MARKA 13
13
1Cuticun ṭempal a chuahtâk lioah, a zultu lakah mi pakhat nih, “Cawnpiaktu, zohhmanh lung an rualmi le an inn sakning a ropit ning hi,” tiah a ti. 2Jesuh nih, “Hi a ropi ngaimi in hi na hmu ko lo maw? Lungrual vialte hi chimh lomi pakhat hmanh a um lai lo,” tiah a ti. 3Cubangin ṭempal ralden Oliv tlangcung i a ṭhut lioah, Peter, Jeim, Johan le Andru nih bia an hal, 4“Cucu zeitikahdah a si lai? Cu thil hna a tlinnâk ding hmelchunhnâk ah zeidah a si lai,” tiah an ti. 5Jesuh nih, “Ahohmanh nih an in hlen nâkhnga lo i ralring u. 6Zeitintiah mi tampi ka min in an ra lai, “Amah cu ka si” tiah mi tampi an hlen hna lai. 7Ral dohnâk le raltuknâk thong nan theih lai, asinain buai hlah u, zeitintiah cu thil hna cu a um hrimhrim awk a si, asinain donghnâk cu a si rih lai lo. 8Ram le ram an i doh lai, pennâk le pennâk an i doh lai, hmunkip ah li ai hnin lai I mangṭam le buainâk a um lai. Hi vialte hna hi fahnâk hramthawknâk a si. 9I ralring u, biaceihnâk ah an in chuahpi hna lai, Sinagog ah an in velh hna lai, ka bia hngalhter awkah, hruaitu le uktu hna hmai ah keimah ruangah chuahpi nan si te lai. 10Cun thawngṭha hi miphun vialte sinah chim a si hmasa lai. 11Tlaih nan si i biaceihnâk i chuahpi nan si tikah, zeidah ka chim lai tiah, ruat hmasa hlah u. A cân teah chim awk kha pêk nan si ko lai, a chimtu cu nanmah si loin, Thiang Thlarau a si lai. 12Cuticun thah awkah unau le unau an i rawi lai, pa nih a fa, fale nih an nu le an pa an doh lai i an thahter hna lai. 13Ka min ruangah mi vialte huat nan si lai. Asinain a dongh tiangin a tuarmi cu khamh an si lai. 14Cuticun ṭhiotu fihnung profet Daniel chimmi kha a dir lonâk dingah a dir nan hmuh tikah (a relmi pauh nih a sullam hngal ko seh), khi cân ah, Judia ram i a ummi kha tlang cungah zâm hna seh. 15Inn cungah a ummi kha, inn chungah ṭum hlah seh, inn chung i thilri lak awkah lut hlah seh. 16Lo i a ummi zong a thilri lakah tlung hlah seh. 17Cu ni ah cun fa a pawimi le nau a pawmmi caah vansannâk a si lai. 18Nan zâm cân kha khausik cân a si nâkhnga lo thla cam u. 19Zeitintiah cu ni cu harnâk ni a si lai. Cubantuk harnâk cu Pathian nih vawlei a ser ri in a um bal lo i zeitikhmanhah a um ṭhân ti lai lo. 20Bawipa nih cu ni hna cu tawiter hlah sehlaw, ahohmanh a nung kho lai lo. Asinain a thim i a ruah ciami hna ruangah ni kha a tawiter hna lai. 21“Cu cân ah mi nih, ‘Zoh u, Krih cu khika ah, asiloah, zoh u, Krih cu hika ah, an ti tikah va zum hna hlah u. 22Zeitintiah krih deu hna le profet deu kha an chuak lai, cu hna nih cun mi hlennâk caah hmelchunhnâk le khuarauhhar thil kha an tuah lai, si kho sehlaw, thimmi hmanh an hlen hna lai. 23Nannih tu cu ralring tein um u, ngaihmanh u, thil vialte kan chimh chung cang hna hi,” tiah a ti. 24Asinain cu ni hna le, harnâk cân a dih cun, nika a mui lai i thlapa a ceu ti lai lo. 25Van in arfi an tla lai i van thiltikhawhnâk cu â hnin lai. 26Cu hnu ah Mi Fapa hi thiltikhawhnâk lianhngannâk le sunparnâk he khuadawm lak i a rat kha an hmuh lai. 27A vancungmi kha a thlah hna lai i a thimmi hna cu vanhramdeng thli pali in a hlatnâk bik vawlei in a hlatnâk bik van i a ummi kha an pumh hna lai. 28Cubangin theipi kungah hin tahchunhnâk cawng u, a zim a no i a hnah a cawrh ahcun vaupi a nai cang ti kha nan hngalh. 29Cuticun hi thil hna nan hmuh tikah, Amah cu inkâ hramah a um cang tiah nan hngalh lai. 30Biataktein kan chimh hna, cu thil vialte a tlin hlan tiang tu lio chan hna hi an lo lai lo. 31Lei le van an lo lai, asinain ka bia cu a lo lai lo. 32“Asinain a ni le suimilam cân cu Pa dah ti lo ahohmanh nih an hngal lo, van i vanmi hna le Fapa zong nih a hngal lo. 33Thlacam in i ralring u, zeicatiah a cân kha nan hngal lo. 34Ram hlapi i khual tlawn ai timmi nih sin um hna sin i nawlngeihnâk a pêk i an ṭuan hngami pein, innkâ congtu zong ṭha tein nawl a pêk hnu ah a kalmi he tahchunh a si. 35Cucaah i ralring u, inn ngeitu rat cân cu zanlei ah maw, zanṭim ah maw, arkhuan cân ah maw, zingah dah a si lai nan hngal lo. 36Culoahcun nan i hngilh cân ah a ra sual lai i an poh sual hna lai. 37Nan sin i ka chimmi vialte hi mi vialte sin i chim ka si. I ralring u.
Currently Selected:
MARKA 13: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
