LOUKAS 4
4
Ka jingpynshoi ïa U Jisu
(Mat. 4:1-11; Mrk. 1:12-13)
1U Jisu u la wan phai na ka wah Jordan uba la dap da U Mynsiem Bakhuid bad la ïalam ïa u da U Mynsiem sha ka ri shyiap, 2ha kaba u la shah pynshoi ha u Soitan haduh sawphew sngi. Ha baroh kata ka por u khlem bam ei ei, ba kumta u la thngan eh haba ka la kut.
3U Soitan u la ong ïa u, “Lada me long U Khun U Blei, hukum ïa une u maw ban kylla kpu.”
4 #
Deut. 8:3
Hynrei U Jisu u la jubab, “Ka Jingthoh Bakhuid ka ong, ‘U briew um lah ban im tang da u kpu.’ ”
5Nangta, u Soitan u la ïalam ïa u shajrong bad u la pyn-i ha u ha ka shikhyllipmat ïa baroh ki hima jong ka pyrthei. 6“Ngan ai ha me ïa kane ka bor baroh bad ïa kane ka spah baroh,” u Soitan u la ong ïa u. “La ai ïa kane baroh ha nga, bad nga lah ban ai ïa ka ha uno uno uba nga jied. 7Kane baroh kan long ka jong me, te, lada me mane ïa nga.”
8 #
Deut. 6:13
U Jisu u la jubab, “Ka Jingthoh Bakhuid ka ong, ‘To mane ïa U Trai uba U Blei jong me bad shakri tang ïa u!’ ”
9Nangta u Soitan u la ïalam ïa u sha Jerusalem bad buh ïa u ha ka jaka kaba jrong tam jong ka Templ, bad u la ong ha u, “Lada me long U Khun U Blei, to pynnoh ïa lade sha tbian nangne. 10#Salm. 91:11,12Naba ka Jingthoh Bakhuid ka ong, ‘U Blei un hukum ïa ki angel jong u ban sumar bha ïa me.’ 11Ka ong ruh, ‘Kin rah ïa me ha ki kti jong ki khnang ba wat ki kjat jong me kin ym mynsaw ha ki maw.’ ”
12 #
Deut. 6:16
Hynrei U Jisu u la jubab, “Ka Jingthoh Bakhuid ka ong, ‘Wat tynjuh ïa U Trai U Blei jong me.’ ”
13Haba u Soitan u la dep ban pynshoi ïa U Jisu ha ki rukom bapher bapher, u la iehnoh ïa u shipor.
U Jisu u sdang ïa ka jingtrei jong u ha Galilaïa
(Mat. 4:12-17; Mrk. 1:14-15)
14Nangta U Jisu u la wan phai sha Galilaïa, bad ka bor jong U Mynsiem Bakhuid ka la long bad u. Ka khubor shaphang jong u ka la par kylleng kata ka thain. 15U la hikai ha ki synagog bad uwei pa uwei u la ïaroh ïa u.
La kyntait ïa U Jisu ha Nasareth
(Mat. 13:53-58; Mrk. 6:1-6)
16Nangta U Jisu u la leit sha Nasareth, ha kaba la pynheh pynsan ïa u, bad ha ka sngi Sabbaton u la leit sha ka synagog kumba ju long. U la ïeng ban pule ïa Ki Jingthoh Bakhuid, 17bad la ai ha u ïa ka kitab u Isaïah u nongïathuhlypa. U la plied ïa la kot kli bad u la shem ïa ka bynta ha kaba la thoh,
18 #
Isa. 61:1,2 “U Mynsiem jong U Trai u long ha nga,
namar ba u la jied ïa nga ban wallam ka khubor babha ha kiba duk.
U la phah ïa nga ban pynbna ka jingpyllaitluid ïa ki koidi
bad ka jingpynïoh ïa ka jingimat ha kiba matlah;
ban pyllait ïa kiba la shah banbeiñ
19bad ban pynbna ba ka por ka la poi haba U Trai un pynim ïa ki briew jong u.”
20U Jisu u la kli pat ïa ka kot kli, u la ai pat ïa ka ha u shakri, bad u la shong. Baroh ki briew ha ka synagog ki la peit shlip sha u, 21katba u ong ha ki “Kane ka bynta jong ka Jingthoh Bakhuid ka la wan urlong shisha mynta ka sngi, haba phi ïohsngew ba la pule ïa ka.”
22Baroh ki la sngewhun ïa u bad ki la sngewphylla ha ki kyntien basngewtynnat kiba u la kren. Ki la ong, “Hato une um dei u khun jong u Joseph?”
23U la ong ha ki, “Nga thikna ba phin sot ïa kane ka proberb ha nga, ‘Ko nongpynkhiah, to pynkhiah ïa lade.’ Phin ong ruh ïa nga ban leh hangne ha la ka shnong ïa kijuh kiei kiei kiba phi la ïohsngew ïa kiba la leh ha Kapernam. 24#Ïoan. 4:44Nga ong ha phi ïa kane,” U Jisu u la bynrap, “ïa u nongïathuhlypa ym ju pdiang sngewbha ha la ka shnong.
