MATTHAÏOS 15
15
Ka jinghikai jong ki kpa tymmen
(Mrk. 7:1-13)
1Nangta katto katne ki Pharisi bad ki nonghikai ka Hukum ki la wan sha U Jisu na Jerusalem bad ki la kylli ïa u, 2“Balei ba ki synran jong me kim kohnguh ïa ka jinghikai ba la ai pateng da ki kpa tymmen jong ngi? Kim ju thet ïa la ki kti ha ka rukom kaba dei ha shuwa ba kin bam!”
3U Jisu u la jubab, “Bad balei ba phim kohnguh ïa ka hukum jong U Blei bad phi bud ïa la ka jong ka jinghikai? 4#Eks. 20:12; Deut. 5:16; Eks. 21:17; Leb. 20:9Namar U Blei u la ong, ‘To burom ïa la u kpa bad ïa la ka kmie,’ bad ‘Uno uno uba tim ïa la u kpa lane ïa la ka kmie u dei ban shah pynïap.’ 5Hynrei phi hikai ba lada u briew u don kaei kaei kaba u lah ban pyndonkam ban ïarap ïa la u kpa lane ïa la ka kmie, hynrei u ong, ‘Kane ka long ka jong U Blei,’ um donkam ban burom ïa la u kpa. 6Ha kane ka rukom phi ñiewbeiñ ïa ka hukum jong U Blei, khnang ban bud ïa la ka jong ka jinghikai. 7Phi kiba arsap! A katno ka long kaba dei haba u Isaïah u la ïathuhlypa shaphang jong phi!
8 #
Isa. 29:13
“ ‘Kine briew, ong U Blei, ki pyndonburom ïa nga da ki kyntien jong ki,
hynrei ka dohnud jong ki,
da shisha ka long jngai eh na nga.
9Kam myntoi ïa ki ban mane ïa nga,
namar ba ki hikai ïa ki rukom ki briew kumba ki dei ki hukum jong nga!’ ”
Kiei kiei kiba pynlong bymkhuid ïa u briew
(Mrk. 7:14-23)
10Nangta U Jisu u la khot ïa ki paidbah sha u bad u la ong ha ki, “To shahshkor bad to shemphang! 11Kam dei kata kaba rung shapoh ka shyntur jong u briew kaba pynlong ïa u, u bymkhuid kat kum ka lehniam; pynban, dei kaba mih shabar na ka, kaba pynlong ïa u, u bymkhuid.”
12Nangta ki synran ki la wan sha u bad ki la ong, “Hato me tip ba la pynmong ïa ki jingsngew jong ki Pharisi da kaei kaba me la ong?”
13“Ïa u jingthung baroh ïa uba U Kpa jong nga uba ha bneng um shym la thung, yn rat noh,” la jubab U Jisu. 14#Luk. 6:39“Wat khuslai shaphang jong ki! Ki long ki nongïalam bamatlah jong kiba matlah; bad haba uwei u briew uba matlah u ïalam ïa uwei pat, baroh ar ngut ki hap sha ka kharai.”
15U Petros u la kren, “To batai ïa kane ka jingong ha ngi.”
16U Jisu u la ong ha ki, “Phim long shuh kiba kham nep jingmut ban ïa kiwei pat. 17Hato phim shemphang? Kano kano kaba rung shapoh ka shyntur jong u briew ka leit shapoh ka kpoh jong u bad nangta pat shabar na ka met jong u. 18#Mat. 12:34Hynrei kiei kiei kiba mihnoh shabar na ka shyntur ki wan na ka dohnud, bad kine ki long kiei kiei kiba pynlong bymkhuid ïa u briew kat kum ka jinglehniam. 19Namar na ka dohnud jong u ki mih ki jingpyrkhat basniew kiba ïalam ïa u ban pynïap briew, ban klim, bad ban leh ïa kiwei kiwei ki kam bajakhlia; ban lute, ban lamler, bad ban kren sniew ïa kiwei. 20Kine ki long kiei kiei kiba pynlong bymkhuid ïa u briew. Hynrei ban bam khlem da thet ïa ki kti jong phi kumba ki ong ïa phi ban leh kumta — Kane kam pynlong bymkhuid ïa u briew.”
