ÏOANNIS 18
18
Ka jingkem noh ïa U Jisu
(Mat. 26:47-56; Mrk. 14:43-50; Luk. 22:47-53)
1Hadien ba U Jisu u la lah ong ïa kane ka jingduwai, u la mihnoh bad la ki synran bad leit sha shiliang ka wahduid ba la khot ka Kidron. Ka la don ka kper ha kata ka jaka, bad U Jisu bad la ki synran ki la rung shapoh. 2U Judas, u nongshetkylla, u la tip ha-ei ka don, namar bunsien U Jisu u la ïakynduh hangta bad la ki synran. 3Kumta u Judas u la leit sha kata ka kper, u da ïalam bad u ïa ka kynhun ki shipai Rom, bad katto katne ki nongap phira jong ka Templ ïa kiba la phah da ki rangbah lyngdoh bad ki Pharisi; ki la long kiba la kieng atiar bad ki la rah ïa ki sharak bad ki dongmusa. 4U Jisu u la tip ïa kaei kaei baroh ka ban sa jia ïa u, kumta u la tur sha khmat bad u la kylli ïa ki, “Ïano phi ïawad?”
5“U Jisu uba na Nasareth,” ki la jubab.
“Dei ma nga” u la ong.
U Judas, u nongshetkylla, u la ïeng hangta ryngkat bad ki. 6Haba U Jisu u la ong ha ki, “Dei ma nga uta,” ki la kynriah shadien bad ki la kyllon ha madan. 7U Jisu u la kylli biang ïa ki, “Ïano phi ïawad?”
“U Jisu uba na Nasareth,” ki la ong.
8“Nga la lah ïathuh ha phi ba dei ma nga uta,” U Jisu u la ong. “Te, lada phi ïawad ïa nga, shah ba kine kiwei kin leit noh.” 9(U la ong ïa kane khnang ba ïa kaei kaba u la lah ong kan urlong shisha: “Ko Pa, ngam shym la duh noh wat uwei ruh na kita ïa kiba me la ai ha nga.”)
10U Simon Petros, uba kieng ïa ka waitlam, u la sei ïa ka bad u la pom ïa u mraw jong u Rangbah Lyngdoh, u da mait ïa ka shkor kamon jong u. Ka kyrteng uta u mraw ka long u Malkhos. 11#Mat. 26:39; Mrk. 14:36; Luk. 22:42U Jisu u la ong ha u Petros, “To bsuh noh ïa ka waitlam ha ka jingsop jong ka! Me tharai ba ngan ym dih ïa ka khuri ka jingshah shitom ïa kaba U Kpa jong nga u la ai ha nga?”
U Jisu ha khmat u Annas
12Nangta ki shipai Rom lem bad u rangbah shipai jong ki bad ki nongap phira jong ki Jiw, ki la kem ïa U Jisu, ki la khum ïa u, 13bad ki la ïalam ïa u nyngkong sha u Annas. U la long u kthaw kurim jong u Kaïaphas, uba long u Rangbah Lyngdoh ha kata ka snem. 14#Ïoan. 11:49,50Dei u Kaïaphas uba la ai jingmut ïa ki nongsynshar jong ki Jiw ba ka kham bha ba uwei u briew un ïap na ka bynta ka briew baroh.
U Petros u len ïa U Jisu
(Mat. 26:69-70; Mrk. 14:66-68; Luk. 22:55-57)
15U Simon Petros bad uwei pat u synran ki la bud ïa U Jisu. Uta uwei u synran u la long uba la ïa-ithuh bha bad u Rangbah Lyngdoh, kumta u la leit rung lem bad U Jisu sha ka phyllaw ïing jong u Rangbah Lyngdoh, katba u Petros pat u la ïeng shabar hajan ka khyrdop. 16Nangta uta uwei pat u synran u la mih biang shabar, u la ïakren bad ka khynnah ha ka khyrdop, bad u la ïalam ïa u Petros shapoh. 17Kata ka khynnah ha ka khyrdop ka la ong ha u Petros, “Hato me ruh mem dei uwei na ki synran jong utai u briew?”
“Em, ngam dei,” la jubab u Petros.
18Ka la long kaba khriat, kumta ki shakri bad ki nongap phira ki la thang ding da u rnga bad ki la ïeng sawdong jong ka, ban pynsyaid ïa lade. Te u Petros u la leit shata bad u la ïa-ïeng bad ki, ban pynsyaid ïa lade.
U Rangbah Lyngdoh u kylli jingkylli ïa U Jisu
(Mat. 26:59-66; Mrk. 14:55-64; Luk. 22:66-71)
19U Rangbah Lyngdoh u la kylli ïa U Jisu shaphang ki synran jong u bad shaphang ka jinghikai jong u. 20U Jisu u la jubab, “Nga la ju kren ha kaba paw ha baroh; ki jinghikai jong nga baroh ki la long ha ki synagog bad ha ka Templ, ha kaba ki briew baroh ki ïawanlang. Ngam ju ong ïa kano kano ha kaba rieh. 21Balei, te, ba phi kylli jingkylli ïa nga? To kylli na kita ki briew kiba la ïohsngew ïa nga. Kylli na ki aïu nga la ïathuh ïa ki — ki tip ïa kaei kaba nga la ong.”
