MARKA 14

1Ni hnih hnuah lanhtâk thô le thilnu cawhlo thô a um lai. Tlângbawi hna le nawlbia cawnpiaktu hna nih hlennâk hmangin Amah cu an thah khawh nâkhnga khua an khâng. 2Asinain thô lioah cun si hlahseh, culoahcun zatlâng buainâk a chuak sual lai, tiah an ti. 3Cun Bethani khua, thinghmui pa Simon in i rawl a dum lioah, minu pakhat lungrang thawlin Spiknard sathau a rim a hmui ngaimi le manfak ngaimi he a ra, a thawl kha khuai in alu ah a tawih. 4Asinain an lak i mi cheukhat an thin a hung, zeiruangahdah hi rimhmuimi sathau hi a sawksâm? 5Zeitintiah zuar sehlaw ngamu zathum man a si i misifak phawtah a ṭhadeuh lo maw, tiah an zai hnawh. 6Asinain Jesuh nih, “Dai tein umter u. Zeiruangahdah nan zai hnawh, ka cungah thilṭha ngai a tuah. 7Zeitintiah mi sifak cu nan sinah an um peng ko lai, nan duh cân pauh ah nan bomh khawh ko hna, kei tu cu nan sinah ka um peng lai lo. 8A tuah khawhtawk a tuah i ka taksa hi vui dingin sathau a rak thuh ciami a si, tiah a ti. 9Biataktein kan chimh hna, vawlei dihlak thawngṭha an chimnâk pauh ah hi minu tuahmi zong hi amah philh lo nâkah an chim ve lai,” tiah a ti. 10Cun hleihnih lak i pakhat Judas Iskariot cu Jesuh rawi duhah tlângbawi sinah a kal. 11Cu kong an theih tikah an i lawm i a sinah phaisa pêk awkah bia an kamh. Cuticun rawinâk cân rem kha a ngiat. 12Cubangin thilnu cawhlo changreu thô, ni hmasabik, lantâk thô ca i tuu an thah tawn ni ah lamkaltu hna nih, “Lanhtâk thô rawl ei nâk dingah khuazeiahdah in tuahpiak ning law na duh?” tiah an ti. 13A lamkaltu hna lakah mi pahnih a thlah hna i, “Khuapi ah va lut ulaw, bel in ti a thanmi pa nih an ton hna lai, amah kha nan zulh lai. 14A luhnâk inn ngeitu sinah, “Ka lamkaltu hna he lanhtâk thô rawl kan dum`inâk ding khual umnâk khân cu khuazeiahdah a si,” tiah nan hal lai. 15Cuticun anih nih inn cungdot kaupi thil vialte tling tein timhlamh cangmi kha an hmusak hna lai, cucu timhcia tein nan umter lai,” tiah a ti. 16A lamkaltu hna cu an kal i khuapi ah an lut, an sin i a rak chimningte khan an hmuh i lanhtâk thô rawl kha an timhlamh. 17Zanlei a si tikah hleihnih hna he an va kal. 18Cubangin rawl ei i an ṭhut ko lioah Jesuh nih, “Biataktein kan chimh hna, ka sin i rawl a eimi lakah mi pakhat nih nan ka rawi lai,” tiah a ti. 19An ngaih a chia tuk hringhran i pumpâk cio in, “Keimah hi ka si maw?” tiah an ti cio. Midang zong nih, ‘Keimah maw, ka si,’ tiah an ti ve. 20Anih nih, “Hleihnih lak i pakhat, kheng a ka hrawmtu hi a si. 21Mi Fapa hi a kong an rak ṭial cang bantukin a kal lai, Mi Fapa rawitu pa cu ngaihchia a va si dah! Cu mipa cu chuak loin rak um sehlaw a caah a ṭha deuh lai,” tiah a ti. 22Cun rawl an ei lioah, Jesuh nih changreu kha a lâk, thluachuah a pêk hnuah a cheu i an sinah a pek, “La