LOUKAS 1

1Thiophilos badonburom:

Bun ki briew ki la leh ïa kaba bha tam ban thoh ka jingïathuh ïa kiei kiei kiba la lah jia hapdeng jong ngi. 2Ki la thoh ïa kaei kaba la ïathuh ha ngi da kito kiba la ïohi ïa kine kiei kiei baroh naduh kaba sdang bad kiba la pynbna ïa ka khubor. 3Bad kumta, ko rangbah badonburom, namar ba nga, nga pule bniah biang biang ïa kine kiei kiei baroh naduh ka jingsdang jong ki, nga la pyrkhat ba kan long kaba bha ban thoh ryntih ïa ka jingïathuh na ka bynta jong phi. 4Nga leh ïa kane khnang ba phin tip ïa ka jingshisha ba-pura shaphang kiei kiei baroh ïa kiba la hikai ïa phi.

La pynbna ïa ka jingkha ïa u Ïoannis u Nongpynbaptis

5 # 1 Khrn. 24:10 Ha ka por mynba U Herod u long u syiem ka Judia, la don u lyngdoh uba kyrteng u Sekharaïah, uba dei na ka pateng lyngdoh jong u Abijah. Ka kyrteng jong ka tnga jong u, ka long ka Elisabeth; ma ka ruh ka la long na ka longïing lyngdoh. 6Baroh ar ngut ki im ka jingim kaba bha ha khmat U Blei bad ki la kohnguh lut ïa baroh ki aiñ bad ki hukum jong U Trai. 7Kim don khun namar ba ka Elisabeth kam shym lah ban ïoh wat iwei ruh, bad ma ka lem bad u Sekharaïah ki la tymmen bha.

8Ha kawei ka sngi, u Sekharaïah u dang pyndep ïa ka kam kum u lyngdoh ha ka Templ, da kaba shim ïa la ka bynta ha ka jingshakri ba man ka sngi. 9Kat kum ka rukom ba la bud da ki lyngdoh, la jied ïa u da kaba kynting sbai ban thang jingiwbih halor ka duwan. Kumta u la leit shapoh ka Templ jong U Trai, 10katba u paidbah habar u la duwai ha ka kynta ha kaba la thang ïa ka jingiwbih.

11U angel jong U Trai u la paw ha u, u da ïeng ha ka liang kamon jong ka duwan ha kaba la thang ïa ka jingiwbih. 12Haba u Sekharaïah u la ïohi ïa u, u la kyndit bad u la sngewsheptieng. 13Hynrei u angel u la ong ha u, “Wat sheptieng, ko Sekharaïah! U Blei u la shahshkor ïa ka jingduwai jong me, bad ka Elisabeth ka tnga jong me kan kha u khun ïa me. Men kyrteng ïa u, u Ïoannis. 14A katno men long uba shadkmen bad uba kmen, bad katno kiwei ruh kin kmen haba yn kha ïa u! 15#Jkhñ. 6:3Un long u briew uba khraw ha khmat U Trai. Um dei ban dih kano kano ka waiñ lane ka jingdih kaba khor. Naduh ka jingkha ïa u, yn pyndap da U Mynsiem Bakhuid, 16bad un wallam pat ïa ki briew babun sha U Trai U Blei jong ki. 17#Mal. 4:5,6Un leit ha shuwa jong U Trai, uba khlaiñ bad uba khrawbor kum u Elijah u nongïathuhlypa. Un pynïasuk pat ïa ki kpa bad ki khun; un pynphai pat ïa ki briew ki bymkohnguh sha ka rukom pyrkhat jong kiba hok; un pynkhreh ïa ki briew jong U Trai na ka bynta jong U.”

18U Sekharaïah u la ong ha u angel, “Da kumno ngan tip lada kane ka long kumta? Nga long u briew batymmen, bad ka tnga jong nga ruh ka la tymmen.”

19 # Dan. 8:16; 9:21 “Nga long u Gabriel,” u angel u la jubab. “Nga ïeng ha ka jingdon ryngkat jong U Blei, uba la phah ïa nga ban kren ha me bad ïathuh ha me ïa kane ka khubor babha. 20Hynrei mem shym ngeit ïa ka khubor jong nga, ka ban urlong shisha ha ka por kaba dei. Namar ba mem shym la ngeit, men ym lah ban kren, men ïailong uba jar jar tad ynda ka sngi ha kaba ka jingkular jong nga ha me ka urlong shisha.”

21Ha kajuh ka por ki paidbah ki la ïa-ap ïa u Sekharaïah bad ki da sngewlyngngoh balei ba u pynlut bun por hapoh ka Templ. 22Haba u la mih shabar, um lah ban kren ha ki, bad kumta ki la sngewthuh ba u la ïohi ka jingïohipaw hapoh ka Templ. Um lah ban kren kano kano ka kyntien, u la pyn-i dak ha ki da ki kti jong u.

