LOUKAS 2

Ka jingkha ïa U Jisu

(Mat. 1:18-25)

1Ha kata ka por, u Patsha Augustus u la hukum ban shim jingkheiñ ïa ki briew baroh ha ka Hima Rom. 2Haba kane ka jingkheiñbriew kaba nyngkong ka la jia, u Kyrinios u long u lyngskor jong ka Syria. 3Uwei uwei baroh, te, u la leit ban ai kyrteng ïa lade, uwei uwei sha la ka jong hi ka shnong.

4U Joseph ruh u la leit na ka shnong Nasareth, kaba ha Galilaïa sha ka shnong Bethlehem ha Judia, ka jaka ha kaba la kha ïa syiem Dabid. U Joseph u la leit shata namar u la long uba hiarpateng na u Dabid. 5U la leit ban thoh kyrteng lem bad ka Mari, kaba la ïatehktien bad u. 6Ka la punkhun, bad katba ki dang don ha Bethlehem, ka por ka la dei ïa ka ba kan kha khun. 7Ka la kha ïa u khun nyngkong jong ka bad ka la sop ïa u da ki jaiñsop, bad ka la pynthiah ïa u ha ka shyngoid — ym shym don jaka ïa ki ha ka kamra sah#2:7 ka kamra sah: La pynkylla ka kamra sah ha ka jaka ka ïingbasa ha kane ka bynta, ka long halor jong ka nongrim ba la batai lyngkot harum. Ka kyntien Grik kataluma ba pyndonkam ha kane ka dkhot ka dei kajuh ka kyntien ba la pyndonkam ha ka Luk. 22:11; Mrk. 14:14 bad ha ki rukom pyndonkam ïa ka, kam kit ïa ka jingmut ka ïingbasa, hynrei ka kit ïa ka jingmut ka kamra. Ka kyntien Grik pandokhei-on kaba kit ïa ka jingmut ka ïingbasa ka paw ha ka Luk. 10:34..

Ki nongap langbrot bad ki angel

8La don katto katne ngut ki nongap langbrot ha kata ka bynta jong ka ri kiba la sahmiet ha ki lum, da kaba sumar ïa ki kynhun langbrot jong ki. 9U angel jong U Trai u la mihpaw ha ki, bad ka burom jong U Trai ka la tyngshaiñ halor jong ki. Ki la sngewsheptieng shikatdei eh, 10hynrei u angel u la ong ha ki, “To wat sheptieng! Nga don hangne lem bad ka khubor babha na ka bynta jong phi, ka ban wanrah ka jingkmen kaba khraw ha ki briew baroh. 11Ha kane ka sngi ha ka shnong u Dabid la kha ïa U Nongpynim jong phi — U Khrist U Trai! 12Bad kane ka long kaei ka ban pynshisha ïa kata ha phi: Phin shem ïa u khunlung uba la sop da ki jaiñsop bad uba thiah ha ka shyngoid.”

13Kynsan ka kynhun bah jong ki angel ka bneng, ka la mihpaw lem bad u angel, ki da rwai ki jingïaroh ïa U Blei:

14“Ka burom ïa U Blei ha ki bneng kiba hajrong tam,

bad ka jingsuk ha ka pyrthei ha kito kiba u sngewbha!”

15Haba ki angel ki la leit noh pat na ki sha bneng, ki nongaplangbrot ki la ïa-ong para ma ki, “Ïa ngin ïaleit sha Bethlehem bad ban ïohi ïa kane kaei kaei kaba la lah jia, kaba U Trai u la ïathuh ha ngi.”

16Kumta ki la leit kloi bad ki la shem ïa ka Mari bad u Joseph bad ki la ïohi ïa u khunlung uba thiah ha ka shyngoid. 17Haba ki nongaplangbrot ki la ïohi ïa u, ki la ïathuh ha ki ïa kaei kaba u angel u la ïathuh shaphang u khunlung. 18Baroh kiba la ïohsngew ïa kata, ki la sngewlyngngoh ïa kaei kaba ki nongaplangbrot ki la ong. 19Ka Mari ka la kynmaw ïa kine kiei kiei baroh bad ka la pyrkhat jylliew shaphang kita. 20Ki nongaplangbrot ki la leit phai pat, ki da rwai ki jingïaroh ïa U Blei na ka bynta baroh kaba ki la ïohsngew bad ïohi; ka la long thik kumba u angel u la ïathuh ha ki.

La ai kyrteng ïa U Jisu

21 # Leb. 12:3; Luk. 1:31 Hadien shi taïew, haba ka por ka la poi na ka bynta ban otsher ïa u khunlung, la ai kyrteng ïa u, U Jisu, ka kyrteng kaba u angel u la lah ai na ka bynta jong U ha shuwa ba yn pun ïa U.

La leit rah ïa U Jisu sha ka Templ

22Ka por ka la poi ïa u Joseph bad ka Mari ban pyndep ïa ka jinglehniam ka jingpynkhuid, kumba ka Hukum u Moses ka dawa. Kumta ki la leit rah ïa u khunlung sha Jerusalem ban aiti ïa u sha U Trai, 23#Eks. 13:2,12kumba la thoh ha ka aiñ jong U Trai: “Ïa uwei pa uwei u khun nyngkong dei ban pynkyntang sha U Trai.” 24#Leb. 12:6-8Ki la leit ruh ban ai jingkñia da shi jur ki lyngdkhur lane ar tylli ki khun paro, kumba la dawa da ka aiñ jong U Trai.

