ÏOANNIS 17

U Jisu u duwai na ka bynta ki synran jong u

1Hadien ba U Jisu u la dep ong ïa kane, u la khmied sha bneng bad u la ong, “Ko Pa, ka kynta ka la poi. To ai ka burom ïa la U Khun, ba U Khun un ïoh ban ai ka burom ïa me. 2Naba me la ai ha u ïa ka bor halor u bynriew baroh, khnang ba u lah ban ai ïa ka jingim bymjukut ha kito baroh ïa kiba me la ai ha u. 3Bad ka jingim bymjukut ka mut ban ithuh ïa me, U Blei bashisha tang ma u hi, bad kaba ithuh ïa U Jisu Khrist, ïa uba me la phah. 4Nga la pynpaw ïa ka burom jong me ha ka pyrthei; nga la pyndep ïa ka kam kaba me la ai ha nga ban leh. 5Ko Pa! To ai ka burom ïa nga ha khmat jong me mynta, kajuh ka burom kaba nga la don lem bad me ha shuwa ban pynlong ïa ka pyrthei.

6“Nga la pynithuh ïa me ha kito ïa kiba me la ai ha nga na ka pyrthei. Ki la long ki jong me, bad me la ai ïa ki ha nga. 7Ki la kohnguh ïa ka ktien jong me, bad mynta ki tip ba kaei kaei baroh kaba me la ai ha nga ka wan na me. 8Nga la ai ha ki ïa ka khubor kaba me la ai ha nga, bad ki la pdiang ïa ka; ki tip ba ka long kaba shisha ba nga la wan na me, bad ki ngeit ba me la phah ïa nga.

9“Nga duwai na ka bynta jong ki. Ngam duwai na ka bynta ka pyrthei hynrei na ka bynta kito ïa kiba me la ai ha nga, namar ki long ki jong me. 10Baroh kaba nga don ka long ka jong me, bad baroh kaba me don ka long ka jong nga; bad ïa ka burom jong nga la pynpaw lyngba jong ki. 11Bad mynta nga wan noh sha me; ngam don shuh ha kane ka pyrthei, hynrei ma ki, ki don ha ka pyrthei. Ko Pa Bakhuid! To ri kyndong ïa ki da ka bor ka kyrteng jong me, ka kyrteng kaba me la ai ha nga, ba kin ïoh long kawei kumba ma me bad nga ngi ïalong kawei. 12#Salm. 41:9; Ïoan. 13:18Mynba nga la don lem bad ki, nga la ri kyndong ïa ki da ka bor ka kyrteng jong me, ka kyrteng kaba me la ai ha nga. Nga la ïada ïa ki, bad ym don uwei ruh na ki uba la jah noh, lait tang u briew uba la dei ban jah — khnang ba ka Jingthoh Bakhuid kan urlong shisha. 13Bad mynta nga wan noh sha me, bad nga ong ïa kine kiei kiei ha ka pyrthei khnang ba kin lah ban ïoh ïa ka jingkmen jong nga ha ki dohnud jong ki ha ka jingdap pura baroh. 14Nga la ai ha ki ïa ka khubor jong me, bad ka pyrthei ka la shun ïa ki, namar ba kim dei jong kane ka pyrthei, kumba nga ruh ngam dei na kane ka pyrthei. 15Ngam kyrpad ba men shim noh ïa ki na ka pyrthei, hynrei nga da kyrpad ba men ri kyndong ïa ki na uta u bymman. 16Kumba ma nga ngam dei jong ka pyrthei, ma ki kim dei jong ka pyrthei. 17To pynkyntang ïa ki sha lade da kata ka jingshisha; ka ktien jong me ka long ka jingshisha. 18Nga la phah ïa ki sha ka pyrthei, kumba me la phah ïa nga sha ka pyrthei. 19Bad na ka bynta jong ki nga pynkyntang ïa lade sha me, khnang ba ma ki ruh, ki lah ban long kiba la ïoh pynkyntang da shisha sha me.

20“Nga duwai ym tang na ka bynta jong ki, hynrei na ka bynta kito ruh kiba ngeit ha nga namar ka khubor jong ki. 21Nga duwai ba ki baroh kin ïalong kawei. Ko Pa! To ai ba kin ïalong ha ngi, kumba me long ha nga bad ma nga ha me. To ai ba kin ïalong kawei, khnang ba ka pyrthei kan ngeit ba me la phah ïa nga. 22Nga la ai ha ki ïa kajuh ka burom kaba me la ai ha nga, khnang ba kin long kawei, kumba ma me bad nga ngi long kawei. 23Ma nga ha ki bad ma me ha nga, khnang ba ka pyrthei ka lah ban tip ba me la phah ïa nga bad ba me ieit ïa ki kumba me ieit ïa nga.

24“Ko Pa! Me la ai ïa ki ha nga, bad nga kwah ïa ki ba kin don bad nga ha kaba nga don, khnang ba ki lah ban ïohi ïa ka burom jong nga, ka burom ïa kaba me la ai ha nga; naba me la ieit ïa nga ha shuwa ban pynlong ïa ka pyrthei. 25Ko Pa Bahok! Ka pyrthei kam ithuh ïa me, hynrei nga ithuh ïa me, bad kine ki tip ba me la phah ïa nga. 26Nga la pynithuh ïa me ha ki, bad ngan ïai leh kumta, khnang ba ka jingieit kaba me don ïa nga kan ïoh long bad ki, bad kumta nga ruh ngan ïoh long bad ki.”

Currently Selected:

ÏOANNIS 17: KHACLBSI

Highlight

Copy