Mk 5

Yesus asye mod abëlë mbë nsisim a Gerasena

Mt 8,28-34; Lk 8,26-39

1Ndò bakui a kindig maṅ a yat, a nnam Geraza. 2Ndò asus a efunga a si, ndò mod ziṅ abëlë mbë nsisim, asòò a mësòṅ, azu toban ai nyè. 3Mod te angaloṅ mvog a mësòṅ, tò mod ziṅan gabë ki fë nyè dzam tindi ngadag, tò mësuṅ, 4amu bëkadëga nyè faṅ ngadag, dzam da akadëga tie ngadag ai mësuṅ, tègè ai e mod abëlë ngul ya atëgë nyè. 5Antoa hm na, abog asë, tò ai alu tò ai amos, akëlë abam a mësòṅ ai a minkol, akëlë abali emen ai ngòg. 6Ayen angayen Yesus, angënë man ntye nali, ndò atye mbil, asò laban Yesus osu, 7angabam a yob ete na: Dze enë a zaṅ bia wa, a Yesus, mòn Zamba ya yob ete? Mavuu wa sòṅ a dzoe Zamba, të wa fogo ma! 8Amu Yesus angabë adzoo ai nyè na: A mbë nsisim, kui e mod nyò a nyòl. 9Ndò asili nyè na: Onë dzoe ya? Nyè ai nyè na: Dzoe dama anë na Nkunda, amu binë etitib. 10Ndò angayëgëlë të ai nyè abui na të atsidan bò oyab ai dzal te. 11Mod nkunda ngoe #5,11 Yuden badi ki tsit ngoe. Nlaṅ hi walèè dzam ya angalod a Yordan ayat, mfag bëhaiden bëngabë. Mbò bëbii ngoe. angabë a mëdiiga a nkol te. 12Ndò bakogëlan ai nyè bò na: Lomo të bia a e ngoe nyi, bikë nyian ete. 13Ndò angavë bò ngul nala. Bëbë minsisim bëkuig, bëkë nyian a ngoe, nkunda obumi a mbimbiṅ, okë suman a maṅ ete, dzam bò bakuda bëbè, bëmana yimbi a maṅ. 14Bënòni baban bëtubu, bëkë kad e foe nyi a dzal ai a mëfub. Ndò bod basò na bazu yen e dzam angalod. 15Ndò bazu abë Yesus, bëntala e mod ambë bëlë mbë nsisim atoa, abëgë biyie; e mod ambë bëlë etitib minsisim nyò atoa a miëëṅ, wòṅ oku bò a nyòl. 16E bod bëngayen bëngalèè bò e dzam ya angayënan ai e mod ambë bëlë mbë nsisim ai e di ngoe. 17Ndò bakèè na bakogëlan ai nyè na akodo bò a mal maban. 18Ndò abed a efunga, e mod ambë bëlë mbë nsisim angakogëlan ai nyè na akë ai nyè. 19Nyè tègè yëbë, nyè ai nyè na: Këlë a bod boe, a nda dzoe, olèè bò e mam Nti abò wa, ai mbol ayen wa ngòl. 20Ndò angakë, angayëdan a nkòṅ nnam Bëtisòn Awom (Dekapolis) e mam mësë Yesus angabò nyè, bësë bëngakam.

Ngòn Yairus ai e mininga anganamba Yesus ewòman

Mt 9,18-26; Lk 8,40-56

21Adaṅa Yesus angadugan daṅ a kindig ayat a efunga, mod nkunda bod akoan nyè a nyòl, antoa a ntsag maṅ. 22Ndò ndzoe nda-bikoan ziṅ dzoe na Yairus azu; ayen angayen Yesus, aku nyè a mëkol a si, 23angakogëlan ai nyè abui nyè na: Ngò dzam enë fò, bëkon bëlindigi, bëyëmë bëlindigi; zaa të nyè kë bede mò, akodëban, anyiṅ. 24Ndò akë ai nyè. Mod nkunda bod angatoṅ nyè ha, bëngafid fid nyè. 25Mininga ziṅ ya mëki mëkui abum mimbu mimbu awom ai mibè, 26hala amana ya bëdòbodò bësë, mòni amana nyè a mò, tègè ai evòli, okòn ongafëdan ben, 27angayi wog na Yesus anë hala, angazu a bod ete ha, ndò anamba ewòman dzie a mvus, 28amu angabë adzoo na: «Mënamba ki të hë ewòman dzie, ngë mënyiiban ana». 29Etye etye te, e mëki mëkui nyè a abum mëtsigi, ayëmë fë a nyòl dzie na mintye mie milèd ya. 30Yesus awodan a nnëm ete na ngul engakui nyè a nyòl, ndò akilan a bod ete ha, nyè na: Za anamba ma biwòman? 31Bëyègè boe bò ai nyè na: Wayen abim abui bod lafid wa di, ongasili na za anamba ma? 32Angakë abëbë na ayen e mininga angabò dò. 33Mininga angambara, anyamëṅan, mbol ayëmë e dzam angayenan ai nyè, ndò akë nyè ku a si osu, amana nyè kad bëbëla osë. 34Nyè ai nyè na: A ngò dzam, ṅyëbë woe onyii wa. Këlë tòbò mvoè, okòn woe oman ya. 35Angënë akòbògò ha, ndò bod basò a nda ndzoe nda-bikoan bò na: Ngò dzoe ewu ya. Dze wabad ndëgele ṅyëgëlë? 36Ndò Yesus abò anë andzëki wog, nyè ai ndzoe nda-bikoan na: Obë mbara, bëlëgë hë ṅyëbë. 37Ndò andzëki dzoge na mod akë ai nyè, sësala hë Petrus, ai Yakob, ai Yohannes, manyaṅ Yakob. 38Ndò bakui a nda ndzoe nda-bikoan, ndò ayen enyënyam ai bininga bëyono ai e ba balòṅ bikiga abui, 39ndò anyian, nyè ai bò na: Dze miabò enyënyam, miyono? Mòngò andzëki wu, akë a oyò. 40Bëngabò nyè emgbaṅ. Ndò angakuli bësë a nsëṅ, anòṅò esya mòn ai nyia, ai e ba bëngabë ai nyè esamba, ndò banyian mfa mòngò angabë. 41Ndò abi mòngò a wò, nyè ai nyè na: Talita kum; nala watyan na, a man mininga, (wa madzo ai nyè), tëbëgë. 42Ndò mòngò angakodo a si etye etye, angawulu, amu hala atoa mimbu awom ai mibè. Mod wòṅ a susu bò a nyòl. 43Ndò abende bò abui na, të mod ayëm adzo te, nyè ai bò na bëvë nyè dzom ya adi.

Currently Selected:

Mk 5: NTE12

Highlight

Copy