MATTHAÏOS 26

Ka jingïasylla pyrshah ïa U Jisu

(Mrk. 14:1-2; Luk. 22:1-2; Ïoan. 11:45-53)

1Haba U Jisu u la dep hikai ïa kine kiei kiei baroh, u la ong ha la ki synran. 2#Eks. 12:1-27“Sa ar sngi, kumba phi tip, kan long ka Jingkhawai Niam Ka Jinglait, bad ïa U Khun U Briew yn sa aiti noh ïa ka ban shah sahnarphna.”

3Nangta ki rangbah lyngdoh bad ki tymmen ki san ki la ïakynduh lang ha ka ïing paki dulan jong u Kaïaphas, u Rangbah Lyngdoh, 4bad ki la ïapynlong ki jingthmu ban kem ïa U Jisu ha kaba rieh bad ban pynïap ïa u. 5“Ngim dei ban leh ïa ka ha ka por ka Jingkhawai Niam,” ki la ong, “ïoh ba u paidbah un khihwin.”

La pynsleh ïa U Jisu ha Bethania

(Mrk. 14:3-9; Ïoan. 12:1-8)

6U Jisu u la don ha Bethania ha ka ïing jong u Simon, u briew uba la pang 'ñiangthohlieh. 7#Luk. 7:37,38Katba U Jisu u dang bam, kawei ka kynthei ka la wan sha u lem bad ka dabi alabastar ba la pyndap da ka jingsleh iwbih baremdor, ïa kaba ka la theh halor ka khlieh jong u. 8Ki synran ki la ïohi ïa kane bad ki la bitar. “Balei ba shu pynsep-ei ïa kane baroh?” ki la kylli. 9“Ïa kane ka jingsleh iwbih lah ban die ha ka dor kaba rem bad ïa ka pisa ban ai ha kiba duk.”

10U Jisu u la tip ïa kaei kaba ki ïakren, kumta u la ong ha ki, “Balei ba phi pynsalia ïa kane ka briew? Ka long kaei kaei kaba biang bad kaba itynnat ba ka la leh na ka bynta jong nga. 11#Deut. 15:11Phin ïai ïoh ïa ki briew kiba duk lem bad phi, hynrei phin ym ïoh ïa nga borabor. 12Kaei kaba ka la leh ka long ban theh ïa kane ka jingsleh iwbih ha ka met jong nga ban pynkhreh ïa nga na ka bynta ban tep. 13Mynta, nga pynthikna ïa phi ba hangno hangno haba yn ïalap ïa kane ka Gospel ha kylleng ka pyrthei, ïa kaei kaba ka la leh yn ïathuh ïa ka ban kynmaw ïa ka.”

U Judas u mynjur ban shetkylla ïa U Jisu

(Mrk. 14:10-11; Luk. 22:3-6)

14Nangta uwei na ki khat-ar ngut ki synran — uta uba kyrteng u Judas Iskariot — u la leit sha ki rangbah lyngdoh, 15#Sekh. 11:12bad u la kylli, “Phin ai aïu ïa nga lada nga shetkylla ïa U Jisu ha phi?” Ki la ñiew laiphew tylli ki sbai rupa bad ki la ai ïa kita ha u. 16Naduh kata u Judas u la khmih ïa ka lad kaba biang ban aiti noh ïa U Jisu ha ki.

U Jisu u bam ïa ka Jingkhawai Niam Ka jinglait bad la ki synran

(Mrk. 14:12-21; Luk. 22:7-13,21-23; Ïoan. 13:21-30)

17Ha ka sngi banyngkong jong ka Jingkhawai Niam U Kpu Bakhlem Thiat, ki synran ki la wan sha U Jisu bad ki la kylli ïa u, “Hangno me kwah ïa ngi ban pynkhreh ïa ka jingbam ka Jingkhawai Niam Ka Jinglait na ka bynta jong me?”

18“To khie leit sha uwei u briew ha ka nongbah,” u la ong ïa ki, “bad ïathuh ha u: ‘U Nonghikai u ong, ka por jong nga ka la poi; ki synran jong nga bad ma nga ngin rakhe ïa ka Jingkhawai Niam Ka Jinglait ha ïing jong me!’ ”

19Ki synran ki la leh kumba U Jisu u la bthah ïa ki bad ki la pynkhreh ïa ka jingbam ka Jingkhawai Niam Ka Jinglait.

