MATTHAÏOS 27
27
La ïalam ïa U Jisu sha u Pilat
(Mrk. 15:1; Luk. 23:1-2; Ïoan. 18:28-32)
1Dang step phyrngab, baroh ki rangbah lyngdoh bad ki tymmen ki san ki la pynlong ki jingthmu jong ki pyrshah ïa U Jisu ban pynïap ïa u. 2Ki la teh ïa u ha ki kynjri, ki la ïalam ïa u, bad ki la aiti ïa u ha u Pilat, u lyngskor ka hima Rom.
Ka jingïap u Judas
(Ki Kam. 1:18-19)
3 #
Ki Kam. 1:18,19 Haba u Judas, u nongshetkylla, u la tip ba ïa U Jisu la dep pynrem, u la kylla-kaba-mut bad u la leit rah biang ïa ki laiphew tylli ki sbai rupa sha ki rangbah lyngdoh bad sha ki tymmen ki san. 4“Nga la leh pop da kaba nga shetkylla ïa u briew uba lui lui ban ïap!” u la ong.
“Kan ïadei aïu kata bad ngi?” ki la jubab. “Kata ka dei ka kam jong me!”
5U Judas u la bret ïa ki sbai rupa ha madan hapoh ka Templ bad u la mihnoh; nangta u la leit bad u la sdien phasi ïa lade.
6Ki rangbah lyngdoh ki la khar ïa ki sbai rupa bad ki la ong, “Kane ka dei ka pisa babit snam, bad ka long pyrshah ïa ka Hukum jong ngi ban buh ïa ka hapoh ka jingkynshew ka Templ.” 7Hadien ba ki la poi ha ka jingïamynjur lang shaphang kata, ki la pyndonkam ïa ka pisa ban thied ïa ka Lyngkha u Nongthaw khiew, kum ka jaka tep ïa ki nongwei. 8Dei kata keiñ balei ba la khot “Ka Lyngkha Ka Snam” haduh kane ka sngi.
9 #
Sekh. 11:12,13 Te kaei kaba u Jeremaïah u Nongïathuhlypa u la lah ong, ka la urlong shisha: “Ki la shim ïa ki laiphew tylli ki sbai rupa, ka dor kaba ki paid Israel ki la mynjur ban siew na ka bynta jong u, 10bad ki la pyndonkam ïa ka pisa ban thied ïa ka lyngkha u nongthaw khiew, kumba U Trai u la hukum ïa nga.”
U Pilat u kylli jingkylli ïa U Jisu
(Mrk. 15:2-5; Luk. 23:3-5; Ïoan. 18:33-38)
11U Jisu u la ïeng ha khmat u lyngskor ka hima Rom, uba la kylli jingkylli ïa u. “Hato me long u Syiem ki Jiw?” u la kylli.
“Me ong kumta,” la jubab U Jisu. 12Hynrei um shym ong ei ei ha kaba jubab ïa ki jingmudui jong ki rangbah lyngdoh bad ki tymmen ki san.
13Kumta u Pilat u la ong ïa u, “Mem ïohsngew ïa kine kiei kiei kiba ki mudui ïa me?”
14Hynrei U Jisu u kyntait ban jubab wat tang shikyntien, kaba da pynlyngngoh shikatdei eh ïa u lyngskor.
Ïa U Jisu la rai ban pynïap
(Mrk. 15:6-16; Luk. 23:13-25; Ïoan. 18:39—19:16)
15Ha man ka Jingkhawai Niam Ka Jinglait u lyngskor ka hima Rom u la ju don ka rukom ban pyllait ïa uno uno u koidi ïa uba u paidbah u pan. 16Ha kata ka por la don uwei u koidi uba pawnam uba kyrteng u Jisu Barabbas. 17Kumta haba u paidbah u la ïalumlang, u Pilat u la kylli ïa ki, “Uno na kine phi kwah ïa nga ban pyllait na ka bynta jong phi? Ïa u Jisu Barabbas ne ïa U Jisu uba la khot U Messaïah?” 18U la tip bha ba ki rangbah Jiw kiba ha ka bor ki la aiti ïa U Jisu ha u namar ba ki bishni.
19Katba u Pilat u dang shong ha ka kamra ïingbishar, ka tnga jong u ka la phah khubor sha u: “Wat leh ei ei ïa uta u briew uba lui lui, namar ba ha ka jingphohsniew hynne mynmiet nga la shahshitom shikatdei eh na ka bynta jong u.”
20Ki rangbah lyngdoh bad ki tymmen ki san ki la pynkohnguh ïa u paidbah ban kyrpad ïa u Pilat ban pyllait ïa u Barabbas bad ban pynïap ïa U Jisu. 21Hynrei u Pilat u la kylli ïa u paidbah, “Uno na kine ar ngut ba phi kwah ïa nga ban pyllait na ka bynta jong phi?”
“Ïa u Barabbas!” ki la jubab.
22“Kaei, te, ngan leh ïa U Jisu uba la khot U Messaïah?”
