ÏOANNIS 19
19
1Te u Pilat u la shim ïa U Jisu bad u la phah sympat ïa u. 2Ki shipai ki la thaw ïa ka pansngiat da ki tnat ba don shiah bad ki la pynphong halor ka khlieh jong u; nangta ki la pynkup ïa ka jaiñ sawbthuh ha u bad ki la wan sha u bad ki la ong, 3“Im slem ko Syiem ki Jiw!” Bad ki la leit bad thab ïa u.
4U Pilat u la mih shabar sa shisien bad u la ong ha u paidbah, “Ha khmih, ngan wallam shabar ïa u hangne ha phi ba phin lah ban ïohi ba ngam lap daw ei ei ïa ka ban pynrem ïa u.” 5Kumta U Jisu u la mih shabar, da kaba phong ïa ka pansngiat shiah bad kup da ka jaiñkup kaba sawbthuh. U Pilat u la ong ha ki, “Khmih! hangne uta u briew!”
6Haba ki rangbah lyngdoh bad ki nongap phira jong ka Templ ki la ïohi ïa u, ki la pyrta jam, “Sahnarphna ïa u! Sahnarphna ïa u!”
U Pilat u la ong ha ki, “Shim noh ma phi ïa u, te, bad sahnarphna ïa u. Ngam lap daw ei ei ïa ka ban pynrem ïa u.”
7U paidbah u la phai ktien, “Ngi don ka hukum kaba ong ba u dei ban ïap, namar u la kam ba u long U Khun U Blei.”
8Haba u Pilat u la ïohsngew ïa kane, u la kham sheptieng shuh shuh. 9U la leit pat sha ïing bad u la kylli ïa U Jisu, “Nangno me wan?”
Hynrei U Jisu um shym jubab. 10U Pilat u la ong ha u, “Mem kren ei ei ha nga? To kynmaw, nga don ka bor ban pyllait ïa me bad ruh ban phah sahnarphna ïa me.”
11U Jisu u la jubab, “Me don ka bor halor jong nga tang namar ba la ai ha me da U Blei. Kumta u briew uba aiti noh ïa nga ha me u long uba la rem na ka pop kaba kham khraw.”
12Haba u Pilat u la ïohsngew ïa kane, u la pyrshang ban thaw lad ban pyllait ïa U Jisu. Hynrei u paidbah u la pyrta biang, “Lada me pyllait ïa u, kata ka mut ba mem dei u paralok jong u Patsha! Uno uno uba kam ba u dei u syiem u long u nongïaleh pyrshah ïa u Patsha!”
13Haba u Pilat u la ïohsngew ïa kine ki ktien, u la ïalam shabar ïa U Jisu bad u la shong halor ka khet u nongbishar ha ka jaka ba la khot “Kaba la Siang Maw.” (Ha ka ktien Hebru ka kyrteng ka long “Gabbatha.”) 14Ka la long la jan shiteng sngi shuwa ka Jingkhawai Niam Ka Jinglait. U Pilat u la ong ha ki briew, “Une u syiem jong phi!”
15Ki la pyrta biang, “To pynïap noh ïa u! Pynïap noh ïa u! Sahnarphna ïa u!” U Pilat u la kylli ïa ki, “Phi kwah ïa nga ba ngan sahnarphna ïa u syiem jong phi?”
Ki rangbah lyngdoh ki la jubab, “U syiem uba ngi don u dei tang u Patsha!”
16Te u Pilat u la aiti noh ïa U Jisu sha ki ïa ka ban sahnarphna. Kumta ki la shimti noh ïa U Jisu.
La sahnarphna ïa U Jisu
(Mat. 27:32-44; Mrk. 15:21-32; Luk. 23:26-43)
17U la mihnoh, u da bah ïa la ka diengphna, bad u la wan poi sha ka jaka ba la khot “Ka jaka Maloi Khlieh”, kumba la khot ïa ka. (Ha ka ktien Hebru la khot “Golgotha”). 18Hangta ki la sahnarphna ïa u; bad ki la sahnarphna ruh ïa ki ar ngut kiwei pat ki rangbah, uwei ha kawei kawei ka liang bad U Jisu hapdeng jong ki. 19U Pilat u la thoh ïa ka jingthoh bad la phah wah halor ka diengphna. “U Jisu u nong Nasareth, U Syiem ki Jiw”, ka long kaei kaba u la thoh. 20Shibun ki briew ki la pule ïa ka, namar ka jaka ha kaba la sahnarphna ïa U Jisu kam da jngai na ka nongbah. Ka jingthoh ka la long ha ki ktien Hebru, Latin bad Grik. 21Ki rangbah lyngdoh ki la ong ha u Pilat, “Wat ym thoh, ‘U Syiem ki Jiw,’ hynrei pynban, ‘Une u briew u la ong, nga long u Syiem ki Jiw.’ ”
22U Pilat u la jubab, “Ïa kaei kaba nga la thoh, la thoh.”