20Haba la janmiet, U Jisu bad ki khat-ar ngut ki synran ki la ïashong ban bam. 21Katba ki dang ïabam, U Jisu u la ong, “Nga ong ha phi, uwei na phi un shetkylla ïa nga.”

22Ki synran ki la sngewdiaw shikatdei eh, bad ki la sdang ban kylli ïa u, uwei hadien uwei pat, “Da shisha, A Trai, mem mut ba dei ma nga?”

23 # Salm. 41:9 U Jisu u la jubab, “Uta uba wieh ïa u kpu ha ka pliang lem bad nga, un shetkylla ïa nga. 24U Khun U Briew un ïap kumba ki Jingthoh Bakhuid ki ong ba un shah leh kumta, hynrei katno kaba shyrkhei kan long ïa uta u briew uba shetkylla ïa U Khun U Briew! Kan jin da kham bha ïa uta u briew lada ym shym la kha ïa u!”

25U Judas, u nongshetkylla, u la kren, “Da shisha, ko Nonghikai, mem shym mut ïa nga?” u la kylli.

U Jisu u la jubab, “Me ong kumta.”

Ka Jingkhawai U Trai

(Mrk. 14:22-26; Luk. 22:14-20; 1 Kor. 11:23-25)

26Katba ki dang ïabam, U Jisu u la shim shi lyngkhot u kpu, u la duwai ainguh, u la kdiah ïa u, bad u la ai ïa u ha ki synran jong u. “To shim bad to bam ïa u,” u la ong; “une u long ka met jong nga.”

27Nangta u la shim ïa ka khuri, u la ainguh ïa U Blei, bad u la ai ïa ka ha ki. “To dih ïa ka, phi baroh,” u la ong; 28#Eks. 24:8; Jer. 31:31-34“kane ka long ka snam jong nga, kaba pynskhem ïa ka jutang jong U Blei, ka snam jong nga ïa kaba la theh noh na ka bynta kiba bun ïa ka ban map ïa ki pop. 29Nga ong ha phi, ngan ym dih shuh ïa kane ka waiñ tad haduh ka sngi ba nga dih ïa ka waiñ thymmai bad phi ha ka Hima jong U Kpa jong nga.”

30Nangta ki la ïarwai jingrwai bad ki la leit noh sha u lum ki Olib.

U Jisu u ïathuhlypa ïa ka jinglen u Petros

(Mrk. 14:27-31; Luk. 22:31-34; Ïoan. 13:36-38)

31 # Sekh. 13:7 Nangta U Jisu u la ong ha ki, “Ha kane hi ka miet phi baroh phin ïaphet noh bad iehnoh ïa nga, naba ka Jingthoh Bakhuid ka ong, ‘U Blei un pynïap ïa u nongaplangbrot, bad ïa ki langbrot jong ka kynhun yn pynsakma.’ 32#Mat. 28:16Hynrei hadien ba la pynmihpat ïa nga, ngan leit sha Galilaïa ha shuwa jong phi.”

33U Petros u la kren bad u la ong ha U Jisu, “Ngan ym iehnoh ïa me da lei lei, wat la baroh kiwei pat ki leh kumta!”

34U Jisu u la ong ha u Petros, “Nga ong ha me ba mynta ka miet, ha shuwa ba u syiar un kyn-ih, men ong lai sien ba mem ithuh ïa nga.”

35U Petros u la jubab, “Da lei lei ngan ym ong ïa kata, wat lada nga dei ban ïap lem bad me!”

Bad baroh kiwei pat ki synran ki la ïa-ong ïa kajuh.

U Jisu u duwai ha Gethsemane

(Mrk. 14:32-42; Luk. 22:39-46)

36Nangta U Jisu u la leit bad la ki synran sha ka jaka kaba la khot ka Gethsemane, bad u la ong ha ki, “To shong hangne katba nga dang leit hangtai ban duwai.” 37U la ïalam bad u ïa u Petros bad ïa ki ar ngut ki khun shynrang jong u Sebedi. Ka jingsngewsih bad ka jingpisa lyng-a ka la tyllep ïa u, 38bad u la ong ha ki, “Ka jingsngewsih hapoh ka dohnud jong nga ka long kaba khraw katta kata kat haduh ba ka jan pynlwet ïa nga. To sah hangne bad ïa-ap lem bad nga.”