ulaw, ei u; hihi ka taksa a si,” tiah a ti. 23Hrai zong kha a lâk i lawmhnâk bia a chim dih in an sinah a pêk i an dihlak in an din. 24Anih nih, “Hihi ka thisen i biakam thar, mi tampi ca i a chuak hngami cu a si. 25Biataktein kan chimh hna, “Pathian pennâk ah a thar in ka din cân a phâk hlan tiang misur hang hi ka ding ti lai lo,” tiah a ti. 26Cun hla an sak dihin an chuak i Oliv tlângah an kal. 27Jesuh nih, “Tuzan ah keimah ruangah nan dihlakin nanka tluktâk dih lai, hitihin ṭial arak si cang kha, ‘Tukhâl kha ka velh lai i tuurun kha an i ṭhek dih lai,’ tiin. 28Asinain thawhter ka si hnuah nan hmaiah Galili ah ka kal lai,” tiah a ti. 29Peter nih, “An dihlakin an tlukdih hmanh ah, ka tlu lai lo,” tiah a ti. 30Jesuh nih, “Biataktein kan chimh ni hin ah, tuzan hmanh ah, ar voihnih khuan hlan hmanh ah, voithum naka hlawt lai,” tiah a ti. 31Asinain anih nih uar ngaiin, “Na thihnâk ah thi ve hmanhninglaw kan hlawt lai lo,” tiah a ti. An dihlakin cu bangin an ti cio. 32Cun hmun pakhat Gethsemani an timi kha an phân i lamkaltu hna sinah, “Thla ka va cam lioah hika hin rak ṭhu u,” tiah a ti. 33Peter le Jeim le Johan kha a kalpi hna. Anih cu a thin a phâng i a awlawk a chong. 34Cuticun an sinah, “Ka thlarau a ngaih a chia tuk hringhran i thihpi tlâk a si. Hika ah um in ralring tein um u. 35Hmailei ah tlawmpal a va kal i vawlei ah a bawk, a si khawh ahcun cu cân nih a lanhtâk khawh nâkhnga thla a cam. 36“Abba, ka Pa, zeizong vialte hi na caah a si kho ko. Hi hrai hi ka sinin la ko, asinain keimah duhnâk si loin, nangmah duhnâk bang siseh,” tiah a ti. 37A rak kir i an i hngilh kha a hmuh hna, Peter sinah, “Simon, nâ hngilh maw? suimilam pakhat hmanh nâ ralring kho lo maw? 38Tukforhnâk i nan luhnâk hnga lo, ralring tein thla cam u. Thlarau nih a duh i taksa cu a der,” tiah a ti. 39A kal ṭhân i a hal bon kha hal in thla a cam ṭhân. 40A rak kir ṭhân i an i hngilh kha a hmuh ṭhân hna. An mit a ku tuk hringhran i hun leh awk zong an hngal lo. 41A voithumnâk i a rak kir ṭhân tikah, nan i hngilh peng i nan i din ko rih maw? A za cang a cân a phân cang: Mi Fapa hi misual kutah tlaihter a si cang lai. 42Tho ulaw, kal hna usih. Zohhmanh u a ka rawitu ding a nai cang. 43A chim lioah, Judas, hleihnih lak i pakhat cu, tlângbawi hna le nawlbiacawnpiaktu hna le upa hna lak i a rami, vainam le tanbo â rak putmi mitampi he an rak phân. 44A rawitu pa nih hmelchunhnâk a rak pêk cang hna, “Ka hnamhmi pauh amah a si lai, nan tlaih lai i him tein lodiam nan kalpi lai,” tiah a rak ti hna. 45A rak phâk le cângkâ, amah kha a panh cawlh i, “Rabbi, Rabbi,” tiah a hnamh. 46Cuticun an tlaih i an kalpi cawlh. 