LOUKAS 3

Ka jingïalap u Ïoannis u Nongpynbaptis

(Mat. 3:1-12; Mrk. 1:1-8; Ïoan. 1:19-28)

1Ka la long ka snem kaba khatsan jong ka jingsynshar u Patsha Tiberios; u Pontios Pilat u la long u lyngskor jong ka Judia, U Herod u la long u nongsynshar jong ka Galilaïa, bad u Philip u para jong u, u la long u nongsynshar jong ka thain Ituria bad Trakhonitis; u Lysanias u la long u nongsynshar jong ka Abilene, 2bad u Annas bad u Kaïaphas ki la long ki rangbah lyngdoh. Ha kata ka por, ka ktien jong U Blei ka la wan ha u Ïoannis u khun jong u Sekharaïah, ha ka ri shyiap. 3Kumta u Ïoannis u la leit kylleng ka thain baroh jong ka wah Jordan, u da ïalap, “To phai noh na ki pop jong phi bad to shah ba yn pynbaptis, bad U Blei un map ïa ki pop jong phi.” 4#Isa. 40:3-5Kumba la thoh ha ka kitab u Isaïah u nongïathuhlypa:

“Don uwei uba pyrta ha ka ri shyiap:

‘To pynkhreh ka lynti bah na ka bynta U Trai;

to pynlong ka lynti ba-beit na ka bynta jong u ba un ïaid!

5Ïa kawei pa kawei ka them dei ban pyndap,

ïa uwei pa uwei u lumrit bad u lumbah dei ban pynmadan.

Ïa ki lynti kiba kyllaiñ dei ban pynbeit,

bad ïa ki lynti ïaid kiba khohruh khohram dei ban pynjlih.

6U khunbynriew baroh u dei ban ïohi ïa ka jingpynim ka jong U Blei!’ ”

7 # Mat. 12:34; 23:33 U paidbah byllien u la leit sha u Ïoannis ban shah pynbaptis ha u. “Phi ki bseiñ!” u la ong ha ki. “Mano ba la ong ïa phi ba phi lah ban lait na ka jingpynshitom kaba U Blei un sa phah? 8#Ïoan. 8:33To leh ïa kita kiei kiei ki ban pyn-i ba phi la phai noh na ki pop jong phi. Bad wat sdang ban ong hapdeng jong phi hi ba u Abraham u long u kpa tymmen jong phi. Nga ong ha phi ba U Blei u lah ban shim ïa kine ki maw bad pynlong ïa ki, ki khun ki ksiew jong u Abraham! 9#Mat. 7:19U sdie u la khreh ban khet ïa ki dieng na ki thied; ïa uno uno u dieng baroh u bym sei u soh babha yn khet noh bad bret ha ka ding.”

10U paidbah u la kylli ïa u, “Te kaei kaba ngi dei ban leh?”

11U la jubab, “Uta uba don ar tylli ki sopti, u dei ban ai kawei ha u briew u bym don, bad uno uno uba don jingbam u dei ban ïasam ïa ka.”

12 # Luk. 7:29 Katto katne ngut ki nonglum khajna ki la wan ban shah pynbaptis, bad ki la kylli ïa u, “Ko nonghikai, kaei ba ngi dei ban leh?”

13“Wat lum palat ïa kaba shong aiñ,” u la ong ha ki.

14Katto katne ngut ki shipai ruh ki la kylli ïa u, “Kumno ma ngi pat? Kaei ba ngi dei ban leh?”

U la ong ha ki, “Wat shim pisa nano nano da ka bor lane mudui lamler ïano ïano. To sngewhun ha la ka bainong.”

15Ka jingkyrmen jong ki briew ka la sdang ban kiew, bad ki la sdang ban pyrkhat la u Ïoannis lehse u lah ban dei U Messaïah. 16Kumta u Ïoannis u la ong ha ki baroh, “Nga pynbaptis ïa phi da ka um, hynrei don uwei pat uba wan uba kham khraw ban ïa nga. Ngam long uba bit wat ban loit ïa ki juti jong u. Un pynbaptis ïa phi da U Mynsiem Bakhuid bad da ka ding. 17U don bad u ka byrsha pynher stait, ban shoh ïa u kew baroh bad ban lumlang ïa u kew shapoh ka thiar jong u; hynrei un thang ïa u stait ha ka ding ka bym ju lip.”