39U la leit kham jngai sa katto katne, u la dem khrup ïa lade bad ka khmat sha khyndew, bad u la duwai, “Ko Kpa jong nga, lada ka long kaba lah, to shim noh ïa kane ka khuri ka jingshah shitom na nga! Pynban, ym ïa kaei kaba nga mon, hynrei ïa kaei kaba me mon.”

40Nangta u la wan phai pat sha ki lai ngut ki synran bad u la shem ïa ki ba ki ïohthiah; bad u la ong ha u Petros, “Kumno keiñ ma phi lai ngut phim shym lah ban ïa-ap lem bad nga wat tang shi kynta? 41To ïa-ap bad to duwai ba phin ym hap ha ka jingpynshoi. Ka mynsiem ka mon, hynrei ka doh ka tlot.”

42Sa shisien U Jisu u la leit noh bad u la duwai, “Ko Kpa jong nga, lada ïa kane ka khuri ka jingshah shitom ym lah ban shim noh lymda nga dih ïa ka, ïa ka mon jong me yn leh.” 43U wan phai biang sa shisien bad u la shem ba ki synran ki ïohthiah; kim lah ban khyllie ïa ki khmat jong ki.

44Sa shisien pat U Jisu u la iehnoh ïa ki, u la leit noh, bad u la duwai ha ka sien kaba lai, da kaba ong ïa kijuh ki kyntien. 45Nangta u la wan phai pat sha ki synran bad u la ong, “Phi dang ïohthiah bad pynjahthait? Ha khmih! Ka por ka poi ïa U Khun U Briew ba yn aiti noh ha ka bor ki briew kiba pop. 46To ïeng joit, ïa ngin leit noh. Ha khmih, hangne u don u briew uba shetkylla ïa nga!”

Ka jingkem ïa U Jisu

(Mrk. 14:43-50; Luk. 22:47-53; Ïoan. 18:3-12)

47U Jisu u dang kren haba u Judas, uwei na ki khat-ar ngut ki synran, u la wan poi. Ryngkat bad u, la don u paidbah babun uba la kieng atiar da ki waitlam bad ki dieng tangon, ïa kiba la phah da ki rangbah lyngdoh bad ki tymmen ki san. 48U nongshetkylla u la lah ai dak ïa u paidbah: “U briew uba ngan doh u long uta uba phi kwah. To kem ïa u!”

49U Judas u la leit beit sha U Jisu bad u la ong, “To ka jingsuk kan long bad me, ko Nonghikai,” bad u la doh ïa u.

50U Jisu u la jubab, “To pynkloi shaphang jong ka, ko paralok!”

Nangta ki la ïawan kiew, ki la kem ïa U Jisu, bad ki la batskhem ïa u. 51Uwei na kito kiba la ïadon lang bad U Jisu, u la sei ïa la ka waitlam bad u la shoh ïa u mraw jong u Rangbah Lyngdoh, da kaba mait noh ïa ka shkor jong u. 52“Thep noh ïa la ka waitlam ha ka jaka jong ka,” U Jisu u la ong ha u. “Baroh kiba shim ïa ka waitlam kin ïap da ka waitlam. 53Hato phim tip ba nga lah ban kyrpad jingïarap na U Kpa jong nga, bad shisyndon un da la phah palat khat-ar kynhun ki angel? 54Hynrei lada ka long kumta, da kumno ki Jingthoh Bakhuid kiba ong ba kane ka long kaei kaba dei ban jia, kin jia long shisha?”

55 # Luk. 19:47; 21:37 Nangta U Jisu u la kren ha u paidbah, “Hato phi donkam ban wan bad ki waitlam bad ki dieng tangon ban kem ïa nga, la kumba nga dei u riewsniew? Man la ka sngi nga la shong bad hikai hapoh ka Templ, bad phim shym la kem ïa nga. 56Hynrei kane baroh ka la lah jia khnang ban pynlong ïa kaei kaba ki nongïathuhlypa ki la thoh ha ki Jingthoh Bakhuid ban jia shisha.”

Nangta baroh ki synran ki la iehnoh ïa u bad ki la ïaphet noh.