22Haba U Jisu u la ong ïa kane, uwei na ki nongap phira hangta u la thab ïa u bad u la ong, “Kumno me nud ban kren kum kata ïa u Rangbah Lyngdoh?”
23U Jisu u la jubab ïa u, “Lada nga la kren ïa kano kano kaba bakla, to ïathuh ïa baroh hangne ka dei kaei. Hynrei lada ka long kaba dei ha kaei kaba nga la ong, balei ba me da thab ïa nga?”
24Te u Annas u la phah noh ïa u, uba dang shah khum, sha u Kaïaphas u Rangbah Lyngdoh.
U Petros u len biang ïa U Jisu
(Mat. 26:71-75; Mrk. 14:69-72; Luk. 22:58-62)
25U Petros u dang ïeng hangta ban pynsyaid ïa lade. Kumta kiwei pat ki la ong ha u, “Hato me ruh mem dei uwei na ki synran jong uta u briew?”
Hynrei u Petros u la len ïa kata. “Em, ngam dei,” u la ong.
26Uwei na ki mraw jong u Rangbah Lyngdoh, uba don jingïadei bad u briew ïa uba u Petros u la lah mait ïa ka shkor jong u, u la kren. “Hato ngam shym la ïohi ïa me bad u ha kata ka kper?” u la kylli.
27U Petros u la ong biang “Em” — bad mar kumta u syiar u la kyn-ih.
La wallam ïa U Jisu ha khmat U Pilat
(Mat. 27:1-2,11-14; Mrk. 15:1-5; Luk. 23:1-5)
28Dang step phyrngab la ïalam ïa U Jisu na ka ïing u Kaïaphas sha ka ïing jong u lyngskor. Ki nongsynshar jong ki Jiw kim shym la rung shapoh ka ïing, naba ki kwah ban sumar khuid ïa lade kat kum ka jinglehniam, khnang ba ki lah ban bam ïa ka Jingkhawai Niam Ka Jinglait. 29Kumta u Pilat u la leit shabar sha ki bad u la kylli, “Phi ïamudui aïu ïa une u briew?”
30Ka jubab jong ki ka la long, “Ngin ym da la wallam ïa u sha phi lada um shym la leh ïa ka kam runar.”
31U Pilat u la ong ha ki, “Te phi hi da lade to shim ïa u bad bishar ïa u kat kum ka hukum jong phi hi.”
Ki la jubab, “Ngim donbor ban rai pynïap ïano ïano.” 32#Ïoan. 3:14; 12:32(Kane ka la jia, khnang ba ki ktien jong U Jisu kin urlong da shisha, ki ktien kiba u pyndonkam mynba u la pynpaw ïa ka jingïap kaba kumno u dei ban ïap.)
33U Pilat u la rung pat sha ka ïing bad u la khot ïa U Jisu. “Hato me long u syiem jong ki Jiw?” u la kylli ïa u.
34U Jisu u la jubab, “Hato kane ka jingkylli ka wan na me ne kiwei ki la ïathuh ïa me shaphang jong nga?”
35U Pilat u la phai ktien, “Me tharai nga dei u Jiw? Dei ki briew jong me hi bad ki rangbah lyngdoh kiba la aiti ïa me sha nga. Kaei kaba me la leh?”
36U Jisu u la ong, “Ka Hima jong nga kam long na ka jong kane ka pyrthei, lada ka hima jong nga ka la long na ka jong kane ka pyrthei, ki nongbud jong nga kin jin da la ïaleh ban ïada ïa nga na kaba aiti ha ki nongsynshar jong ki Jiw. Em, ka hima jong nga kam long hangne!”
37Kumta u Pilat u la kylli ïa u, “Haba kumta, me, me dei u syiem?” U Jisu u la jubab, “Me hi me ong ba nga long u syiem. Ïa nga la kha bad nga la wan sha ka pyrthei na ka bynta kane kawei ka jingthmu, ban kren shaphang ka jingshisha. Uno uno uba dei jong ka jingshisha u shahshkor ïa nga.”
38“Bad kaei kata ka jingshisha?” u Pilat u la kylli.
La rai pynïap ïa U Jisu
(Mat. 27:15-31; Mrk. 15:6-20; Luk. 23:13-25)
Nangta u Pilat u la mihpat shabar sha ki paidbah bad u la ong ha ki, “Ngam lap kano kano ka daw ban pynrem ïa u. 39Hynrei kat kum ka rukom kaba phi don, nga ju pyllait ïa u koidi ha phi ha ka por ka Jingkhawai Niam Ka Jinglait. Phi kwah ïa nga ba ngan pyllait ha phi ïa u syiem ki Jiw?”
40Ki la jubab ïa u da kaba pyrta jam, “Em, ym dei ïa u! Ngi kwah ïa u Barabbas!” (u Barabbas u la long u nongkamsniew.)
Currently Selected:
ÏOANNIS 18: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