23Ynda haba ki shipai ki la lah sahnarphna ïa U Jisu, ki la ïashim ïa ki jaiñ jong u bad ki la ïabynta ha ki saw bynta, kawei ka bynta ïa uwei uwei u shipai. Ki la ïashim ruh ïa ka jaiñkup, ïa kaba la pynlong tang na kawei ka lyngkhot jaiñ ba la thain khlem kano kano ka jingsuh ha ka. 24#Salm. 22:18Ki shipai ki la ong para ma ki, “To ngin ym tar pynkad ïa ka, to ngin ïakynting sbai ban shem mano ba ïoh ïa ka.” Kane ka la jia khnang ba ka Jingthoh Bakhuid kan urlong shisha: “Ki la pynïabynta ïa ki jaiñ jong nga hapdeng jong ki bad ki la ïakhalai ïa ka jaiñkup jong nga.” Kane ka long kaei kaba ki shipai ki la leh. 25Kiba la ïa-ïeng ha syndah ka diengphna U Jisu ki la long ka kmie jong u, ka para jong ka kmie jong u, ka Mari ka tnga u Kleopas, bad ka Mari ka nong Magdala. 26U Jisu u la ïohi ïa la ka kmie bad ïa u synran ïa uba u ieit ba ki ïa-ïeng hangta; te u la ong ha la ka kmie, “Une u long u khun jong phi.”
27Nangta u la ong ha uta u synran, “Kane ka long ka kmie jong me.” Naduh kata ka por uta u synran u la ïalam ïa ka ban sah noh ha ka ïing jong u.
Ka jingïap U Jisu
(Mat. 27:45-56; Mrk. 15:33-41; Luk. 23:44-49)
28 #
Salm. 69:21; 22:15 U Jisu u la tip ba mynta la pyndep ïa kiei kiei baroh; bad khnang ban pynlong ïa ka Jingthoh Bakhuid ban urlong shisha, u la ong, “Nga sliang.”
29La don ka pliang hangta, kaba dap da ka waiñ ka bym bha; kumta la wieh ïa spoiñ ha ka waiñ, la teh ha ka khum Hissop, bad la kyntiew ha ki rmiang shyntur jong u. 30U Jisu u la dih ïa kata ka waiñ bad u la ong, “La pyndep!”
Nangta u la noh lyngngeh la ka khlieh bad u la ïap.
La sum ïa ka krung U Jisu
31Nangta ki nongsynshar jong ki Jiw ki la pan na u Pilat ban shah ïa ki ban pynkheiñ ïa ki kjat jong kita ki briew kiba la shah sahnarphna, bad ban pynhiar noh ïa ki met jong ki na ki diengphna. Ki la kyrpad ïa kane namar ba ka la dei ka Sngi Thohdieng, bad kim kwah ba ki met kin sah kumta ha ki diengphna ha ka sngi Sabbaton, naba ka sngi Sabbaton ka long kyrpang kaba khuid. 32Kumta ki shipai ki la leit bad pynkheiñ ïa ki kjat jong uta uba nyngkong bad nangta sa ïa ki jong uwei pat kiba la shah sahnarphna lem bad U Jisu. 33Hynrei haba ki la wan sha U Jisu, ki la ïohi ba u la lah ïap lypa, kumta kim shym la pynkheiñ ïa ki kjat jong u. 34Pynban uwei na ki shipai, u la dung da u sum jong u na ka krung jong U Jisu, bad mar kumta ka snam bad ka um ka la mih shabar. 35(Uta uba la ïohi ïa kane ba ka jia u la kren shaphang jong ka, khnang ba ma phi ruh phin ïoh ngeit. Kaei kaba u la ong ka long kaba shisha, bad u tip ba u kren ïa ka jingshisha.)
36 #
Eks. 12:46; Jkhñ. 9:12; Salm. 34:20 Ïa kane la leh ban pynurlong ïa ka Jingthoh Bakhuid: “Yn ym pynkheiñ ïa kawei ruh na ki shyieng jong u.” 37#Sekh. 12:10; Jpw. 1:7Bad don sa kawei pat ka Jingthoh Bakhuid kaba ong, “Ki briew kin ïakhmih ïa uta ïa uba ki la sum.”
Kaba tep ïa U Jisu
(Mat. 27:57-61; Mrk. 15:42-47; Luk. 23:50-56)
38Hadien kane, u Joseph, uba na ka shnong Arimathaïa, u la pan na u Pilat lada un shah ban rah ïa ka met U Jisu. (U Joseph u la long u nongbud jong U Jisu, hynrei ym ha kaba paw, namar ba u la sheptieng ïa ki nongsynshar jong ki Jiw.) U Pilat u la ong ïa u ba u lah ban rah ïa ka met, kumta u Joseph u la leit bad rah noh ïa ka. 39#Ïoan. 3:1,2U Nikodemos, uba ha kaba nyngkong u la leit ban ïakynduh ïa U Jisu mynmiet, u la leit ryngkat bad u Joseph, u da rah bad u kumba laiphew kilo ki musla, ka jingkhleh lang jong ka mirr bad ka alos. 40Kine ar ngut ki rangbah, ki la shim ïa ka met U Jisu bad ki la sop ïa ka da ki jaiñ linen lem bad ki musla kat kum ka rukom ki Jiw haba pynkhreh ïa ka met shuwa ban tep. 41Ka la don ka kper ha kata ka jaka ha kaba la pynïap ïa U Jisu, bad ha kata ka kper la don ka jingtep kaba thymmai ha kaba ym pat shym la tep ïano ïano. 42Te naba ka la long ka sngi shuwa ka Sabbaton bad namar ba ka jingtep ka don ha syndah, ki la buh ïa ka met U Jisu hangta.
Currently Selected:
ÏOANNIS 19: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
