ÏOANNIS 16
16
1“Nga la ïathuh ha phi ïa kane, khnang ba phin ym iehnoh ïa ka jingngeit jong phi. 2Phin shah beh noh na ki synagog, bad ka por kan poi haba uno uno uba pynïap ïa phi un pyrkhat ba da kaba leh kumta u shakri ïa U Blei. 3Ki briew kin leh ïa kine kiei kiei ïa phi namar ba kim pat ithuh ïa U Kpa lymne ïa nga. 4Hynrei nga la ïathuh ha phi ïa kane, ba haba ka por ka poi ïa ki ban leh ïa kine kiei kiei, phin sa kynmaw ba nga la ïathuh ïa phi.
Ka jingtrei jong U Mynsiem Bakhuid
“Ngam shym la ïathuh ha phi ïa kine kiei kiei ha kaba mynnyngkong, naba nga la don lem bad phi. 5Hynrei mynta ngan leit noh sha uta uba la phah ïa nga, pynban ym don uwei ruh na phi uba kylli ïa nga shaei ba ngan leit. 6Bad mynta ba nga la ïathuh ïa phi, ki dohnud jong phi ki la dap da ka jingsngewsih. 7Hynrei nga ïathuh ha phi ïa ka jingshisha: Ka kham bha ïa phi ba nga leit noh, namar lada ngam leit noh, U Nongïarap un ym wan sha phi. Hynrei lada nga leit noh, te ngan phah ïa u sha phi. 8Bad haba un wan, un pynshisha ïa briew jong ka pyrthei ba ki bakla shaphang ka pop bad shaphang kaei kaba dei bad shaphang ka jingbishar jong U Blei. 9Ki bakla shaphang ka pop, namar ba kim shym la ngeit ha nga; 10ki bakla shaphang kaei kaba dei, namar ba ngan leit sha U Kpa bad phin ym ïohi shuh ïa nga; 11bad ki bakla shaphang ka jingbishar, namar ba ïa u nongsynshar jong kane ka pyrthei la lah bishar.
12“Nga dang don shibun kiei kiei ban ong ha phi, hynrei mynta kan long palat eh ïa phi ban shah. 13Pynban, haba U Mynsiem un wan, uba pynpaw ïa ka jingshisha shaphang U Blei, un ïalam ïa phi sha ka jingshisha baroh. Un ym kren ha ka bor jong u hi, hynrei un kren ïa kaei kaba u ïohsngew, bad un ïathuh ha phi ïa kiei kiei ki ban sa wan. 14Un ai burom ïa nga, namar un shim ïa kaei ba nga ong bad ïathuh ïa ka ha phi. 15Baroh kaba U Kpa jong nga u don ka long ka jong nga; na kata ka daw nga la ong ba U Mynsiem un shim ïa kaei kaba nga ai ha u bad ïathuh ïa ka ha phi.
Ka jingsngewsih bad ka jingkmen
16“Sa tang shipor phin ym ïohi shuh ïa nga, bad nangta sa shipor hadien phin sa ïohi ïa nga.”
17Katto katne ngut na ki synran jong u ki la ïakylli para ma ki, “Ka mut aïu kane? U ïathuh ïa ngi ba sa tang shipor ngin ym ïohi shuh ïa u; bad nangta sa shipor hadien ngin sa ïohi ïa u; bad u ong ruh, ‘Ka long namar ba ngan sa leit noh sha U Kpa.’ 18Ka mut aïu kane ‘sa tang shipor?’ Ngim tip ba u kren shaphang kaei!”
19U Jisu u la tip ba ki la kwah ban kylli ïa u, kumta u la ong ha ki, “Nga la ong, ‘Sa tang shipor phin ym ïohi shuh ïa nga, bad nangta sa shipor hadien phin sa ïohi ïa nga.’ Hato dei kane kaba phi ïakylli para ma phi hi? 20Nga ong ha phi ïa ka jingshisha: Phin ïam bad phin ïamkthang, hynrei, ka pyrthei kan shadkmen; phin ïasngewsih, hynrei ka jingsngewsih jong phi kan kylla sha ka jingkmen. 21Haba ka briew kan sa kha khun, ka sngewsih namar ba ka kynta jong ka jingshahshitom jong ka, ka la poi; hynrei haba la kha ïa i khunlung, ka klet noh ïa la ka jingshah shitom, namar ka kmen ba la kha ïa i khunlung sha ka pyrthei. 22Kumta kan long bad phi: Mynta phi ïasngewsih, hynrei ngan sa wan khmih pat ïa phi, bad ki dohnud jong phi kin dap da ka jingkmen; ka jingkmen kaba yn ym don uba lah ban shim noh na phi.
23“Haba kata ka sngi ka poi, phin ym pan ei ei na nga. Nga ïathuh ha phi ïa ka jingshisha: U Kpa un ai ha phi ïa kaei kaei kaba phi pan na u ha ka kyrteng jong nga. 24Haduh mynta phim ju pan ei ei ha ka kyrteng jong nga; to pan bad phin ïohpdiang, khnang ba ka jingkmen jong phi kan ïoh long kaba dap pura.
Ka jingjop ïa ka Pyrthei
25“Nga la pyndonkam da ki rukom kren bapher ban ïathuh ïa phi ïa kine kiei kiei. Hynrei ka por kan poi haba ngan ym pyndonkam ïa ki rukom kren bapher, hynrei ngan kren ha phi da kaba shai kdar shaphang U Kpa. 26Haba kata ka sngi kan poi, phin pan na u ha ka kyrteng jong nga; bad ngam ong ba ngan pan na u na ka bynta jong phi, naba U Kpa da lade hi u ieit ïa phi. 27U ieit ïa phi namar ba phi ieit ïa nga bad ba phi la ngeit ba nga la wan na U Blei. 28Nga la wan na U Kpa, bad nga la wan sha ka pyrthei; bad mynta ngan sa iehnoh ïa ka pyrthei bad ngan leit sha U Kpa.”
29Nangta ki synran jong u ki la ong ha u, “Mynta te me kren shai kdar, khlem pyndonkam ïa ki rukom kren bapher. 30Ngi tip mynta ba me tip ïa kiei kiei baroh; mem da donkam ba uno uno un kylli jingkylli ïa me. Kane ka pynlong ïa ngi ban ngeit ba me la wan na U Blei.” 31U Jisu u la jubab ïa ki, “Hato phi ngeit mynta? 32Ka por kan poi, bad ka la lah long mynta, haba ïa phi baroh yn sa pynsakma, uwei pa uwei sha la ka jong ka ïing, bad ngan shah iehnoh tang marwei. Hynrei ngam long shisha marwei, namar U Kpa u long lem bad nga. 33Nga la ïathuh ha phi ïa kane khnang ba phin ïoh ïa ka jingsuk da kaba phi long lem bad nga. Ka pyrthei kan pynlong ïa phi ban shahshitom. Hynrei to long shlur! Nga, nga la jop ïa ka pyrthei!”
Currently Selected:
ÏOANNIS 16: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.