18Ha kiba bun rukom u Ïoannis u la ïalap ïa ka Khubor Babha ha ki briew bad u la kyntu jur ïa ki ban pynkylla ïa ki rukom im jong ki. 19#Mat. 14:3,4; Mrk. 6:17,18Hynrei u Ïoannis u la pynrem jur ïa u Herod, uba long u lyngskor, namar u la shongkurim ïa ka Herodias, ka tnga jong u para jong u, bad u la leh bun kiei kiei kiba sniew. 20Nangta u Herod u la leh wat ïa kaba kham sniew tam da kaba set ïa u Ïoannis ha ka byndi.

Ka jingpynbaptis ïa U Jisu

(Mat. 3:13-17; Mrk. 1:9-11)

21Ynda haba la dep pynbaptis ïa ki briew baroh, la pynbaptis ruh ïa U Jisu. Katba U dang duwai, la plie ïa ka bneng, 22#Jen. 22:2; Salm. 2:7; Isa. 42:1; Mat. 3:17; Mrk. 1:11; Luk. 9:35bad U Mynsiem Bakhuid u la hiar halor jong u ha ka dur kum ka paro. Bad ka sur ka la wan na bneng, “Me long u khun ba-ieit jong nga. Nga la sngewbha bad me.”

Ki kpa tymmen jong U Jisu

(Mat. 1:1-17)

23Haba U Jisu u la sdang ïa la ka kam, u la dap kumba laiphew snem ka rta. U la long u khun, kumta ki briew ki la pyrkhat, jong u Joseph, uba long u khun jong u Heli, 24u khun jong u Matthat, u khun jong u Lebi, u khun jong u Melkhi, u khun jong u Jannai, u khun jong u Joseph, 25u khun jong u Mattathias, u khun jong u Amos, u khun jong u Nahum, u khun jong u Esli, u khun jong u Naggai, 26u khun jong u Maath, u khun jong u Mattathias, u khun jong u Semein, u khun jong u Josekh, u khun jong u Joda, 27u khun jong u Joanan, u khun jong u Rhesa, u khun jong u Serubbabel, u khun jong u Shealtiel, u khun jong u Neri, 28u khun jong u Melkhi, u khun jong u Addi, u khun jong u Kosam, u khun jong u Elmadam, u khun jong u Er, 29u khun jong u Joshua, u khun jong u Elieser, u khun jong u Jorim, u khun jong u Matthat, u khun jong u Lebi, 30u khun jong u Simeon, u khun jong u Judah, u khun jong u Joseph, u khun jong u Jonam, u khun jong u Eliakim, 31u khun jong u Melea, u khun jong u Menna, u khun jong u Mattatha, u khun jong u Nathan, u khun jong u Dabid, 32u khun jong u Jesse, u khun jong u Obed, u khun jong u Boas, u khun jong u Salmon, u khun jong u Nahshon, 33u khun jong u Amminadab, u khun jong u Admin, u khun jong u Arni, u khun jong u Hesron, u khun jong u Peres, u khun jong u Judah, 34u khun jong u Jakob, u khun jong u Isaak, u khun jong u Abraham, u khun jong u Terah, u khun jong u Nahor, 35u khun jong u Serug, u khun jong u Reu, u khun jong u Peleg, u khun jong u Eber, u khun jong u Shelah, 36u khun jong u Kainan, u khun jong u Arphaksad, u khun jong u Shem, u khun jong u Noah, u khun jong u Lamekh, 37u khun jong u Methuselah, u khun jong u Enokh, u khun jong u Jared, u khun jong u Mahalaleel, u khun jong u Kenan, 38u khun jong u Enosh, u khun jong u Seth, u khun jong u Adam, u khun jong U Blei.

Currently Selected:

LOUKAS 3: KHACLBSI

Highlight

Copy