23Haba ka por jingshakri jong u ha ka Templ ka la kut, u Sekharaïah u la leit phai sha ïing. 24Katto katne por hadien, ka Elisabeth ka tnga jong u, ka la punkhun bad kam shym mih na ïing san bnai. 25“Mynta khatduh U Trai u la ïarap ïa nga,” ka la ong. “U la shim noh ïa ka jahburom jong nga hapdeng ki briew!”

La pynbna ïa ka jingkha U Jisu

26Ha u bnai bahynriew jong ka jingpunkhun jong ka Elisabeth, U Blei u la phah ïa u angel Gabriel sha ka shong ha Galilaïa kaba kyrteng ka Nasareth. 27#Mat. 1:18U la don ka khubor ïa ka theisotti kaba la ïatehktien bad u briew uba kyrteng u Joseph, uba long u nonghiarpateng na u syiem Dabid. Ka kyrteng jong ka, ka long ka Mari. 28U angel u la wan sha ka bad u la ong, “To ka jingsuk kan long lem bad pha! U Trai u long ryngkat bad pha bad u la kyrkhu eh ïa pha!”

29La pynkhuslai eh ïa ka Mari da ka khubor jong u angel, bad ka la lyngngoh aïu ki kyntien jong u ki kit jingmut. 30U angel u la ong ha ka, “To wat sheptieng, ko Mari; U Blei u la sngewbha ïa pha. 31#Mat. 1:21Phan sa punkhun bad phan kha ïa u khun, bad phan kyrteng ïa u, U Jisu. 32#2 Sam. 7:12,13,16; Isa. 9:7Un long uba khraw, bad yn khot ïa u, U Khun jong U Blei Bahakhlieh Tam Eh. U Trai Uba U Blei un pynlong syiem ïa u, kumba u Dabid u kpa tymmen jong u, u la long, 33bad un long u syiem jong ki khun ki ksiew u Jakob junom; ka hima jong u kan ym kut shuh da lei lei!”

34Ka Mari ka la ong ha u angel, “Nga long kaba dang sotti. Kumno, te, kane ka lah ban long?”

35U angel u la jubab, “U Mynsiem Bakhuid un sa wan ha pha, bad ka bor jong U Blei kan shong halor jong pha. Na kane ka daw, ïa i khunlung bakhuid yn khot U Khun U Blei. 36To kynmaw ïa ka ba-ha-ïing jong pha, ka Elisabeth. Ïa kaba la ong ba kam lah ban ïoh khun, hynrei mynta ka la hynriew bnai ka jingpunkhun, wat la ka la long kaba la tymmen bha. 37#Jen. 18:14Naba ym don kano kano kaba U Blei um lah ban leh.”

38“Nga long ka shakri jong U Trai,” ka Mari ka la ong, “ai kan long ha nga kumba me la ong.” Bad u angel u la leit noh na ka.

Ka Mari ka leit jngoh ïa ka Elisabeth

39Shen hadien, ka Mari ka la khreh bad ka la leit bran bran sha ka shnong ha ka ri lum ha Judia. 40Ka la leit sha ka ïing jong u Sekharaïah bad ka la khublei ïa ka Elisabeth. 41Haba ka Elisabeth ka la ïohsngew ïa ka jingkhublei jong ka Mari, i khunlung i la khih hapoh jong ka. La pyndap ïa ka Elisabeth da U Mynsiem Bakhuid 42bad ka la ong ha ka sur kaba jam, “Pha long ka kynthei kaba la kyrkhu na baroh ki kynthei, bad long ba la kyrkhu ita i khunlung iba phan sa kha! 43Balei kane ka jingjia bakhraw ka wan jia ha nga, ba ka kmie jong U Trai jong nga ka wan ban jngoh ïa nga? 44Naba tang mar ïa ïohsngew ïa ka jingkhublei jong pha, i khunlung hapoh jong nga i la kynthih da ka jingkmen. 45A katno pha long kaba kmen ban ngeit ba ka khubor jong U Trai ha pha kan urlong shisha!”

Ka jingrwai ïaroh jong ka Mari

46Ka Mari ka la ong,

“Ka dohnud jong nga ka ïaroh ïa U Trai;

47ka mynsiem jong nga ka shadkmen namar U Blei U Nongpynim jong nga,

48 # 1 Sam. 1:11 naba u la kynmaw ïa nga, ka shakri barit jong u!

Naduh mynta ki briew baroh kin khot ïa nga, kaba kmen,

49namar jong kiei kiei kiba khraw kiba U Blei Badonbor Baroh u la leh na ka bynta jong nga.

Ka kyrteng jong u ka long kaba khuid;

50na kawei ka pateng bynriew sha kawei pat

u pyn-i ka jingisynei ha kito kiba pyndonburom ïa u.

51U la kner ïa ka ksang'ti badonbor jong u

bad u la pynsakma ïa kiba sarong lem bad ki jingthmu jong ki.

52 # Job. 5:11; 12:19 U la pynhiar ïa ki syiem bakhrawbor na ki khet jong ki,

bad u la kyntiew shajrong ïa kiba rangli.

