MATTHAÏOS 18

Uei uba khraw tam?

(Mrk. 9:33-37; Luk. 9:46-48)

1 # Luk. 22:24 Ha kata ka por ki synran ki la wan sha U Jisu, da kaba kylli, “Uei uba khraw tam ha ka Hima ki bneng?”

2Kumta U Jisu u la khot ïa u khynnah, u la pynïeng ïa u ha khmat jong ki, 3#Mrk. 10:15; Luk. 18:17bad u la ong, “Nga pynthikna ïa phi ba lymda phi kylla bad long kum ki khynnah, phin ym ïohrung da lei lei shapoh ka Hima ki bneng. 4Uba khraw tam hapoh ka Hima ki bneng u long uta uba pynrit ïa lade bad uba long kum une u khynnah. 5Bad uno uno uba pdiang sngewbha ha ka kyrteng jong nga ïa uwei uba kum une u khynnah, u pdiang ïa nga.

Ki jingpynshoi ban leh pop

(Mrk. 9:42-48; Luk. 17:1-2)

6“Uno uno u ban pynlong ïa uwei na kine kiba rit ban duh noh ka jingngeit ha nga, ka kham bha ïa uba kum uta u briew ban pynteh da u mawtylliat uba heh ha ka ryndang jong u bad ban pynngam jyllop hapoh ka duriaw bajylliew. 7A katno kaba shyrkhei kan long ïa ka pyrthei ha kaba don kiei kiei kiba pynlong ïa ki briew ban duh noh ïa ka jingngeit jong ki! Kiba kum kine kiei kiei kin ïai jia — hynrei katno kaba shyrkhei ïa uta u briew uba pynjia ïa ki!

8 # Mat. 5:30 “Lada ka kti lane ka kjat jong phi ka pynlong ïa phi ban duh noh ïa ka jingngeit jong phi, to ot noh bad bret noh ïa ka! Ka kham bha ïa phi ban rung sha ka jingim khlem ka kti lane ka kjat ban ïa kaba don baroh ar tylli ki kti bad ki kjat bad ban shah bret shapoh ka ding bymjukut. 9#Mat. 5:29Bad lada ka khmat jong phi ka pynlong ïa phi ban duh noh ïa ka jingngeit jong phi, to khlong bad to bret noh ïa ka! Ka kham bha ïa phi ban rung sha ka jingim tang da kawei ka khmat ban ïa kaba don baroh ar tylli ki khmat bad ban shah bret shapoh ka dujok ding.

Ka pharshi ka langbrot ba la jah

(Luk. 15:3-7)

10 # Luk. 19:10 “To sumar ba phin ym ibeiñ ïano ïano na kine kiba rit. Ki angel jong ki ha bneng, nga ong ha phi, ki ïai don ha ka jingdon ryngkat jong U Kpa jong nga uba ha bneng.

11“Namar U Khun U Briew u la wan ban pynim ïa ki briew kiba la jah noh.

12“Phi pyrkhat kumno un leh u briew uba don shispah tylli ki langbrot bad kawei na ki ka jah noh? Un iehnoh ïa kiwei pat ki khyndaiphew khyndai tylli ban bam phlang ha ki sharing lum bad leit bad wad ïa ka langbrot ba la jah. 13Haba u shem ïa ka, nga ong ha phi, u kham kmen ïa kane kawei ka langbrot ban ïa ki khyndaiphew khyndai tylli ki bym shym la jah. 14Ha kajuh ka rukom U Kpa jong phi uba ha bneng um kwah ba iwei ruh na kine kiba rit in jah noh.

U para uba leh pop

15 # Luk. 17:3 “Lada u para jong me u leh pop pyrshah ïa me, khie leit sha u bad pyn-i ha u ïa ka jingbakla jong u. Hynrei leh ïa ka ha kaba jar jar, kumba tang hapdeng para ma phi. Lada u shahshkor ïa me, me la ïoh pat ïa la u para. 16#Deut. 19:15Hynrei lada um sngap ïa me, ïalam uwei ne ar ngut kiwei pat ki briew lem bad me, khnang ba ‘kawei pa kawei ka jingkynnoh lah ban kyrshan da ka jingsakhi jong ki ar lane lai ngut ki sakhi.’ 17Bad lada um shahshkor ïa ki, te to ïathuh ïa kaei kaei baroh ha ka balang. Khatduh, lada um shahshkor ïa ka balang, to ñiew ïa u kumba u long u nongmane blei thala lane u nonglum khajna.

