un. 12A inn ua na lutpeuh chiang un, chibai buk un. 13Huai inn a mite chibai buktak a hih uleh na khamuanna uh a tung uah a tung dia; a takkei ua leh na khamuanna uh nou tung ah hong kiknawn ding hi. 14Kuapeuh nou hon kipahpihlou a, na thu uh leng a ngaihkhiak kei uleh, huai inn a kipan leh huai khua a kipan na pawt chiang un, na khepek ua leivui tatkhia un. 15Chihtaktak in k’on hilh ahi, thukhen ni chiang in huai khua sang in Sodom leh Gomorrah gam thuak ding a dan a omzaw ding hi.

Gawtna Hongtung Dingte

(Mk. 13.9-13; Lk. 21.12-17)

16“Ngai dih ua, ngia lak a belam om bang in k’on sawlkhia hi: gul bang a pilvang, vakhu bang a poi khoihlou in om un. 17Himahleh mihing lak ah pilvang un: vaihawmmite a hon mansak ding ua, kikhopnain ah a hon vuak ding ziak un. 18Keimah ziak in gamukte leh kumpipate ma ah amaute leh Jentelte theihsakna ding in a honpi ding uhi. 19Himahleh a hon matsak chiang un, bangchih ding ahia, bang thu ka gen dia? chi in lungkham kei un; na gen ding uh a huntak in a hon theisak ding hi. 20A genpa noumau na hi kei ding ua, na Pa uh Kha in noumau ah a genzaw ding hi.

21Huan hihlup ding in unaupa leh unaupa a kimansak ding ua, pa’n leng a ta a mansak ding; tate’n leng a nu leh a pate uh a dou ding uh, a hihlumsak ding uhi. 22Ka min ziak in mi tengteng huat na hi ding uh; himahleh a tawppha a thuakngap peuhmah hotdam in a om ding hi. 23Huchi in hiai khua a hon gawt chiang un, khaw dang ah taisan un; chihtaktak in k’on hilh ahi, Mihing Tapa hongpai ma in Israel gam a khopite na siksuak kei ding uhi.

24“Nungzui a heutu tung ah a omkei; sikha leng a pu tung ah a omkei hi. 25Nungzui a heutu bang a a hongom leh sikha a pu bang a a hongom tuh a hun e. Inn neipa bawn Beelzibul a chih uleh, a inkuanpihte nak chihna tel un chia!

Kua Hiam Lauh Ding

(Lk. 12.2-7)

26“Huaiziak in amaute kihta kei un; langlou ding a sel bangmah a omkei, theihlouh ding a im bangmah a omkei hi. 27Mial a nou k’on hilh vak ah na gen ding ua; bilbul a na zak uh intung a tuang in tangkoupih un. 28Huan sapum that a kha that theiloute kihta kei unla; Gehenna a kha leh sapum hihmang theipa kihta zaw un. 29Kawlgit nih dal dangka khat in a zuakzel uh hilou hiam? Himahleh a lak ua khat leng na Pa uh theihlouh in lei ah a ke kei ding hi. 30Na samzangte uh nangawn leng simvek ahi. 31Huaiziak in lau kei un; kawlgit tampi sang in na manpha zaw uhi.

Khrist Min Gupna

(Lk. 12.8-9)

32“Huchi in mite ma a hon gum peuhmah, ka Pa van a om ma ah ka gum sam ding hi. 33Himahleh kuapeuh mite ma a hon kitheihmohbawl, ka Pa van a om ma ah ka kitheihmohbawl sam ding hi.

Lemna Hilou, Namsau

(Lk. 12.51-53; 14.26-27)

34“Leitung a lemna lengsak ding a hongpai honsa kei un; lemna lengsak ding hilou in namsau lengsak ding a hongpai ka hi zaw. 35Mi a pa dousak ding in, tanu a nu dousak ding in, mou a nu dousak ding a hongpai ka hi. 36Mi a melma amah inkuanpihte lak a mi mah ahi ding hi.

37Kuapeuh a nu hiam, a pa hiam, kei sang a it zaw tuh ka mi hitak ahi kei; kuapeuh a tanu hiam a tapa hiam kei sang a it zaw leng, ka mi hitak ahi kei. 38Kuapeuh a Kros pua a hon zuilou ka mi hitak ahi kei. 39Kuapeuh a hinna mu in a tan ding a, keimah ziak a a hinna tan in a mu ding hi.

Kipahmante

(Mk. 9.41)

40“Kuapeuh nou hon kipahpih in kei hon kipahpih ahi a, kuapeuh kei hon kipahpih a hon sawlpa kipahpih ahi. 41Zawlnei kua hiam, zawlnei a hih ziak a kipahpih in zawlnei kipahman a mu ding; kuapeuh mi diktat kua hiam mi diktat a hih ziak a kipahpih in mi diktat kipahman a mu ding hi. 42Huan kuapeuh hiai mi neuchikte lak a khat kiang a, nungzui a hih ziak a tuisik nou khat kia pia leng, chihtaktak in k’on hilh ahi, a kipahman a tan kei hial ding” a chi hi.

Currently Selected:

MATTHAI 10: PAITBSI

Highlight

Copy