MATTHAÏOS 17

Ka jingkylla dur

(Mrk. 9:2-13; Luk. 9:28-36)

1Hadien hynriew sngi U Jisu u la ïalam bad u ïa u Petros bad ïa ki ar ngut shi para, u Jakob bad u Ïoannis bad u la ïalam ïa ki sha u lumbah uba jrong ha kaba ki la ïadon tang ma ki hi. 2Katba ki dang ïakhmih, ka jingkylla dur ka la wan ha U Jisu: Ka durkhmat jong u ka da tyngshaiñ kum ka sngi, bad ki jaiñ jong u ki la lieh phyrnai eh. 3Nangta ki lai ngut ki synran ki la ïohi ïa u Moses bad u Elijah ba ki ïakren bad U Jisu. 4Kumta u Petros u la kren bad u la ong ha U Jisu, “Ko Trai, katno ka long kaba bha ba ngi ïadon hangne! Lada me mon, ngan shna lai tylli ki ïingjaiñ hangne, kawei na ka bynta jong me, kawei na ka bynta u Moses, bad kawei na ka bynta u Elijah.”

5 # Jen. 22:2; Salm. 2:7; Isa. 42:1; Mat. 3:17; 12:18; Mrk. 1:11; Luk. 3:22; Deut. 18:15 # 2 Pet. 1:17,18 Katba u dang kren, u lyoh uba tyngshaiñ u la wan halor jong ki, bad ka sur na u lyoh ka la ong, “Une u long U Khun uba ieit jong nga, ha uba nga sngewbha eh — to shahshkor ïa u!”

6Haba ki synran ki la ïohsngew ïa ka sur, ki la sheptieng haduh katta katta ba ki la dem khrup la ki durkhmat sha khyndew. 7U Jisu u la wan sha ki bad u la ktah ïa ki. “To ïeng joit,” u la ong. “To wat sheptieng!” 8Te haba ki la khmied bad kim shym la ïohi ïano ïano ruh hangta hynrei tang ïa U Jisu.

9Katba ki dang wan hiar na u lumbah, U Jisu u la hukum ïa ki, “Wat ïathuh hano hano ruh ïa kane ka jingïohipaw kaba phi la ïohi tad haduh ba ïa U Khun U Briew la pynmihpat na ka jingïap.”

10 # Mal. 4:5 Nangta ki synran ki la kylli ïa U Jisu, “Balei ba ki nonghikai Aiñ ki ong ba u Elijah u la dei ban wan shuwa?”

11“U Elijah shisha u wan shuwa,” la jubab U Jisu, “bad un pynkhreh ïa kiei kiei baroh. 12#Mat. 11:14Hynrei nga ong ha phi ba u Elijah u lah da wan bad ki briew kim shym la ithuh ïa u, hynrei ki la leh ïa u katba ki sngewbit. Ha kajuh ka rukom kin lehbeiñ ruh ïa U Khun U Briew.”

13Nangta ki synran ki la shemphang ba u la kren ha ki shaphang u Ïoannis u Nongpynbaptis.

U Jisu u pynkhiah ïa u khynnah uba shongksuid

(Mrk. 9:14-29; Luk. 9:37-43)

14Haba ki la wan phai pat sha u paidbah, uwei u briew u la wan sha U Jisu, u la dem khohsiew ha khmat jong u, 15bad u la ong, “Ko Kynrad, to isynei ïa u khun jong nga! U long uba pang ring bad u la don ka jingkhie ring kaba shyrkhei eh ba bunsien u hap ha ka ding lane ha ka um. 16Nga la wallam ïa u ha ki synran jong me, hynrei kim lah ban pynkhiah ïa u.”

17U Jisu u la jubab, “A katno ki bymngeit bad kiba bakla phi ki briew phi long! Sa katno nga dei ban dang don bad phi? Sa katno ngan dang ïaishah ïa phi? To wallam ïa u khynnah shane sha nga!” 18U Jisu u la hukum ïa u ksuid, bad u la mihnoh shabar jong u khynnah, bad ha kata ka khyllipmat la pynkhiah ïa u.

19Nangta ki synran ki la wan sha U Jisu ha kaba jar jar bad ki la kylli ïa u, “Balei ba ngim lah ban beh noh ïa u ksuid shabar?”

20 # Mat. 21:21; Mrk. 11:23; 1 Kor. 13:2 “Ka la long namar phim don ka jingngeit kaba biang,” la jubab U Jisu. “Nga pynthikna ïa phi ba lada phi don ka jingngeit kaba heh kat u symbai tyrso, phi lah ban ong ïa une u lumrit, ‘Khie leit noh nangne shatai!’ bad un leit. Phi lah ban leh ïa kano kano!” 21Hynrei tang ka jingduwai bad ka jingshah jingit kaba lah ban beh noh shabar ïa une u jait; ym don kano kano kawei pat kaba lah.

U Jisu u kren biang shaphang ka jingïap jong u

(Mrk. 9:30-32; Luk. 9:43-45)

22Haba ki synran baroh ki la ïawanlang ha Galilaïa, U Jisu u la ong ha ki, “U Khun U Briew u la jan ba un shah aiti ha ki briew, 23ki ban pynïap ïa u, hynrei hadien lai sngi yn sa pynmihpat ïa u.”

Ki synran ki la sngewsih eh.

Ka jingsiew ïa ka khajna Templ

24 # Eks. 30:13; 38:26 Haba U Jisu bad la ki synran ki la wan sha Kapernam, ki nonglum ïa ka khajna Templ ki la wan ha u Petros bad ki la kylli, “Hato u Nonghikai jong phi u siew ïa ka khajna Templ?”

25“Ho-oid shisha,” u Petros u la jubab.

Haba u Petros u la rung shapoh ïing, U Jisu u la kren nyngkong, “Ko Simon, kaei ka jingpyrkhat jong me? Mano ba siew ïa ki bai khrong lane ki khajna sha ki syiem jong kane ka pyrthei? Ki traishnong jong ka ri ne ki nongwei?”

26“Ki nongwei,” la jubab u Petros.

“Kumta, te,” la jubab U Jisu, “kata ka mut ba ki traishnong kim donkam ban siew. 27Hynrei ngim kwah ban pynmong ïa kine ki briew. Kumta khie leit sha ka pung bad bret ïa u khwai. Shim ïa ka dohkha ba la ngat nyngkong, bad hapoh ka shyntur jong ka men shem ïa ka pisa kaba shongdor biang na ka bynta ka khajna Templ ïa nga bad ïa me. To shim ïa ka bad siew ïa ki khajna jong ngi.”

Currently Selected:

MATTHAÏOS 17: KHACLBSI

Highlight

Copy