53U la pyndap ïa kiba thngan da kiei kiei kiba bha,

bad u la phah noh thylli ïa kiba riewspah.

54U la bat ïa ka jingkular kaba u la pynlong ha ki kpa tymmen jong ngi,

bad u la wan ban ïarap ïa u shakri jong u, u Israel.

55 # Jen. 17:7 # 1 Sam. 2:1-10 U la kynmaw ban pyn-i jingisynei ha u Abraham

bad ha baroh ki khun ki ksiew jong u junom!”

56Ka Mari ka la sah bad ka Elisabeth kumba lai bnai bad nangta ka la leit pat sha ïing.

Ka jingkha ïa u Ïoannis u Nongpynbaptis

57Ka por ka la poi ïa ka Elisabeth ban kha, bad ka la kha khun shynrang. 58Ki paramarjan bad ki ba-ha-ïing jong ka, ki la ïohsngew haduh katno U Trai u la long ka jingbha kaba phylla ïa ka, bad baroh ki la shadkmen lem bad ka.

59 # Leb. 12:3 Haba u khunlung u la dap shi taïew, ki la wan ban otsher ïa u, bad ki la mut ban kyrteng ïa u, u Sekharaïah, kaba bud ïa u kpa jong u. 60Hynrei ka kmie ka la ong, “Em! Ka kyrteng jong u ka dei ban long u Ïoannis.”

61Ki la ong ha ka, “Hynrei pham don uwei ruh na ki ba-ha-ïing uba kyrteng kumta!” 62Nangta, ki la ai dak ïa u kpa jong u, da kaba kyrpad ïa u kaei ka kyrteng u mon ba u khynnah un don.

63U Sekharaïah u la pan ïa ka kynja sleit bad u la thoh, “Ka kyrteng jong u ka long u Ïoannis.” A katno baroh ki la ïasngew kyndit! 64Ha kata ka khyllipmat u Sekharaïah u la lah pat ban kren, bad u la sdang ban ïaroh ïa U Blei. 65La pyndap ïa ki paramarjan baroh da ka jingsheptieng, bad ka khubor shaphang kine kiei kiei ka la saphriang kylleng ka ri lum Judia. 66Uwei uwei baroh uba la ïohsngew ïa kata, u la pyrkhat shaphang kata bad u la kylli, “Aïu une u khunlung un long?” Naba ka la long kaba shai ba ka bor jong U Trai ka la don halor jong u.

Ka jingïathuhlypa jong u Sekharaïah

67Ïa U Sekharaïah, u kpa jong u Ïoannis la pyndap da U Mynsiem Bakhuid, bad u la kren ïa ka khubor jong U Blei:

68“To ngin ïaroh ïa U Trai, U Blei jong ki Israel!

U la wan ïa ka ban ïarap ïa ki briew jong u bad ban pyllaitluid ïa ki.

69U la ai ha ngi ïa U Nongpynim bakhrawbor,

uba hiarpateng na u Dabid u shakri jong u.

70U la kular lyngba ki nongïathuhlypa bakhuid jong u na mynbarim

71ba un pynim ïa ngi na ki nongshun jong ngi,

na ka bor jong kito baroh kiba isih ïa ngi.

72U la ong ba un pyn-i jingisynei ïa ki kpa tymmen jong ngi

bad kynmaw ïa ka jutang bakyntang jong u.

73-74Da ka jingsmai kyntang ha u Abraham u kpa tymmen jong ngi

u la kular ban pyllait im ïa ngi na ki nongshun jong ngi

bad shah ïa ngi ban shakri ïa u khlem jingsheptieng,

75khnang ba ngi lah ban long kiba khuid bad kiba hok ha khmat jong u

baroh ki sngi ka jingim jong ngi.

76 # Mal. 3:1 “Ïa me, ko khun jong nga, yn khot u nongïathuhlypa jong U Blei Bahakhlieh Tam Eh.

Men leit ha shuwa jong U Trai

ban pynkhreh ka lynti na ka bynta jong u,

77ban ïathuh ha ki briew jong u ba yn pynim ïa ki

da kaba ki ïoh ka jingmap ïa ki pop jong ki.

78U Blei jong ngi u long uba dap da ka jingisynei bad uba jemnud.

Un pynlong ïa ka step baphyrnai jong ka jingpynim ban mih ha ngi

79 # Isa. 9:2 bad ban tyngshaiñ na bneng halor kito baroh kiba im ha ka syrngiew ba-dum jong ka jingïap,

ban ïalam ïa ki sien jam jong ngi ha ka lynti jong ka jingsuk.”

80U khynnah u la nang san bad nang khraw ha ka met bad ka mynsiem. U la shong la sah ha ka ri shyiap tad haduh ka sngi ba u la paw paidbah ha ki paid Israel.

Currently Selected:

LOUKAS 1: KHACLBSI

Highlight

Copy