MATTHAÏOS 28

Ka jingmihpat

(Mrk. 16:1-10; Luk. 24:1-12; Ïoan. 20:1-10)

1Hadien ka sngi Sabbaton katba ka step Sngi U Blei ka dang kynjat shai, ka Mari ka nong Magdala, bad kawei pat ka Mari ki la leit ban khmih ïa ka jingtep. 2Kynsan kynsan la don ka jingkhih jumai kaba jur; u angel U Trai u la wan hiar na bneng, u la pyntyllun ïa u maw, bad u la shong halor jong u. 3Ka durkhmat jong u ka la long kum ka leilieh, bad ki jaiñ jong u ki lieh kum ka ïor. 4Ki nongap phira ki la sheptieng katta katta haduh ba ki la kyiuh bad ki la long kum ki briew kiba la ïap.

5U angel u la kren ha ki kynthei. “Phim dei ban sheptieng,” u la ong. “Nga tip phi ïawad ïa U Jisu, uba la shah sahnarphna. 6Um don hangne; la pynmihpat ïa u, kumba u la ong. Ale hangne bad peit ïa ka jaka ha kaba u la thiah. 7Khie leit bran bran mynta, bad ïathuh ha ki synran jong u, ‘La pynmihpat ïa u na ka jingïap, bad mynta u dang leit sha Galilaïa ha shuwa jong phi; hangta phin ïohi ïa u!’ To kynmaw ïa kaei kaba nga la ïathuh ïa phi.”

8Kumta ki la mihnoh ha ka jingkyrkieh na ka jingtep, da ka jingsheptieng bad pynban kiba la pyndap da ka jingkmen, bad ki la mareh ban ïathuh ha ki synran jong u.

9Kynsan U Jisu u la ïakynduh ïa ki bad u la ong, “To ka jingsuk kan long bad phi.” Ki la leit sha u, bad ki la bat ïa ki kjat jong u, bad ki la mane ïa u. 10“Wat sheptieng,” U Jisu u la ong ha ki. “Khie leit bad ïathuh ïa ki para jong nga ban leit sha Galilaïa bad hangta kin ïohi ïa nga.”

Ka jingïathuh ki nongap phira

11Katba ki kynthei ki dang leit ha la ka lynti, katto katne ngut ki shipai kiba ap phira ïa ka jingtep ki la leit phai pat sha ka nongbah bad ki la ïathuh ha ki rangbah lyngdoh ïa baroh kaba la lah jia. 12Ki rangbah lyngdoh ki la ïakynduh ïa ki tymmen ki san bad ki la ïathaw buit; ki la ai shibun ka pisa ïa ki shipai, 13bad ki la ong, “Phi dei ban ong ba ki synran jong u ki la wan mynmiet bad ki la tuh ïa ka met jong u katba phi dang ïohthiah. 14Bad lada u lyngskor un ïohsngew ïa kane, ngin pynngeit ïa u ba phi long ki bymtip ei ei, bad phin ym don ei ei ban khuslai.”

15Ki nongap phira ki la shim ïa ka pisa bad ki la leh ïa kaei kaba la bthah ïa ki ban leh. Bad kumta, kata ka long ka jingïathuh kaba la pynsaphriang kylleng da ki Jiw haduh kane hi ka sngi.

U Jisu u mihpaw ha ki synran jong u

(Mrk. 16:14-18; Luk. 24:36-49; Ïoan. 20:19-23; Ki Kam. 1:6-8)

16 # Mat. 26:32; Mrk. 14:28 Ki khatwei ngut ki synran ki la leit sha u lumrit ha Galilaïa ha kaba U Jisu u la ong ïa ki ban leit. 17Haba ki la ïohi ïa u, ki la mane ïa u, wat la don na ki, kiba la sngew artatien. 18U Jisu u la wan hajan bad u la ong ha ki, “La ai ha nga baroh ka bor ha bneng bad ha khyndew. 19#Ki Kam. 1:8Kumta, khie leit, sha ki briew baroh kylleng bad pynlong ïa ki, ki synran jong nga: To pynbaptis ïa ki ha ka kyrteng jong U Kpa, U Khun, bad U Mynsiem Bakhuid, 20bad hikai ïa ki ban kohnguh ha kiei kiei baroh kiba nga la hukum ïa phi. Bad ngan ïai don ryngkat lem bad phi, haduh kaba kut ka Ïa.”

Currently Selected:

MATTHAÏOS 28: KHACLBSI

Highlight

Copy