Ka jingngeit jong ka briew
(Mrk. 7:24-30)
21U Jisu u la mihnoh na kata ka jaka bad u la leit sha ka thain hajan ki nongbah Tyros bad Sidon. 22Ka kynthei nong Kanaan kaba shong ba sah ha kata ka thain ka la wan sha u. “Ko khun u Dabid!” ka la pyrta jam. “To isynei ïa nga, ko Kynrad! Ka khun jong nga ka don u ksuid bad ka don ha ka jinglong bashyrkhei.”
23Hynrei U Jisu um shym ong shikyntien ruh ha ka. Ki synran jong u ki la wan ha u bad ki la kyrpad ïa u, “To phah noh ïa ka! Ka wan bud ïa ngi bad ka pynlong ïa kane ka jingkhynwin baroh!”
24Nangta U Jisu u la jubab, “Ïa nga la phah tang sha ki langbrot ba la jah noh jong ki paid Israel.”
25Ha kane, ka briew ka la wan bad dem khrup ha ki kjat jong u. “To ïarap ïa nga, ko Kynrad!” ka la ong.
26U Jisu u la jubab, “Kam long kaba dei ban shim ïa ka jingbam jong ki khun bad bret ïa ka sha ki ksew.”
27“Kata ka long kaba shisha, ko Kynrad,” ka la jubab; “hynrei wat ki ksew ki ïabam ïa kiba sah tam kiba hap na ka miej u kynrad jong ki.”
28Kumta U Jisu u la jubab ïa ka, “Pha long ka briew kaba khraw ka jingngeit! Ïa kaei kaba pha kwah yn leh na ka bynta jong pha.” Bad ha kata ka khyllipmat la pynkhiah ïa ka khun jong ka.
U Jisu u pynkhiah bun ki briew
29U Jisu u la mihnoh nangta bad u la leit narud ka duriaw Galilaïa. U la kiew ïa u lumrit bad u la shong. 30Ki paidbah babun ki la wan sha u, ki da wallam bad ki ïa kiba dkoh, kiba matlah, kiba khrew, ki bymnang kren, bad kiwei pat ki briew kiba pang, ïa kiba ki la buh ha ki kjat jong U Jisu; bad u la pynkhiah ïa ki. 31Ki paidbah ki la lyngngoh haba ki la ïohi ba ki bymnang kren ki kren, kiba khrew ki koit, kiba dkoh ki ïaid, bad kiba matlah ki ïohi, bad ki la ïaroh ïa U Blei ka Israel.
U Jisu u bsa ïa ki saw hajar ngut
(Mrk. 8:1-10)
32U Jisu u la khot ïa la ki synran sha lade bad u la ong, “Nga isynei ïa kine ki briew, namar ki la ïadon bad nga la lai sngi bad mynta kim don ei ei ban bam. Ngam kwah ban phah noh ïa ki khlem da bsa ïa ki, naba ki lah ban ïapler ha ka lynti jong ki sha la ïing.”
33Ki synran ki la kylli ïa u, “Nangno ngin ïoh bam kaba biang ha kane ka ri shyiap ban bsa ïa une u paidbah?”
34“Katno tylli ki kpu phi don?” U Jisu u la kylli.
“Hynñiew tylli ki kpu,” ki la jubab, “bad khyndiat ki dohkha rit.”
35Kumta U Jisu u la hukum ïa ki paidbah ban shong ha madan. 36Nangta u la shim ïa ki hynñiew tylli ki kpu bad ki dohkha, u la ainguh ïa U Blei, u la kdiah ïa ki, bad u la ai ïa ki ha ki synran; bad ki synran ki la ai ïa ki ha u paidbah. 37Baroh ki la bam bad ki la kdang. Nangta ki synran ki la lum hynñiew tukri pura jong ki lyngkhot kiba sah tam. 38Ka jingkheiñ ki rangbah kiba la bam ka la long saw hajar ngut, khlem da ñiew ïa ki kynthei bad ki khynnah.
39Nangta U Jisu u la phah noh ïa u paidbah, u la kiew ha ka lieng, bad u la leit sha ka thain Magadan.
Currently Selected:
MATTHAÏOS 15: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
