MATTHAÏOS 19

U Jisu u hikai shaphang ka jingïapyllait tnga

(Mrk. 10:1-12)

1Haba U Jisu u la dep kren ïa kine kiei kiei, u la mihnoh na Galilaïa bad u la leit sha ka thain Judia sha shiliang jong ka wah Jordan. 2Ki paidbah babun ki la bud ïa u, bad u la pynkhiah ïa ki hangta.

3Katto katne ngut ki Pharisi ki la wan sha u bad ki la pyrshang ban riam ïa u da kaba kylli, “Hato ka Aiñ jong ngi ka shah ïa u briew ban pyllait noh ïa ka tnga jong u na ka bynta kano kano ka daw kaba u mon?”

4 # Jen. 1:27; 5:2 U Jisu u la jubab, “Hato phim pat pule ïa ka Jingthoh Bakhuid kaba ong ba ha kaba mynnyngkong U Nongthaw u la thaw ïa ki briew, shynrang bad kynthei? 5#Jen. 2:24Bad U Blei u la ong, ‘Namar kane ka daw u briew un iehnoh ïa la u kpa bad ïa la ka kmie bad un ïashong ïasah bad la ka tnga, bad ma ki baroh ar ngut kin ïalong kawei.’ 6Kumta kim ïalong shuh ar ngut, hynrei kawei. Uno uno u briew um dei ban pynïakhlad, te, ïa kaei kaba U Blei u la pynïasoh lang.”

7 # Deut. 24:1-4; Mat. 5:31 Ki Pharisi ki la kylli ïa u, “Balei, te, ba u Moses u ai ka hukum ïa u briew ban ai ïa ka jingpynbna pyllait tnga ha ka tnga jong u bad phah noh ïa ka?”

8U Jisu u la jubab, “U Moses u la shah ïa phi ban pyllait ïa la ki tnga namar phi long kiba eh ban shah hikai. Hynrei kam shym long kumta ha ka por ba mynnyngkong. 9#Mat. 5:32; 1 Kor. 7:10,11Nga ong ha phi, te, ba uno uno u briew uba pyllait noh ïa la ka tnga na kano kano ka daw, lait noh na ka jingbymïaineh jong ka, u klim lada u shongkurim ïa kawei pat ka briew.”

10Ki synran jong u ki la ong ïa u, “Lada ka long kumne hapdeng u briew bad la ka tnga, ka kham bha ban ym shongkurim.”

11U Jisu u la jubab, “Kane ka jinghikai kam treikam ïa baroh, hynrei tang ha kito kiba U Blei u la ai ïa ka. 12Naba don shibun ki daw baïapher balei ba ki briew kim lah ban shongkurim: katto katne, namar ba la kha ïa ki kumta; kiwei pat, namar ba ki briew ki pynlong ïa ki kumta; bad kiwei pat kim shongkurim na ka bynta ka Hima ki bneng. Ai ba uta uba lah ban pdiang ïa kane ka jinghikai un leh kumta.”

U Jisu u kyrkhu ïa ki khynnah rit

(Mrk. 10:13-16; Luk. 18:15-17)

13Katto katne ngut ki briew ki la wallam ïa ki khynnah sha U Jisu ba un buh ïa ki kti jong u halor jong ki bad ba un duwai na ka bynta jong ki, hynrei ki synran ki la mai ïa ki briew. 14U Jisu u la ong, “Shah ïa ki khynnah ba kin wan sha nga bad wat khang ïa ki, namar ka Hima ki bneng ka long ïa kiba kum kine.”

15U la buh la ki kti halor jong ki bad nangta u la leit noh.

U samla uba riewspah

(Mrk. 10:17-31; Luk. 18:18-30)

16Shisien uwei u briew u la wan sha U Jisu. “Ko Nonghikai,” u la kylli, “kaei kaba bha kaba nga dei ban leh ba ngan ïoh ïa ka jingim bymjukut?”

17“Balei me kylli na nga shaphang kaei kaba bha?” la jubab U Jisu. “Don tang Uwei uba bha. To sumar ïa ki hukum lada me kwah ban rung sha ka jingim.”

18 # Eks. 20:13; Deut. 5:17; Eks. 20:14; Deut. 5:18; Eks. 20:15; Deut. 5:19; Eks. 20:16; Deut. 5:20 “Ki hukum kiba kumno?” u la kylli.

U Jisu u la jubab, “Wat pynïap; wat klim; wat tuh; wat kynnoh bymdei ïano ïano; 19#Eks. 20:12; Deut. 5:16; Leb. 19:18burom ïa la u kpa bad ïa la ka kmie; bad to ieit ïa la u paramarjan kumba me ieit ïa lade.”

20“Nga la kohnguh ïa kine ki hukum baroh,” u samla u la jubab. “Sa kaei pat ba nga donkam ban leh?”

21U Jisu u la ong ha u, “Lada me kwah ban long uba janai, to khie leit bad die noh ïa baroh kaba me don bad ai ïa ka pisa ha kiba duk, bad men don ka spah ha bneng; nangta to wan bad bud ïa nga.”

22Haba u samla u la ïohsngew ïa kane, u la leit noh da kaba sngewsih, namar u la long uba riewspah bha.

23Nangta U Jisu u la ong ha la ki synran, “Nga pynthikna ïa phi: kan long kaba eh than ïa ki briew bariewspah ban rung shapoh ka Hima ki bneng. 24Nga ban biang: ka long kaba kham eh ïa u briew uba riewspah ban rung shapoh ka Hima U Blei ban ïa kaba ka ut ka rung lyngba i thliew thyrnia.”

25Haba ki synran ki la ïohsngew ïa kane, ki la kyndit thret. “Uei te uba lah ban lait im?” ki la kylli.

26U Jisu u la peit shlip sha ki bad u la jubab, “Kane ka long ka bym lah ha u briew, hynrei ha U Blei kiei kiei baroh ki long kaba lah.”

27Nangta u Petros u la kren, “Ha khmih,” u la ong, “ngi la iehnoh ïa kiei kiei baroh bad ngi la bud ïa me. Ngin ïoh aïu?”

28 # Mat. 25:31; Luk. 22:30 U Jisu u la ong ha ki, “Phi lah ban thikna ba haba U Khun U Briew u shong ha ka khet badonburom jong u ha ka Ïa kaba thymmai, te ma phi ki khat-ar ngut ki nongbud jong nga phin ïashong ruh ha ki khet, ban synshar ïa ki khat-ar ki jait Israel. 29Bad uno uno uba la iehnoh ïa ki ïing ki sem lane ïa ki hynmen ki para lane ïa u kpa lane ïa ka kmie lane ïa ki khun ki kti lane ïa ki lyngkha na ka bynta jong nga, un ïohpdiang shispah shah tam ïa kata, bad yn ai ha u ïa ka jingim bymjukut. 30#Mat. 20:16; Luk. 13:30Hynrei bun kiba mynta ki long kiba ha shuwa kin long kiba khatduh, bad bun kiba mynta ki long kiba khatduh kin long kiba ha shuwa.

Currently Selected:

MATTHAÏOS 19: KHACLBSI

Highlight

Copy