“Sahnarphna ïa u!” Baroh ki la jubab.
23Hynrei u Pilat u la kylli, “Ka kam runar aïu u la leh?”
Nangta ki la sdang ban pyrta da ka sur kaba jam tam: “Sahnarphna ïa u!”
24 #
Deut. 21:6-9
Haba u Pilat u la ïohi ba kam donkam ban pynjlan, hynrei ba kan pynmih pynban ka jingkhynwin, u la shim khyndiat ka um, u la thet ïa la ki kti ha khmat u paidbah, bad u la ong, “Ngam don jingkitkhlieh na ka bynta ka jingïap jong une u briew! Kane ka dei ka jingleh jong phi!”
25U paidbah baroh u la jubab, “Ai ba ka jingkitkhlieh na ka bynta ka jingïap jong u kan hap halor jong ngi bad halor ki khun jong ngi!”
26Nangta u Pilat u la pyllait ïa u Barabbas na ka bynta jong ki; bad hadien kata, u la phah sympat ïa U Jisu, u la aiti ïa u ban sahnarphna.
Ki shipai ki pyrthuh beiñ ïa U Jisu
(Mrk. 15:16-20; Ïoan. 19:2-3)
27Nangta ki shipai jong u Pilat ki la ïalam ïa U Jisu shapoh ka ïing paki dulan u lyngskor, bad ka kynhun baroh kawei ka la ïalumlang sawdong ïa u. 28Ki la sloit ïa ki jaiñ jong u bad ki la buh ka jaiñkup sawbthuh halor jong u. 29Nangta ki la thain pansngiat na ki tnat ba don shiah bad ki la buh ïa ka halor ka khlieh jong u, bad ki la buh ïa u dieng ha ka kti kamon jong u; nangta ki la dem khohsiew ha khmat jong u bad ki la kren ibeiñ ïa u. “Im slem u Syiem ki Jiw!” ki la ong. 30Ki la bynthiew ïa u, bad ki la shim ïa u dieng bad ki la tied ïa U ha ka khlieh. 31Ynda ki la dep pyrthuh beiñ ïa u, ki la weng noh ïa ka jaiñkup bad ki la pynphong biang ïa u da ki jaiñ jong u. Nangta ki la ïalam ïa u shabar ban sahnarphna ïa u.
La sahnarphna ïa U Jisu
(Mrk. 15:21-32; Luk. 23:26-43; Ïoan. 19:17-27)
32Katba ki dang ïamih shabar, ki la ïakynduh ïa u briew na Kyrini uba kyrteng u Simon, bad ki shipai ki la pynbor ïa u ban bah ïa ka diengphna jong U Jisu. 33Ki la poi ha ka jaka ba la khot Golgotha, kaba mut “Ka jaka ka Maloi khlieh.” 34#Salm. 69:21Hangta ki la tyrwa ïa U Jisu ka waiñ ba la khleh bad ka kynja bakthang; hynrei hadien ba u la mad ïa ka, um treh dih.
35 #
Salm. 22:18
Ki la sahnarphna ïa u bad nangta ki la pynbynta ïa ki jaiñ jong u hapdeng jong ki da kaba ïakhalai. 36Hadien kata ki la ïashong hangta, bad ki la ïa-ap ïa u. 37Haneng ka khlieh jong u ki la buh ka jingthoh pynbna ïa ka jingmudui pyrshah ïa u: “Une u long U Jisu, U Syiem ki Jiw.” 38Nangta ki la sahnarphna ruh ïa ki ar ngut ki nonglute lem bad U Jisu, uwei sha ka liang kamon jong u bad uwei pat sha ka liang kadiang jong u.
39 #
Salm. 22:7; 109:25 Ki briew kiba ïaid lynti nangta ki pynkhih ïa la ki khlieh bad ki da ther ki jingkrenbeiñ ïa U Jisu: 40#Mat. 26:61; Ïoan. 2:19“Me u ban sa pynkhyllem ïa ka Templ bad ban tei pat ïa ka ha ki lai sngi! To pynim ïa lade lada me long U Khun U Blei! To hiar noh na ka diengphna!”
41Ha kajuh ka rukom ki rangbah lyngdoh bad ki nonghikai ka Hukum bad ki tymmen ki san ki la rkhiebeiñ ïa u: 42“U la pyllait im ïa kiwei, hynrei um lah ban pynim ïa lade! Hato um dei une u syiem ka Israel? Lada u la hiar noh mynta na ka diengphna, ngin ngeit ha u! 43#Salm. 22:8U shaniah ha U Blei bad u kam ba u long U Khun U Blei. Kumta, te, to ngin peit lada U Blei u kwah ban pynim ïa u mynta!”
44Wat ki nonglute kiba la shah sahnarphna bad u ki la ïakren beiñ ïa u ha kajuh ka rukom.