47A pawng i a dirmi lakah pakhat nih vainam â zuh i tlângbawi nganbik sinum a hna pet lakin a tuk. 48Jesuh nih, “Damiah tlaih ding bantukin vainam le tanbo he maw nan rat? 49Ṭempal ah nichiarte nan sinah cawnpiak in ka um tawn i nan ka tlai fawn lo. Asinain Cathiang a tlin khawh nâk ding caah a si,” tiah a ti hna. 50An dihlakin amah kha an kaltâk i an zâm. 51Cubangin tlangval pakhat khiangrang puan lawng i ngaih in a zulh ve i cu pa cu tlangval dang nih an rak tlaih i 52a khiangrang puan kaltâk in taklawng in a tli. 53Jesuh cu tlângbawi nganbik inn ah an kalpi, cun tlângbawi hna le nawlbiacawnpiaktu hna le upa vialte kha an i pum. 54Peter nih hla nawn khin tlangbawi nganbik inntual tiangin a zulh i sinum hna sinah mei a to. 55Cubangin tlângbawi hna le biaceihtu vialte nih Jesuh thahnâk dingah a sualnâk an kawl, asinain a sualnâk an hmu kho lo. 56Zeitintiah mi tampi nih lih in sual an puh lengmang, asinain sual an puhnâk kha â ralchanh leng mang. 57Cuticun mi zeimaw, an rak dir i lih in, hitihin a sual an rak kawl. 58Hipa nih hin, “Hi ṭempal kut in sakmi hi ka ṭheh lai i nithum chungah a dang, kut in sak lomi ka dirh ṭhân lai, a timi kan theih,” tiah an ti. 59Asinain sual an puhnâk cu ai rem kho lo. 60Tlângbawi nganbik cu a laiah a dir i Jesuh sinah, “Zeihmanh na let hna lo maw? Hi hna nih hin zeiruangahdah na sual an kawl? tiah a hal. 61Anih cu dai tein a um, kâ khat hmanh in a let lo. Tlângbawi nganbik nih, “Krih, Thangṭhat tlak Fapa cu na si maw?” tiah a hal. 62Jesuh nih, “Aw, ka si, Mi Fapa hi a ṭhawngmi orhlei ah ṭhu in, khuadawm lak i a rat kha na hmuh te lai,” tiah a ti. 63Cuticun tlângbawi ngan nih a hnipuan a thleh i, “Theihpitu dang zeidah kan herh ti lai? 64( Pathian)cawhdehnâk bia nan theih cang! Zeitindah nan ruah? tiah a ti. An dihlak in Amah cu thih awkah â tlak tiin thiamlo an coter. 65Cheukhat nih cil an châk i a hmai an tuam i an thongh, “Holh ngat, tiah hotu hna nih an bengh. 66Cubangin Peter cu tanglei tualrawn i a um lioah tlângbawi sinum ngaknu lakah pakhat a ra. 67Peter nih mei a toh ko kha a hmuh i, “Nang zong hi Nazaret Jesuh sin i a ummi kha na si,” tiah a ti. 68Anih nih, “Na bia chim cu ka thei lo, a ruah awk hrim ka thiam lo tiah, a hlawt. Inleng ah a va chuak i ar a khuang cawlh. 69Cun ngaknu nih a hmuh ṭhân, a pawng i a ummi hna sinah, “Hipa hi anmah lak i a ummi a si,” tiah a ti. 70Asinain â pheh ṭhân. A rauh hlanah a pawng i a ummi hna nih Peter sinah, “An lak i a ummi na si ve ko, na aw cawiin Galili mi na si ti a fianter ko,” tiah an ti. 71Anih nih, “Cu minung nan chimmi cu ka hngal hrimhrim lo,” tiin chiat i serh in a chim. 72A voihnihnâk ah ar cu a khuang ṭhân, Cuticun Peter nih a sinah Jesuh nih, “Ar voihnih a khuan hlanah, voithum naka hlawt lai,” a timi kha a hun hngalh i cucu ruat in a ṭap.

Currently Selected:

MARKA 14: HAKABSI

Highlight

Copy