Kaba khang bad kaba shah

18 # Mat. 16:19; Ïoan. 20:23 “Bad kumta nga ong ha phi baroh: ïa kaei kaba phi khang ha ka pyrthei yn khang ha bneng, bad ïa kaei kaba phi shah ha ka pyrthei yn shah ha bneng.

19“Bad nga ong shuh shuh ha phi: Ha man ba ar ngut na phi, phi ïamynjur shaphang kaei kaei kaba phi ïa-pan, yn ai ïa kata ha phi da U Kpa jong nga uba ha bneng. 20Namar haba ar lane lai ngut ki ïawanlang ha ka kyrteng jong nga, nga don hangta lem bad ki.”

Ka pharshi u shakri u bym map

21 # Luk. 17:3,4 Nangta u Petros u la wan sha U Jisu bad u la kylli, “Ko Trai, lada u hynmen u para jong nga u ïai leh pop pyrshah ïa nga, haduh katno sien nga dei ban map ïa u? Haduh hynñiew sien?”

22 # Jen. 4:24 “Em, ym tang hynñiew sien,” la jubab U Jisu, “hynrei haduh hynñiewphew sien hynñiew, 23namar ka Hima ki bneng ka long kumne. Shisien la don u Syiem uba la kut jingmut ban jurip ïa ki jingkheiñ jingdiah jong u shakri jong u. 24U la dang shu sdang ban leh kumta haba la wallam ïa uwei uba la kit ram bun tyngka. 25U shakri um shym don shibun ban siew ïa ka ram jong u, kumta u syiem u la hukum ba ïa uta dei ban die mraw noh, ïa ka tnga bad ki khun jong u bad baroh kiba u la don khnang ban siew ïa ka ram. 26U shakri u la dem khrup ha ki khohsiew ha khmat u Syiem. ‘To ïaishah bad nga,’ u la kyrpad, ‘bad ngan siew ïa phi ïa kaei kaei baroh!’ 27U Syiem u la sngewsynei ïa u, kumta u la map ïa ka ram jong u bad u la pyllait noh ïa u.

28“Nangta uta u briew u la mihnoh bad u la ïakynduh ïa uwei na ki para shakri jong u uba la shahram ïa u katto katne tyngka. U la bat trait bad u la ksih ïa u. ‘Siew noh ïa ka ram jong nga!’ u la ong. 29U para shakri jong u, u la dem khrup bad u la kyrpad ïa u, ‘to ïaishah bad nga, bad ngan siew pat ïa phi!’ 30Hynrei u kyntait; pynban, u la phah thep byndi ïa u tad haduh ba u dei ban siew ïa ka ram. 31Haba kiwei pat ki shakri ki la ïohi ïa kaei kaba lah jia, ki la sngewsih shikatdei eh, bad ki la leit sha u Syiem bad ïathuh ha u ïa kaei kaei baroh. 32Kumta u la phah khot shapoh ïa uta u shakri. ‘Me u shakri bymmyntoi!’ u la ong. ‘Nga la map ïa ka ram jong me baroh kaba me shah na nga, namar ba me la kyrpad ïa nga kumta. 33Me la dei ban don jingisynei ïa la u para shakri, kumba nga la isynei ïa me.’ 34U Syiem u la bitar lep, bad u la phah ïa uta u shakri sha byndi ba yn pynshitom ïa u tad haduh ba un da siew pat ïa ka ram baroh.”

35Bad U Jisu u la pynkut, “Kata ka long kumno ba U Kpa jong nga uba ha bneng un leh ïa uwei pa uwei na phi lymda phi ïamap ïa la u hynmen u para naduh ka dohnud.”

Currently Selected:

MATTHAÏOS 18: KHACLBSI

Highlight

Copy