25Ha kata ka por la don u briew uba shong basah ha Jerusalem uba kyrteng u Simeon. U la long u briew uba bha, uba sheptieng ïa U Blei bad uba ïai ap na ka bynta ki Israel ban ïoh jingpynim. 26U Mynsiem Bakhuid u la don bad u bad U la pynthikna ïa u ba un ym ïap ha shuwa ba un ïohi ïa U Messaïah ba la kular jong U Trai. 27Haba la ïalam ïa u da U Mynsiem, u Simeon u la leit sha ka Templ. Haba ki kmie ki kpa ki la wallam ïa u khunlung Jisu hapoh ka Templ ban pyndep na ka bynta jong u ïa kaei kaba ka Hukum ka dawa, 28u Simeon u la shim ïa u khunlung ha ki ksang'ti jong u bad u la ainguh ïa U Blei:

29“Mynta, A Trai, me la bat ïa la ka kular,

bad men shah ïa u shakri jong me ban leit noh ha kaba suk.

30Da la ki jong ki khmat nga la ïohi ïa ka jingpynim jong me,

31kaba me la pynkhreh ha khmat jong ki jaitbynriew baroh:

32 # Isa. 42:6; 49:6; 52:10 Ka jingshai ban pynpaw ïa ka mon jong me ha ki Jentil

bad ban wallam ka burom ha ki briew jong me, ki Israel.”

33U kpa bad ka kmie jong u khunlung ki la sngewlyngngoh ha kiei kiei kiba u Simeon u la kren shaphang jong u. 34U Simeon u la kyrkhu ïa ki bad u la ong ha ka Mari, ka kmie jong u, “Ïa une u khunlung la jied da U Blei na ka bynta ka jingpynjot bad ka jingpynim ïa kiba bun ha Israel. Un long ka dak na U Blei ïa kaba kiba bun ki briew kin kren pyrshah bad kumta un pynpaw ïa ki jingpyrkhat barieh jong ki. 35Bad ka jingsngewsih, kum ka waitlam banep, kan pynlwet ïa ka dohnud jong pha hi.”

36-37La don kawei ka nongïathuhlypa kaba la tymmen bha, ka riewkynthei kaba kyrteng ka Anna, ka khun jong u Phanuel na ka jait Asher. Ka la shongkurim tang hynñiew snem bad mynta ka la dap phraphew saw snem ka rta. Kam ju mih shuh na ka Templ; mynsngi bad mynmiet ka la mane ïa U Blei, da kaba shahjingit bad duwai. 38Ha kata ka kynta hi, ka la wan poi bad ka la ainguh ïa U Blei bad ka la kren shaphang u khunlung ha baroh kiba ap ïa U Blei ban pyllaitluid ïa ka Jerusalem.

Ka jingleit phai pat sha Nasareth

39 # Mat. 2:23 Haba U Joseph bad ka Mari ki la pyndep ïa kiei kiei baroh kiba la dawa da ka aiñ jong U Trai, ki la leit phai pat sha Nasareth, ka shnong jong ki kaba ha Galilaïa. 40U khynnah u la san bad u la nang khlaiñ; u la dap da ka jingstad, bad ki jingkyrkhu U Blei ki la long halor jong u.

U khynnah Jisu ha ka Templ

41 # Eks. 12:1-27; Deut. 16:1-8 Man ka snem ki kmie ki kpa jong U Jisu ki leit sha Jerusalem na ka bynta ka Jingkhawai Niam Ka Jinglait. 42Haba U Jisu u la dap khat-ar snem ka rta, ki la leit sha ka Jingkhawai Niam kumba ju long. 43Haba ka Jingkhawai Niam ka la kut, ki la khreh ban leit phai noh sha ïing, hynrei u khynnah Jisu u la sah ha Jerusalem. 44Ki kmie ki kpa jong u kim tip shaphang kane; ki dang pyrkhat ba u la don lang bad ka kynhun, kumta ki la ïaleit lynti baroh shi sngi, bad nangta, ki la sdang ban wad ïa u hapdeng ki ba-ha-ïing bad ki paralok. 45Ki shym la shem ïa u, kumta ki la leit phai pat sha Jerusalem ban wad ïa u. 46Ha ka sngi kaba lai, ki la shem ïa u hapoh ka Templ, u da shong bad ki nonghikai jong ki Jiw, da kaba shahshkor ïa ki bad kylli jingkylli. 47Baroh kiba la ïohsngew ïa u ki la sngewlyngngoh ïa ki jingjubab bastad jong u. 48Ki kmie ki kpa jong u ki la kyndit haba ki la ïohi ïa u, bad ka kmie jong u ka la ong, “Ko khun jong nga, balei me la leh ïa kane ha ngi? U kpa jong me bad ma nga ngi la khuslai shikatdei eh ha kaba pyrshang ban wad ïa me.”

49U la jubab ïa ki, “Balei ba phi dei ban wad ïa nga? Hato phim tip ba nga dei ban don ha ka ïing jong U Kpa jong nga?” 50Hynrei kim shemphang ïa ka jingjubab jong u.

51Kumta U Jisu u la leit phai pat bad ki sha Nasareth, ha kaba u la kohnguh ïa ki. Ka kmie jong u ka la kynshew ïa kine kiei kiei baroh hapoh la ka dohnud. 52#1 Sam. 2:26; Pro. 3:4U Jisu u la nang san ha ka met bad ha ka jingstad, da kaba ïoh ïa ka jingsngewbha bad U Blei lem bad ki briew.

Currently Selected:

LOUKAS 2: KHACLBSI

Highlight

Copy