Mk 4

Nkana mbè mvòṅ

Mt 13,1-9; Lk 8,4-8

1Ndò adugan kèè na ayëgëlë a ntsag maṅ. Mod nkunda bod asò fò abë nyè, ndò abed bed a efunga, antoa a maṅ a yob, e bod bësë ba bëtoa a kindig maṅ. 2Angayëgëlë bò abui mam a minkana, akada bò na: 3vogëlan na: Ndò mmias mvòṅ angakui na akë amias mvòṅ. 4Eyòṅ amias mvòṅ ha, abim ziṅ a kuu a mgbag zen, anòn asòò, amana di. 5Abim afë akuu a si ngòg, tègè ai abui si ete, efaè fò etye etye amu tègè ai abui si. 6Ndò nlo-dzobo atole, e mvòṅ nyi emana dig, amu tègè ai minkaṅ, emana kod. 7E mvòṅ fòg ekuu a biyò, biyò binganaṅ, bimana dzò fid, etë wum bibuma. 8Mvòṅ fë ekuu a mbëmbë si, efaè, ewumu bibuma, ewumu biyòṅ mëwom mëlè, e nyili mëwom mësaman, e nyili ntèd. 9Nyè ai bò na, e mod abële mëlò y'awog, awogo!

Asu dze Yesus aku bod minkana?

Mt 13,10-17; Lk 8,9-10

10Eyòṅ bëngaligi etam, e bod bëngabë esamba ai nyè ai b'awom bëbè bëngasili nyè na atimi minkana. 11Nyè ai bò na: Mina bëngakuli ndimba y'edzoe Zamba. E ba ki ya nsëṅ, mam mësë mënë bò hë bikug, 12asu yë na: bëbëbë hë mbëban, tègè yen, bëvogolo hë mvogëlan, tègè wog, asu yë na bëza vëṅan, bëdzu bò dò#4,12Is 6,9-10.

Yesus atimi nkana mbè mvòṅ

Mt 13,18-23; Lk 8,11-15

13Nyè ai bò na, ngë miawog ki nkana vi, eyë miayi yëm minkana misë ya? 14Mmias mvòṅ amias ebug. 15E ba bënë a mgbag zen mbò bënë na, a bamias ebug, ṅnyie anë bawog dzò, Satan asòò vaè ebug babè bò a nnëm. 16E ba ki mbò bënë e ba ya babè a si bikok, ṅnyie anë bawog ebug, bëyëbë dzò ai abui mintag, 17hë da, babëlë ki minkaṅa nnëm ete; bënë ekes. Ngë mindzug, ngë mintye mikë sòṅ a su ebug, mbò baku mbëg ba. 18E ba bëvòg mbò bënë e ba babè a biyò. Mbò bawog ebug Zamba, 19bëngasaṅan ai mam më si, ndòg akuma ai mëyaṅan mësë mëvòg bidzie bò a nnëm, ebug të wum bibuma. 20E ba ki mbò bënë e ba ya bamias a mbëmbë si; mbò bawog ebug, bënyie dzò, bëngawum bibuma, e nyòlò mëwom mëla, e nyò ki mëwom mësaman, e nyò mbòg ntèd biyòṅ.

Batele ki alamba a enòṅ asi

Lk 8,16-18

21Nyè ai bò na: Yë bakoe alamba na bafudi dò a etug a si ngë a enòṅ asi? Nga asu yë na babede a etëlëga alamba a yob? 22Dzom ziṅ yasòli ki a engakui ki a mfyè, ndò fë dzom ziṅ esòlò ki a yangabò të kui a engëngëṅ. 23Ngë mod ziṅ abëlë mëlò ya awog, awogo! 24Nyè ai bò na: Boan okala ai e mam miawog. E kan miavëg, nala ngò fë bayi mina vëg, bëngabag bag fë a yob. 25Bayi vë e mod abëlë; e nyò abëlë ki, tò e man abim abëlë, bëvaa nyè nyè.

Nkana e mvòṅ yanaṅ etam

26Nyè ai bò na: Edzoe Zamba enë anë e mod awoa fes a si, 27ndò tò akë oyò, tò atala, tò ai alu, tò ai amos, mvòṅ efaègi, enaṅa fë, emen tègè yëm mbol nala wakui. 28Si eben yatari wum bibuma, nsò otari kui, a mvus te, mis. 29Eyòṅ evie ya, alomo bod mëkoe ai mëkòṅ asu yë na bëkoe.

Nkana fes ndoṅ

Mt 13,31-32; Lk 13,18-19

30Nyè na: Binë dzam vëg edzoe Zamba ai dze, akyaè nkana afe binë dzò vëg ai dzò? 31Enë anë fes ndoṅ; endzò enë na, eyòṅ wamias dzò a si, etoa abòd alodo e fes esë enë a si, 32eyòṅ bëbè ya dzò nala, enganaṅ, entoa anen alodo bibëbëga bisë, embëlë bod mintëm, e ndie yë na, anòn ya yob antoa dzam loṅ mumba a evovoe dzie.

Yesus abëlan ai minkana

Mt 13,34-35

33Ndò, hë e kan minkana nyi ndzò angabë akada bò ebug, e kan bëngabë dzam wog. 34Angabë ki akòbògò ai bò, së na a minkana, abog antoa ya ai bëyègè boe, angatimi bò mësë.

Yesus abam ai maṅ

Mt 8,23-27; Lk 8,22-25

35Amos te oben, ai mëvindi më ngoge, ndò adzo ai bò na: Ndaṅan a kindig ayat. 36Ndò bëngalig nkunda bod vi, bënòṅò nyè a efunga mbol angabë, bifunga bifë bitoa ai nyè esamba. 37Ndò mod evundu nkulu angavuṅ, minsum mëndim mingakuban a efunga, efunga engadzie ai mëndim. 38Nyè atoa të a mvus efunga, nlo obëdë nyè a fila, akëlë a oyò. Ndò bavëlë nyè, bò ai nyè na: Wabisi ki anë biamana wu na nga? 39Ndò angavëbë a oyò, angabam ai evundu, nyè ai maṅ na: A miëëṅ! Evol! Ndò evundu engasus, mod endindim antoa. 40Nyè ai bò na: Za akyaè wòṅ minë di? A dze miabëlë ki ṅyëbë? 41Bëngambara eyëgan, bëngakòbò a zaṅ bò a bò ha na: Za mod adi na tò evundu, tò maṅ biabò nyè mëwog?

Currently Selected:

Mk 4: NTE12

Highlight

Copy