MARKA 15

1A thaizing zingka te ah, tlângbawi hna le upa hna, nawlbiacawnpiaktu hna le biaceihtu vialte kha an i tong, Jesuh cu ṭem buin an kalpi i Pailat kutah an pêk. 2Pailat nih, “Judah siangpahrang na si maw?” tiah a hal. Anih nih, “Na chim bangin a si ko,” tiah a leh. 3Tlângbawi hna nih a phunphun in a sual an kawl nain, kâ khat hmanh in a let hna lo. 4Pailat nih, “Sual a in puhnâk vialte hi na let hna lai lo maw?” tiah a hal ṭhân. 5Asinain Jesuh nih kâ khat hmanh in a let lo i Pailat nih mak a ti ngaingai. 6Cun thô lioah thongtla an halmi pauh Pailat nih a chuahpiak tawn hna. 7Mi pakhat Barabbas an timi cu a hawi le sinah ralthawh ruangah hrengkhenh buin thong ah a um, ral an thawh ruang i lainawngmi a si. 8Cuticun mizapi cu thang ngaiin an au i an ca-ah a tuah tawnmi kha tuahpiak dingin an nawl. 9Pailat nih a leh hna i, “Judah siangpahrang hi in chuahpiak hna ninglaw nan duh maw?” tiah a ti hna. 10Zeitintiah amah cu tlângbawi hna nih hnachuah ruang i a sinah an rak pêkmi a si kha a hngalh. 11Asinain tlângbawi hna nih Barabbas chuah dingin mizapi kha an lêm hna. 12Pailat nih, “Judah siangpahrang timi hi zeitindah tuah seh tiah nan ka duh?” tiah a ti ṭhân hna. 13Annih nih, “Khenhchih ko,” tiah an au. 14Pailat nih, “Zeiruangah? Zei sualnâkdah a tuah?” tiah a ti. Annih nih, “Khenhchih ko” tiah an au ṭhân. 15Pailat nih mizapi lung lawmhter a duh i Barabbas kha a chuahpiak hna, Jesuh cu a velh hnuah, khenh chih dingin a pêk hna. 16Cuhnuah ralkap hna nih bawi intual kulhmi chung i Praitoriam an timi ah amah cu an luhpi i ralkap vialte an i ko. 17Puan sen an aihter i hling luchin an sermi cu a lu ah an chinh, 18Judah siangpahrang pa, na kut kan in tlaih tiah serhsatnâkin an ti. 19A lu ah hluangkung in an tuk, cil an châk i khukbil in an biak. 20Capo saihnâk i an hman dih in puansen kha an phoih i amah angki an aihter ṭhân, cun khenhchih dingah an chuahpi. 21Cuticun Sairin khuami Simon, Alexandria le Rufas pa, a rak tlawngmi kha a vailam kha hranhram in an putter. 22Hmun pakhat, Golgotha, luruh hmun an timi ah an phâkpi. 23Cuka ah Mura he cawhmi mitsurhang kha an pêk, asinain a ding duh lo. 24Cun an khenhchih i a hnipuan kha camcawh fung zuh in an i phaw. 25An khenhchih cân cu zinglei suimilam pakua hrawng a si. 26Sual an phawtnâk câ kha a lu cungah, “JUDAH SIANGPAHRANG” tiah an tar. 27Amah sinah damiah pahnih, a orhlei ah pakhat, a kehlei ah pakhat an khenhchih hna. 28Cathiang nih, “Mi sual hna sinah relchih in a um,” a timi kha a tling. 29Cuka pawng i â chawkletmi vialte nih an lu an thinhnawh i, “Aize, nang ṭempal ṭhet in nithum ah a sa ṭhan kho tu, 30i damter law, vailam cungin rung ṭum ngat, tiah an tihrâm. 31Cubangin tlângbawi hna le nawlbiacawnpiaktu hna nih anmah he nihsawh buin, “Midang a damter, amah â damter kho fawn lo. 32Krih, Israel Siangpahrang cu, atu ah vailam cungin rung ṭum sehlaw, kan hmuh lai i kan zumh lai,” tiah an ti. Amah he an khenhchihmi hna zong nih an nihsawh ve. 33Chun suimilam hleihnih in zanlei suimilam pathum tiang cu ram vialte cu a mui dih. 34Zanlei suimilam pathum ah Jesuh cu aw thang ngai in, “Eloi, Eloi, Lama Sabakthani?” ti in a au, cucu, “Ka Pathian, Ka Pathian, zeicadah na ka kaltâk?” tinâk a si. 35A pawngah a dirmi cheukhat nih cucu an theih tikah, “Zohhmanh u, Elijah a auh a si cuh,” tiah an ti. 36Mi pakhat a tli i misur hang a thormi ah puanchia a ciah, fungpar ah a tar hnu ah a dinter. “Um ko seh, Amah khamhtu dingah Elijah a ra hnga maw, kan zoh lai cu,” tiah an ti. 37Jesuh cu aw thang ngai in a au i a thlarau a thlah. 38Ṭempal puanzar kha a cunglei in a tanglei tiang a tlek. 39Cun a hmai i a dirmi ralbawi pa nih cubantuk i a au le a thlarau a thlahmi a hmuh tikah, “Hipa hi Pathian Fapa a si hrimhrim ko,” tiah a ti. 40Nu hna zong nih ralkhat in a rak cuan i cu hna lakah, Mary Magdalin le, Mary Jeim le Joses nu le Salom zong an i tel, 41cu hna cu Galili ram i a um lio i amah zul in rian a ṭuanpiaktu an si, nu dang tam nawn amah he Jerusalem i a rami zong an um. 42Zanlei a si i cu ni cu timhlamhnâk Ni a thaizing Sabbath ni ca i zarhte ni a si. 43Arimathia khuami Josef, hmaizahmi biaceihtu, Pathian pennâk â ruahchanmi kha a ra i ralṭha in Pailat sinah a kal i Jesuh ruak kha a hal. 44Pailat nih cubangin a thihmi cu mak a ti ngai ngai, ralbawi pa cu au in a thihnâk a rauh cangnâk kong a hal. 45Cuticun ralbawi pa sinin biafiang a theih hnuah Josef sinah a ruak kha a pêk. 46Khiangrâng puan a cawk, amah kha a ṭhumh i khiangrâng puan in a tuam. Lung in kharmi thlânah a chiah i thlân inkâ cu a khar. 47Cun Mary Magdalin le Joses nu Mary nih an vuinâk hmun kha an hmuh.

Currently Selected:

MARKA 15: HAKABSI

Highlight

Copy