MATTHAI 7

Midangte Hawmsak Thu A Thuhilhna

(Lk. 6.7-38,41-42)

1“Vai hawmsak kei un, vai hawmsak na hihlouhna ding un. 2Na vai hawmsak mah bang in hawmsak in na om ding uh, na tehna ngeimah un a hon tehsak nawn ding uhi. 3Huan bangdia, nangmah mit a singtum om ngaihtuahlou a, na unau mit a ninneng neuchik mu na hia? 4Bangchi’n na unau kiang ah, Na mit a kipan huai ninneng neuchik hon lakhe sak ve, na chih theih ding? Ngai in, nangmah mit mahmah ah singtum a om nilouh ngal a. 5Milepchiah, na mit a kipan singtum lakhe masa in; huchi in na unau mit a kipan ninneng neuchik lakkhiak ding kichiantak in na mu thei ding hi.

Thil Siangthou Nitsakna

6“Ui kiang ah thil siangthou pekei un; vok ma ah na tuikepsuang uh pai kei un, a chilse kha ding ua, huan kihei in a hon balzak kha ding uhi.

Thum Dia Thuhilhna

(Lk. 11.9-13)

7“Ngen un, piak in na om ding uhi; zong un, na mu ding uh; kiu un, a hon honsak ding uhi; 8Kuapeuh a ngen in a mu a; kuapeuh a zong in a mu a; kuapeuh a kiu honsak in a om ding hi. 9Ahihleh noute kuapeuh na tapa un tanghou ngen leh, kuan suang na pe ding ua? 10Ahihkeileh ngasa ngen leh kuan gul na pe ding ua? 11Huchi hileh nou migilou in bawn, na tate uh thil hoih piak dan na theih un, na Pa uh van a om in a ngente thil hoih pe zawsem louding hia?

Chindan Hoih

12“Huaiziak in, thil bangkim min na tung ua a hih ua na deih bang uh, mi tung ah leng hihsam un; huai Dan leh zawlneite thu ahi him hi.

Kong Kawchik A Lutna

(Lk. 13.24)

13“Kong kawchik ah lut un; manthatna a paina kong a za a, a lam leng a lian a, huai a lut tam leng a tam mahmah uhi. 14Hinna a paina kong a kawchik a a lam a neu hi, a tawnte tawmchik ahi uh.

Sing Leh A Gah

(Lk. 6.43-44)

15“Zawlnei takloute lak ah pilvang un, amaute belam vun silh in na kiang uah a hongpai nak ua, a sunglam uh nge duhgawl pipi ahi uhi. 16Amau a gah uah na thei ding uh. Khaulingnei gui ah grep gah a lou ngei ua hia? 17Lenling ah leng theipi a lou ngei ua hia? Huchi mah bang in sing hoih peuhmah a gah hoih a; sing sia a gah se nak hi. 18Sing hoih a gah se theikei, sing sia gah a hoih theisam kei hi. 19Singchih gah hoihlou a phuk ua mei ah a pai uhi. 20Huaiziak in, amaute a gah uah na theimai ding uhi.

Toupa Theihmite

21“Toupa, Toupa, honchi napeuh van gam ah a lut kei ding uh; ka Pa van a om deihlam hihte a lut ding uhi. 22Huai ni chiang in mi tampi in, Toupa, na min in thute ka gen ua, na min in dawite ka delhkhia ua, na min in thillamdang tampi ka hihzel uh hilou hiam? a chi ding uh. 23Huai hun chiang in, ‘Nou thil gilou hihte aw, k’on thei ngeikei, ka kiang a kipan paimang un, chi in amau ka hilh ding hi.’

Inn Lam Dan Nihte

(Lk. 6.47-49)

24“Huchi in michih hiai ka thuza a, zui peuhmah, mi pil suangpi tung a inn lammi toh ka teh ding hi. 25Vuahpi a hongzu a, tui a hong khang a, huih a hongnung a, huai inn a honmut zialzial hi; himahleh a chimkei; suangpi tung a lepkip a hih ziak in. 26Huan michih, hiai ka thuza a zomlou peuhmah, mihai piaunel tung a inn lammi toh ka teh ding hi. 27Vuah a hongzu a tui a hong khang a, huih a hongnung a, huai inn a honmut zialzial a; a chimta a, huai inn a nakchip ngel hi” a chi hi.

28Huan hichi ahi a, Jesu’n huai thu a gen zoh in, mipi’n a thuhilh lamdang a sa mahmah uhi. 29laigelhmite banglou a, thuneihna neitak a amaute thu a hilh ziak in.

Currently Selected:

MATTHAI 7: PAITBSI

Highlight

Copy