Mk 7

Mëtum bëtara

Mt 15,1-20

1Ndò bëfarisea ai bësaṅa bëkalara bëziṅ ya Yerusalem bëngakoan nyè a nyòl. 2Ndò bëngayen bëyègè boe bëvòg bëdzaa ai eboe a mò, nala watyan na bò tègè sob mò 3(amu anë hm na, bëfarisea ai Yuden bësë bënë tègè di së na bëtoan sob mò akui a bikud-bòṅ asu yë na babaala tum besya#7,3Markus atoan timi e mëtum ma, amu bëhaiden bayëm ki mò., 4bënë fë eki të di ngë bandzë tam du mò a mëndim eyòṅ basò a nsëṅ angara, ai abui mam mëfë a babaala a mëngasò kidi, nsoban kòb, ai bimvaṅ, ai bisoa, -ai binòṅ-). 5Ndò bëfarisea ai bësaṅa bekalara basili nyè na: Asu dze bëyègè boe bawulu ki a tum bëtara ya okoba, hë bëdzaa ai eboe a mò? 6Nyè ai bò na: Profet Isaias angatoan fò mina laṅ ebug dzi, mina bod bë mvol, anë anë ntilan na: E mvòṅ bod nyi yalugu ma hë ai biya bi anyu, nnëm waban otoa oyab ai ma. 7Olugu ya balugu ma anë evoe, bayëgëlë të hë mëmvende më bod#7,7Is 29,13. 8Miadzoge mvende Zamba a mgbag, mingabaala mëtum më bod. 9Nyè ai bò na: Miabyandi mvende Zamba asu yë na miabaala mëtum maan. 10Amu Moses angadzo na: Olugu esoa ban nyoa#7,10Mb 20,12; Dt 5,16. ai na e mod akòbò ai esya ngë nyia abe, ayean ai awu#7,10Mb 21,17. 11Mina miadzo na: Ngë mod ahë dzo ai esya ngë nyia na «Korban», nala watyan na: E dzi mëhë yean wa vë enë efaè, 12miadzo na mod te abëlë ki fë adzo ai ntòṅan esya ngë nyia; 13miandaman fë nkòbò Zamba ai mëtum maan mëngasò mina koba. Miabò fë e kan mam nyili abui. 14Ndò angadugan loe nkunda bod nyè ai bò na: Mina bësë, vogëlan ma, miwog. 15Dzom ziṅ yasëki dzam vë mod eboe a yatye nyè a nsëṅ enyiigi nyè a nyòl, dzam da, e dzi yakui mod a nyòl endzò yavë mod eboe. #7,15Afola di lalaṅeban a bëkalara bëziṅ na: (16) Bëwog bëwog, bingum bingum. 17Ndò eyòṅ angalig bod, anyian a nda, ndò bëyègè boe basili nyè na afëlan bò nkana. 18Nyè ai bò na: Ndë mia minë fë tègè wog a! Miawog ki na e dzi esë yasò a nsëṅ enyiigi mod a nyòl esëki nyè dzam vë eboe, 19amu yanyian ki nyè a nnëm, yakë nyè a abum, engakë mana a edug (nala ngò hm afubugu bidi bisë). 20Nyè na, e dzom yakui mod a nyòl, endzò yakë vë mod eboe. 21Eyë bëbë mintsogan basò a nnëm mod ete: bisog, wub, ewoe bod, 22endaman mëlug, ndòg akuma, abe-nnëm, mëdugan, nkòbò-mvit, aban, mëfodan, mëbun, mfufulan. 23Bëbë bë mam bësë bala basò a nnëm ete, bëngavë mod eboe.

Abui ṅyëbë mininga Sirofenika

Mt 15,21-28

24Ndò angakodo hala, akëlëg a nkòṅ nnam Tir, anyian a nda ziṅ, të yi na mod ayëm, dzam da, tègè ai asòbò. 25Ndò mininga ziṅ a wodan nyè, (ngò dzie embë bëlë mbë nsisim), ndò azu laban Yesus a mëkol a si. 26Mininga te angabë ngòn grek, ayòṅ Sirofenika#7,24-30Yesus avòligi bëhaiden hë ngë bësili nyè. Yuden bëkarëga tè bëhaiden na bënë «mvu».. Ndò akogëlan ai nyè na atsidan mbë nsisim a nyòl ngòn dzie. 27Yesus nyè ai nyè na: Tarigi dzoge na bòn (bë dzal) bëdzie, amu asëki mbëṅ na bënòṅ bidi bi bòn, bëngawoa a mvu enë. 28Ndò ayalan nyè na: A Nti, nga mvu yakad di e mënyuṅ maku bòn a tëbëlë a si? 29Yesus nyè ai nyè na: Asu ebug dzoe dzili, këlëg, mbë nsisim akodo ya wa ngòn a nyòl. 30Ndò adugan a nda dzie, akë kòb mòngò aboo a enòṅ, mbë nsisim akë ya.

Yesus asye mod atoa mvug ai ndòg

31Ndò adugan kodo a nkòṅ nnam Tir, adaṅ a Sidon, akëlëg a maṅ më Galilea, a zaṅ mal ya Bëtisòn-awom. 32Ndò bazu ai nyè mod atoa ndòg, të toan kòbò, ndò bakogëlan ai nyè na abede nyè mò. 33Ndò akë ai nyè a mgbag, oyab ai nkunda bod, bò etam, afudi nyè minyu a mëlò, atui mëtè, anamba nyè oyëm, 34abede mis a yob, asuu ṅhebë, nyè ai nyè na: Effata, nala watyan na: Yaaban. 35Etye etye te, mëlò moe mëyaaban, oyëm otiiban fë nyè, angakòbò fë mbëṅ. 36Ndò abende bò na bëbë kad tò mod. Anë abende, anë bafëdan kë babëgëlë dò. 37Bësë bëngakam adzo di eyëgan, bò na: Abò dzam asë hë mbëṅ, abò na mindondòg miwog, ai na mimvumvug mikòbò.

Currently Selected:

Mk 7: NTE12

Highlight

Copy