MATTHAÏOS 16

Ka jingdawa ïa ka kambah

(Mrk. 8:11-13; Luk. 12:54-56)

1 # Mat. 12:38; Luk. 11:16 Katto katne ngut ki Pharisi bad ki Saddusi kiba la wan sha U Jisu ki la kwah ban riam ïa u, kumta ki la kyrpad ïa u ban leh ïa ka kambah na ka bynta jong ki, ban pyn-i ba U Blei u la pdiang ïa u. 2Hynrei U Jisu u la jubab, “Haba ka sngi ka sep, phi ong, ‘Ngin sa ïoh ïa ka suiñbneng kaba bha, namar ka sahit bneng ka saw.’ 3Bad dang step phyrngab phi ong, ‘Kan sa slap, namar ba ka suiñbneng ka saw bad ka dum.’ Phi lah ban ïathuh lypa ïa ka jinglong ka suiñbneng da kaba khmih ïa ka sahit bneng, hynrei phim lah ban batai ïa ki dak kiba ïadei bad kine ki por! 4#Mat. 12:39; Luk. 11:29Katno kiba sniew bad ki bym don blei ki long ki briew jong kane ka juk! Phi kyrpad na nga ïa ka kambah? Em! Ka kambah kaba yn ai ha phi ka long tang ka kambah jong u Jonah.”

Kumta u la iehnoh ïa ki bad u la leit noh.

U thiat ki Pharisi bad ki Saddusi

(Mrk. 8:14-21)

5Haba ki synran ki la jam sha shiliang jong ka duriaw, ki la klet ban rah jingbam. 6#Luk. 12:1U Jisu u la ong ha ki, “To sumar; to phikir ïa lade pyrshah ïa u thiat ki Pharisi bad ki Saddusi.”

7Ki la sdang ban ïakren para ma ki hi, “U ong ïa kane namar ngim shym la wanrah jingbam ei ei.”

8U Jisu u la tip ïa kaei kaba ki la ïakren, kumta u la kylli ïa ki, “Balei ba phi ïakren para ma phi shaphang ka jingbymdon jingbam ei ei? Katno kaba rit ka jingngeit phi don! 9#Mat. 14:17-21Hato phim pat shemphang? Phim kynmaw mynba nga la kdiah ïa ki san tylli ki kpu na ka bynta ki san hajar ngut ki rangbah? Katno shang phi la ïa-pyndap? 10#Mat. 15:34-38Bad kumno shaphang ki hynñiew tylli ki kpu na ka bynta ki saw hajar ngut ki rangbah? Katno shang phi la ïa-pyndap? 11Kumno te ba phim shemphang ba ngam shym kren ha phi shaphang u kpu? To sumar ïa lade na u thiat ki Pharisi bad ki Saddusi!”

12Nangta ki synran ki la shemphang ba um shym la maham ïa ki ban sumar ïa lade na u thiat uba pyndonkam ha u kpu, hynrei na ka jinghikai ki Pharisi bad ki Saddusi.

Ka jingpynbna u Petros shaphang U Jisu

(Mrk. 8:27-30; Luk. 9:18-21)

13U Jisu u la leit sha ka thain hajan ka shnong Kaisaria Philippi, ha kaba u la kylli ïa la ki synran, “Ki briew ki ong ba U Khun U Briew u long uei?”

14 # Mat. 14:1,2; Mrk. 6:14,15; Luk. 9:7,8 “Katto katne ki ong u Ïoannis u Nongpynbaptis,” ki la jubab. “Kiwei pat ki ong u Elijah, katba kiwei pat ki ong u Jeremaïah lane uwei pat u nongïathuhlypa.”

15“Kumno ma phi pat?” U la kylli ïa ki. “Phi ong nga long uei?”

16 # Ïoan. 6:68,69 U Simon Petros u la jubab, “Me long U Messaïah, U Khun jong U Blei uba im.”

17“Kaba bha ïa me, ko Simon u khun jong u Jonah!” la jubab U Jisu. “Naba kane ka jingshisha kam shym la wan ha me na uno uno u briew, hynrei la ai ïa ka ha me beit beit da U Kpa jong nga uba ha bneng. 18Bad kumta nga ong ha me, ko Petros: me long u mawsiang, bad halor kane ka nongrim mawsiang ngan tei ïa ka balang jong nga, bad wat ka jingïap hi kan ym lah ban jop ïa ka. 19#Mat. 18:18; Ïoan. 20:23Ngan ai ha me ïa ki shabi jong ka Hima ki bneng, kaei kaba me khang ha ka pyrthei yn khang ïa ka ha bneng, bad kaei kaba me shah ha ka pyrthei yn shah ïa ka ha bneng.”

20Nangta U Jisu u la hukum ïa ki synran jong u ban ym ïathuh hano hano ba u long U Messaïah.

U Jisu u kren shaphang ka jingshah shitom bad ka jingïap jong u

(Mrk. 8:31—9:1; Luk. 9:22-27)

21Naduh kata ka por U Jisu u la sdang ban kren shai ha la ki synran, “Nga dei ban leit sha Jerusalem bad shahshitom shibun na ki tymmen ki san, ki rangbah lyngdoh bad ki nonghikai ka Hukum. Ïa nga yn pynïap, hynrei hadien lai sngi yn sa pynmihpat ïa nga.”

22U Petros u la shim kyrpang ïa U sharud bad u la sdang ban mai ïa u, “U Blei un ym shah ïa kata, ko Trai!” u la ong. “Kata kan ym jia da lei lei ha me!”

23U Jisu u la phai bad u la ong ha u Petros, “Khie noh na nga, ko Soitan! Me long u maw jynthut ha ka lynti jong nga, namar kine ki jingpyrkhat jong me kim shym wan na U Blei, hynrei na u briew.”

24 # Mat. 10:38; Luk. 14:27 Nangta U Jisu u la ong ha la ki synran, “Lada uno uno u kwah ban wan bad nga, u dei ban klet ïa lade, ban bah ïa la ka diengphna, bad bud ïa nga. 25#Mat. 10:39; Luk. 17:33; Ïoan. 12:25Naba uno uno uba kwah ban pyllait la ka jong ka jingim un duh noh ïa ka; hynrei uno uno uba duh noh ïa la ka jingim na ka bynta jong nga un shem ïa ka. 26Hato u briew u ïohnong ei ei lada u jop ïa ka pyrthei baroh kawei hynrei u duh noh ïa la ka jingim? Em ym kumta! Kam don kano kano kaba u lah ban ai ban ïoh pat ïa la ka jingim. 27#Mat. 25:31; Salm. 62:12; Rom. 2:6Naba U Khun U Briew u la jan wan ha ka burom jong U Kpa jong u lem bad la ki angel, bad nangta un ainong ïa uwei pa uwei kat kum ki kam jong u. 28Nga pynthikna ïa phi ba don katto katne hangne ki ban ym ïap tad haduh ba kin da ïohi ba U Khun U Briew u wan kum u Syiem.”

Currently Selected:

MATTHAÏOS 16: KHACLBSI

Highlight

Copy