Ka jingïap U Jisu
(Mrk. 15:33-41; Luk. 23:44-49; Ïoan. 19:28-30)
45Ha ka por shiteng sngi, ïa ka ri baroh kawei la tap da ka jingdum kaba la neh lai kynta. 46#Salm. 22:1Ha ka por lai baje U Jisu u la pyrta da ka jingpyrta bajam, “Eli, Eli, lema Sabakhthani?” kaba mut “U Blei jong nga, U Blei jong nga, balei ba me iehnoh ïa nga?”
47Katto katne ngut na ki briew kiba ïeng hangta ki la ïohsngew ïa u bad ki la ong, “U khot ïa u Elijah!” 48#Salm. 69:21Uwei na ki u la mareh shisyndon, u la shim ïa u spoiñ#27:48 u spoiñ: Kane ka dei ka kyntien ba shu spel Khasi ïa ka kyntien English sponge. Ka jingmut hangne ka thew ïa kano kano ka jait mar kum ka jaiñ ñiad kaba pyndonkam ban kjit um., u la pynngam ïa u hapoh ka waiñ ka bym bha, u buh ïa u ha tduh jong u dieng, bad u la pyrshang ban pyndih ïa u.
49Hynrei kiwei pat ki la ong, “To ap, to ngin peit lada u Elijah un wan bad pyllait im ïa u!”
50U Jisu u la lynñiar biang bad u la ring pynhiar mynsiem khatduh.
51 #
Eks. 26:31-33
Nangta ïa ka pyrda kaba la wah hapoh ka Templ la kad arliang naduh khlieh haduh tbian. Ka khyndew ka la khynñiuh, ki mawsiang ki pra la ka jong ka jong, 52ki jingtep ki la ang, bad ïa shibun ki briew jong U Blei kiba la ïap la pynmihpat. 53Ki la iehnoh ïa ki jingtep bad hadien ba U Jisu u la mihpat na ka jingïap, ki la leit rung sha ka Nongbah Bakhuid, ha kaba shibun ki briew ki la ïohi ïa ki.
54Haba u rangbah shipai bad ki shipai kiba bad u, kiba la ïa-ap ïa U Jisu ki la ïohi ïa u jumai bad ïa kiei kiei baroh kiba la jia, ki la sngewshyrkhei bad ki la ong, “Da shisha u la long U Khun U Blei!”
55 #
Luk. 8:2,3 La don katto katne ngut ki kynthei hangta, kiba la ïakhmih na pajih, kiba la ïabud ïa U Jisu na Galilaïa bad kiba la ïarap ïa u. 56Napdeng jong ki, ki long ka Mari ka nong Magdala, ka Mari ka kmie u Jakob bad u Josis bad ka tnga u Sebedi.
Kaba tep ïa U Jisu
(Mrk. 15:42-47; Luk. 23:50-56; Ïoan. 19:38-42)
57Haba la janmiet, u briew uba riewspah na Arimathaïa u la wan poi; ka kyrteng jong u ka long u Joseph, bad u la long ruh u synran jong U Jisu. 58U la leit sha u Pilat bad u la pan ïa ka met U Jisu. U Pilat u la hukum ban ai ïa ka met ha u Joseph. 59Kumta u Joseph u la shim ïa ka, u la spaiñ da ka jaiñ linen kaba thymmai, 60bad u la buh ïa ka ha ka jingtep jong u hi, ïa kaba u dang phah tih shen na u mawsiang. Nangta u la pyntyllun ïa u maw uba heh na khmat ka jaka rung sha ka jingtep bad u la leit noh. 61Ka Mari ka nong Magdala, bad kawei pat ka Mari, ki la shong hangta marpyrshah ïa ka jingtep.
Ki nongap phira ha ka jingtep
62Ha ka sngi kaba bud, kaba dei ka sngi Sabbaton, ki rangbah lyngdoh bad ki Pharisi ki la ïakynduh ïa U Pilat 63#Mat. 16:21; 17:23; 20:19; Mrk. 8:31; 9:31; 10:33,34; Luk. 9:22; 18:31-33bad ki la ong, “Ko Kynrad, ngi kynmaw ba katba uta u nongshukor u dang im u la ong, ‘Yn sa pynmihpat ïa nga hadien lai sngi.’ 64To ai hukum, te, ba yn da ap phira biang biang ïa ka jingtep jong u tad haduh ka sngi kaba lai, khnang ba ki synran jong u kin ym lah ban leit ban tuh ïa ka met, bad nangta ban ïathuh ha ki briew ba u la mihpat na ka jingïap. Kane ka jinglamler kaba khatduh kan long kaba kham sniew ban ïa kaba nyngkong.”
65“To ïalam ïa ki nongap phira,” u Pilat u la ong ïa ki, “Khie leit bad to pynskhem ïa ka jingtep kat kaba phi lah.”
66Kumta ki la mihnoh bad ki la pynskhem ïa ka jingtep da kaba buh ïa ka muhor halor u maw bad buh ïa ki nongap phira ban ap.
Currently Selected:
MATTHAÏOS 27: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