U Jisu ha khmat ka dorbar

(Mrk. 14:53-65; Luk. 22:54-55,63-71; Ïoan. 18:13-14,19-24)

57Kito kiba la kem ïa U Jisu ki la ïalam ïa u sha ka ïing jong u Kaïaphas, u Rangbah Lyngdoh ha kaba ki nonghikai ka Hukum bad ki tymmen ki san ki la ïalumlang. 58U Petros u la bud na jngai, haduh ka phyllaw jong ka ïing u Rangbah Lyngdoh. U la leit shapoh ka phyllaw bad u la shong lem bad ki nongap byndi ban khmih kumno kan jia baroh. 59Ki rangbah lyngdoh bad ka Dorbar baroh kawei ki la pyrshang ban lap ki sabut lamler pyrshah ïa U Jisu ban pynïap ïa u; 60hynrei kim lah ban shem ei ei, wat la shisha bun ki briew ki la wan sha khmat bad kren ki jinglamler shaphang jong u. 61#Ïoan. 2:19Khatduh ar ngut ki rangbah ki la wan bad ki la ong, “Une u briew u la ong, ‘Nga lah ban pynjot ïa ka Templ jong U Blei bad ha ki lai sngi ngan tei pat ïa ka.’ ”

62U Rangbah Lyngdoh u la ïeng bad u la ong ha U Jisu, “Mem don jubab ban ai ïa kane ka jingmudui pyrshah ïa me?” 63Hynrei U Jisu u shu sngap. Sa shisien pat u Rangbah Lyngdoh u la kren ha u, “Ha ka kyrteng jong U Blei uba im, mynta nga buh ïa me ha ka jingsmai: Ïathuh ïa ngi lada me dei u Messaïah, U Khun U Blei.”

64 # Dan. 7:13 U Jisu u la jubab ïa u, “Me ong kumta. Hynrei nga ong ïa phi baroh: Naduh kane ka por phin ïohi ïa U Khun U Briew ba u da shong ha ka liang kamon jong U Bakhrawbor tam bad u da wan ha ki lyoh bneng!”

65 # Leb. 24:16 Ha kane, u Rangbah Lyngdoh u la tar ïa la ki jaiñ bad u la ong, “Ka jingkrenbeiñ blei! Ngim donkam shuh bun ki sakhi! Phi la dang shu ïohsngew ïa ka jingkrenbeiñ blei jong u! 66Kaei phi ïa-pyrkhat?”

Ki la jubab, “U long uba shah pynrem bad u dei ban ïap.”

67 # Isa. 50:6 Nangta ki la bynthiew ha ka khmat jong u bad ki la shoh ïa u; bad kito kiba la thab ïa u 68ki la ong, “To ïathuh lypa na ka bynta jong ngi, ko Messaïah! To antad mano ba shoh ïa me?”

U Petros u len ïa U Jisu

(Mrk. 14:66-72; Luk. 22:56-62; Ïoan. 18:15-18,25-27)

69U Petros u dang shong habar ha ka phyllaw mynba kawei na ki shakri kynthei jong u Rangbah Lyngdoh ka la wan sha u bad ka la ong, “Ma me ruh, me long bad U Jisu u nong Galilaïa.”

70Hynrei u la len ïa kata ha khmat jong ki baroh. “Ngam tip ïa kaei kaba pha kren,” u la jubab, 71bad u la leit noh sha ka jaka rung shapoh ka phyllaw. Kawei pat ka shakri ka la ïohi ïa u bad ka la ong ha ki rangbah hangta, “U la long lem bad U Jisu u nong Nasareth.”

72Sa shisien u Petros u la len ïa kata bad u la jubab, “Nga smai ba ngam ithuh ïa uta u briew!”

73Hadien katto katne por, katba ki rangbah kiba ïeng hangta ki la ïawan sha u Petros. “Da shisha me long uwei na ki,” ki la ong. “Nalor baroh, ka rukom kren jong me ka pynpaw ïa kata!”

74Nangta u Petros u la ong, “Nga smai ba nga ïathuh ïa ka jingshisha! Ai ba U Blei un pynshitom ïa nga lada ngam long kumta! Ngam ithuh ïa uta u briew!”

Kumta hi u syiar u la kyn-ih, 75bad u Petros u la kynmaw ïa kaei kaba U Jisu u la lah ïathuh ha u: “Shuwa ba u syiar un kyn-ih, men ong lai sien ba mem ithuh ïa nga.” U la mihnoh bad u la ïamkthang.

Currently Selected:

MATTHAÏOS 26: KHACLBSI

Highlight

Copy