Mk 6

Bod batimi Yesus a Nazaret

Mt 13,53-58; Lk 4,16-30

1Ndò angakodo hala, akëlëg a dzal die, bëyègè boe bëngatoṅ nyè. 2A amos sabbat, ndò akèè na ayëgëlë a nda-bikoan, ndò abui ya e ba bëvogolo nyè bëngakam, bò na: Eyë asò ai e mam ma ve? Za akyaè fëg abëlë di, akyaè biyëṅ bi mam layënan a mò moe di! 3E mod nyò asë kabinda, mòn Maria ai manyaṅ Yakob ai Yoset ai Yudas ai Simun a? Bëkal bësë abë bia mu a? Bëngadzèè fëg, bëdzèègè nlo asu die. 4Yesus angakad bò na: Babyandi profet hë a dzal abyali die ai a bivuvuman bie ai a nda dzie. 5Tègè fë ai ngoṅ ya abò asimba ete tò dëda. Hë ban mintèt miziṅ të mmiè abedëge mò, mibò mvoè. 6Angakam ndzëman ṅyëbë waban.

Yesus alom bë awom ai bëbè a esye.

Mt 10,1.5-15; Lk 9,1-6

Ndò akë ayëgëlë a mal ya ngòdò hala. 7Ndò aloe b'awom ai bëbè, akèè na alom bò bëbè bëbè, avaa bò ngul asu bëbe minsisim, 8ndò atëbëlë bò na bëbë nòṅ nguma dzom ziṅ a zen, tò ntum, tò bidi, tò mfëg, tò nsaṅ mòni, 9nyè ai bò na, hë da, mibòdò bësilfas, të mianòṅ biwòman bibè. 10Nyè ai bò na: E hom osë minyian a nda ziṅ, tòbëgan ete akëlë kui anë miakodo ete. 11Ngë dzal ziṅ aben bëlan ai mina, aben ki mina vogolo, eyòṅ miakodo ete, misasa mbulug ya onë mina a mëkol a si asu yë na misòman bò. 12Ndò bëngatye, bëngabende na bod bëvëṅan, 13bëtsidan abui bëbe minsisim, bëwòbògò abui minkokòn mbòn, bëbò mvoè.

Awu Yohannes Ndu-bodo

Mt 14,1-12; Lk 9,7-9

14Ndò nkukuma Herodes#6,14Herodes Antipas nyòlò. angawog, amu dzoe die awumu abui, nyè na Yohannes Ndu-bodo adugan vëbë a sòṅ bëwu, asu te biyëṅ bi mam bi biabòban a mò moe. 15Bëvòg bëdzoo na Elias nyòlò. Bëvòg ki na anë mbòg ziṅ ya bëprofet. 16Awogo Herodes angawog nala, nyè na: E Yohannes mëngatsig nlo, ṅnyè anë nkuan a sòṅ nyòlò. 17Amu Herodes te angalom na bëbi Yohannes, ndò bëngafaṅ nyè a mbog etòm Erodiada, mininga manyaṅ woe Filip, amu angalug nyè. 18Amu Yohannes akadëga dzo ai Herodes na: Wabëlë ki ngul yë na otòbògò ai mininga manyòṅ. 19Erodiada angafëm nyè, angayi na awoe nyè, dzam da tègè ai zen. 20Amu Herodes angabë ambarëga Yohannes, amu ayëmë na anë sosoo mod, atoa fë mfufub, angakaman ai nyè, ndò fë, afyaṅan bò na bibug bi Yohannes bibii nyè a nnëm, hë adiṅi avogolo nyè. 21Ndò latoban mbëṅ amos ziṅ na Herodes angabanda mvindi bod a abog atoban mimbu mi abyali die, ai bëdzoe minkunda bëzimbi, ai mvindi bod ya Galilea, 22ndò ngòn Erodiada engasò ha, engadzëm, enyëbë fò Herodes a mis ha ai e bod bëngabë dzaa ai nyè. Ndò nkukuma adzo ai man mininga na: Siligi ma e dzom esë wayi, mayi wa dzò vë. 23Ndò akani nyè sòṅ na: E dzi esë wayi ma sili, mayi wa vë, tò ben etun nnam edzoe dzama. 24Ndò akui, nyè ai nyia na: Mësili dze? Nyè ai nyè na: Nlo Yohannes Ndu-bodo. 25Ndò anganyian avol, akëlëg abë nkukuma, ndò akad nyè na: Mayi na, etoa bitoa dzi, ovë ma nlo Yohannes Ndu-bodo a esoa. 26Mintye midzie nkukuma a nnëm, ai mbol angakani sòṅ, bëyëṅ bëtoa fë, hë da tègè dzam soo ebug dzie. 27Ndò hm fò nkukuma alom mod na abende na bëzu ai nyè nlo woe. Ndò angakë nyè tsig nlo a nda-mimbog. 28Ndò angasò ai nlo woe a esoa, avëë wò man mininga, man mininga avëë wò nyia woe. 29Awog bëyègè boe bëngawog nala, ndò bëngakë nòṅ mbim woe, bëkë dzëb a sòṅ.