25 #
1 Syiem. 17:1
“Shahshkor ïa nga: Ka long kaba shisha ba ki don shibun ki riewkynthei ha Israel ha ka por jong u Elijah, haba ym shym la don slap haduh lai snem shiteng bad ba ka 'nemsniew bajur ka la saphriang kylleng ka ri baroh kawei. 26#1 Syiem. 17:8-16Pynban, ïa u Elijah ym shym la phah hano hano ha Israel, hynrei, tang sha ka riewkynthei kaba shong basah ha Sarephath ha ka thain jong ka Sidon. 27#2 Syiem. 5:1-14Bad la don bun ki briew kiba pang 'ñiangthohlieh kiba la im ha Israel ha ka por jong u Elisha u nongïathuhlypa; pynban ym shym la pynkhiah ïa uno uno na ki, hynrei, tang ïa u Naaman u nong Syria.”
28Haba ki briew ha ka synagog ki la ïohsngew ïa kane, la pyndap ïa ki da ka jingbitar. 29Ki la ïeng joit, ki la tan ïa U Jisu shabar jong ka shnong, bad ki la ïalam ïa u sha kliar jong u lum ha kaba la tei ïa ka shnong jong ki. Ki la mut ban bret ïa u na ka riat, 30hynrei, u la ïaid lyngba napdeng jong u paidbah bad u la leit ha la ka lynti.
U briew uba shongksuid
(Mrk. 1:21-28)
31Nangta, U Jisu u la leit sha Kapernam, ka shnong ha Galilaïa, ha kaba u la hikai ïa u paidbah ha ka sngi Sabbaton. 32#Mat. 7:28,29Baroh ki la sngewlyngngoh ïa ka rukom kaba u la hikai, namar u la kren da ka bor. 33Ha ka synagog, la don u briew uba don u mynsiem bymkhuid ha u, bad u la kyang da ka sur kaba jam, 34“Ieh! Kaei me kwah bad ngi, ko Jisu uba na Nasareth? Hato me la wan hangne ban pynjot ïa ngi? Nga ithuh me long uei: Me long u nonglamktien bakhuid jong U Blei!”
35U Jisu u la hukum ïa u mynsiem, “Sngap jar bad mihnoh na une u briew!” U mynsiem bymkhuid u la bret ïa uta u briew sha madan ha khmat jong ki, bad u la mihnoh na u, khlem pynmynsaw ei ei ïa u.
36Ki briew baroh ki la sngewphylla bad ki la ïa-ong para ma ki, “Ki jait ktien aïu kine? Da ka iktiar bad ka bor une u briew u ai ki hukum ïa ki mynsiem bymkhuid, bad ki ïamihnoh!” 37Bad ka jingïathuh shaphang U Jisu ka la phriang kylleng ha kata ka thain.
U Jisu u pynkhiah bun ki briew
(Mat. 8:14-17; Mrk. 1:29-34)
38U Jisu u la mih na ka synagog bad u la leit sha ïing jong u Simon. Ka kiaw kurim jong u Simon ka la pang bad ka jingpang shit kaba jur, bad ki la ïathuh ha U Jisu shaphang jong ka. 39U la leit bad ïeng harud ka jingthiah jong ka bad u la hukum ïa ka jingpang shit ban mihnoh na ka. Ka jingpang shit ka la iehnoh ïa ka, bad ka la khie joit shisyndon bad ka la sdang ban shakri ïa ki.
40Hadien ba la sep ka sngi, baroh kiba don ki paralok kiba pang na ki jait jingpang kiba pher bapher, ki la wallam ïa ki sha U Jisu; u la buh ïa la ki kti halor uwei pa uwei bad u la pynkhiah ïa ki baroh. 41Ki ksuid ruh ki la mihnoh na kiba bun ki briew, ki da lynñiar, “Me long U Khun jong U Blei!”
U Jisu u la hukum ïa ki ksuid bad um shah ïa ki ban kren, namar ba ki la ithuh ba u la long U Messaïah.
U Jisu u ïalap ha ki Synagog
(Mrk. 1:35-39)
42Tang shu kynjat shai, U Jisu u la mihnoh na shnong bad u la leit sha ka jaka bakynjah. Ki paidbah ki la sdang ban wad ïa u, bad haba ki la shem ïa u, ki la pyrshang ban pynsangeh ïa u na kaba leit noh. 43Hynrei u la ong ha ki, “Nga dei ban ïalap ïa ka Khubor Babha shaphang ka Hima U Blei ha kiwei pat ki shnong ruh, namar kata ka long kaei kaba U Blei u la phah ïa nga ban leh.”
44Kumta u la ïalap ha ki synagog ha kylleng ka ri.
Currently Selected:
LOUKAS 4: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