Yesus avë bod bakuda bëtan bidi

Mt 14,13-21; Lk 9,10-17; Yoh 6,1-14

30Ndò apostel bëngakoan abë Yesus, bëngatye nyè e mam mësë bëngabò ai mbol bëngayëgëlë. 31Nyè ai bò na: Zaan a fëfël, e hom binë etam, mitam fë waè man tsëtsat na. Amu abui bod bëkëlë, bëzaa fë, tègè ai adii ya mod wadi man dzom. 32Ndò bakë a efunga, e hom ongabë a miëëṅ. 33Ndò bod bëngayen bò bëkëlë nala, abui bëyëmë fò bò, bëngabugi a mal mal, bëngakë bò kui osu ai mëkol. 34Ndò akui ha, ayënë e mod ntumba bod nyò, angawog bò ngòl, amu bëngabë anë mintomba minë tègè ai nnòni, ndò akèè na ayëgëlë bò abui mam. 35Eyòṅ ngoge engabò anë yasubu, ndò bëyègè bazu nyè kad na: Aha onë ntye, ndò fë ngoge engasubu ya. 36Soege bò, bëkë kus e dzom badi a mal ai mëfub a ngòdòg va. 37Ndò ayalan bò na: Mina bëben, vaan bò dzom ya adi. Bò ai nyè na: Yë na bikë kus bidi a taṅ mintèt mibè, bivë bò na bëdi? 38Nyè ai bò na: Mibëlë bëmbaṅëla bam? Kaṅan yen. Ayëm bëngayëm, bò na: Bëmbaṅëla bëtan, ai kòs ebè. 39Ndò angabende bò na bëtoe bò mëngoe mëngoe a bilòg. 40Ndò bëngatòbò ban mëngoe nala, bëvòg bala ntèt, e ba bëvòg, mëwom mëtan. 41Ndò anganòṅ e bëmbaṅëla bëtan ba ai kòs ebè, abede mis a yob, avëë ngaṅ, abëgë bëmbaṅëla, avëë bëyègè boe na bëkë bavë bò, akaba fë bò kòs. 42Ndò bësë bëngadi, bëdzie. 43Bëngabodo e bitun bingaligi, biat awom ai bibè mintud ai bitun bëmbaṅëla ai kòs. 44E bod bëngadi ba bëngabë bakuda bë bod bëtan.

Yesus awulu a mëndim a yob

Mt 14,22-33; Yoh 6,15-21

45Ndò abò na bëyègè boe bëbed a efunga, bëkë nyè osu a nnam Betsaida, ntye asoege bod. 46Eyòṅ angamana yaan ai bò, ndò akë a nkol na akë kogëlan. 47Eyòṅ ngoge engavin, efunga entoa ya a maṅ a zaṅ, atoa nyè etam a nkod si. 48Ndò ayen bò bëbadan ai mfogan bingab, amu evundu esòò bò osu; Dzam bò ai ndib kidi, ndò akë atoṅ bò, awulugu a maṅ a yob, angayi bò kë lod. 49Eyòṅ bëngayen nyè awulugu a maṅ a yob nala, bëngadzo na kon, bëngabam a yob. 50Amu bësë bëyënë nyè, bëmbarëga fë. Ndò akalan bò nkòbò etye etye, nyè na: suugan minnëm a si, mamen! Të miambara. 51Ndò angabed a bëngabë a efunga, evundu esusu, bëngakam fò eyëgan a minnëm miaban. 52Amu, tò asimba bëmbaṅëla, tègè wog, nnëm ongadig bò ha.

Yesus asye minkokòn a Genesaret

Mt 14,34-36

53Ndò bëngadaṅ a kindig ayat, bënyian a Genezaret, bëkui a kindig. 54Bëngënë bësusu a efunga nala, bod bëyëmë fò nyè ha, 55bëngatye mimbil ai nkòṅ nnam te osë, bëkèè na bazu ai nyè minkokòn mibëbëdan a binòṅ biaban, bëbëgë bò e hom osë bawog na anë. 56Eyòṅ esë anyiigi a dzal ngë tisòn, ngë a mvus nnam, bëtoege minkokòn a minsëṅ mi angara, bëkogëlan ai nyè na bënamba të hë alò ewòman dzie. E bod bësë bënambëga dò, bëbò fë mvoè.

Currently Selected:

Mk 6: NTE12

Highlight

Copy