Mk 8

Yesus avë bod bakuda bënyii bidi

Mt 15,32-39

1Mëmos mëte, lëdugan bò na, etitib bod etoa tègè ai e dzom badi, ndò aloe bëyègè boe, nyè ai bò na: 2Mawog e bod ba ngòl, amu bëtòbò ya ai ma esamba mëlu mëlè, etoa dzi, babëlë ki e dzom badi. 3Ngë ma mësoe bò ai zie esë a abum na bëdugan a mal maban, bayi ku sòm a zen, amu bëvòg ya abë bò basò zen oyab. 4Ndò bëyègè boe bayalan nyè na: Eyë mod anë dzam vë e bod ba bidi, bëdzie a nkod-nnam mu ya? 5Ndò asili bò na: Mibëlë bëmbaṅëla bam? Bò na: zamgbal. 6Ndò abende nkunda bod vi na bëtòbò a si. Ndò anòṅ e bëmbaṅëla zamgbal ba, avëë ngaṅ, abëgë, avëë bëyègè boe na bëkab, bëngakab bod. 7Bëmbë bëlë fë ban kòs. Ndò angafubu bò, nyè na bëkab fë bò. 8Ndò bëngadi, bëdzie, bëwolo biad zamgbal ya bitun bingaligi. 9Bëngabë, dzam bò bakuda bënyii. Ndò asoe bò. 10Etye etye, abëdë a efunga ai bëyègè boe, akëlëg a nnam Dalmanuta.

Bod basili ndëm

Mt 16,1-4

11Ndò bëfarisea bazu, bëkèè na badoan ai nyè, bësiligi nyè na avë bò ndëm esòò a yob, bëbobolo nyè. 12Ndò asuu ṅhëbë ai edudu, nyè na: A dze e ngongo bod nyi yasili ndëm? Makad mina bëbëla na, e ngongo bod nyi yangavëëban ki ndëm. 13Ndò alig bò, adugan bed a efunga, akëë man ntye.

Ekòsaṅ bëfarisea ai e dzi Herodes

Mt 16,5-12

14Ndë bëngavoan nòṅ bëmbaṅëla, bò bëbëlë hë mbaṅëla mbòg a efunga ha. 15Ndò Yesus avë bò tëbëga na: Mibò okala asaala ekòsaṅ bëfarisea ai e dzi Herodes. 16Bëngasilan a zaṅ bò bò na yë mbol babëlë ki bëmbaṅëla. 17Mbol angayen nala, nyè ai bò na: Dze miakë mianyiṅ na miabëlë ki bëmbaṅëla? Ndë miabë ki wog, misoṅo a? Yë minnëm minë mina alèd nga? 18Minë ai mis, të yen, mitoa ai melò, tègè wog. Nga miatsog 19anë mëngabëg bëmbaṅëla bëtan asu bod bakuda bëtan; mingawolo biad bitun bi mbaṅëla atud biam? Bò na: Awom ai bibè. 20Eyòṅ ki mëngabëg bëmbaṅëla zamgbal asu bakuda bë bod bënyii, mingakoan biad biam bitoa mintud ai bitun bëmbaṅëla? Bò na: zamgbal. 21Nyè ai bò na: Dze yë miabë ki wog?

Yesus asye ndindim a Betsaida

22Ndò bazu kui a Betsaida. Bësòò ai nyè ndindim, bëngakogëlan ai nyè na anamba nyè. 23Ndò anòṅ ndindim a wò, akëë ai nyè a fëfël, atui nyè mëtè a mis, abëdë nyè mò, ndò asili nyè na: Yë wayen dzom ziṅ? 24Ndò angakui mis, nyè na: Mayen bod, bënë anë bile ya biawulu. 25Ndò adugan nyè bede mò a mis, angatoan yen, antoa mvoè, angatoan fò yen dzom esë. 26Ndò alom nyè a nda dzie, nyè na: Të waanyian a dzal!

Petrus amëm na Yesus anë Kristus

Mt 16,13-20; Lk 9,18-21

27Ndò Yesus akui ai bëyègè boe a nkòṅ nnam Sezarea ya Filipi. Bëtoa a zen, ndò asili bëyègè boe na: Bod badzo na mënë za ben tug? 28Bò ai nyè na: Yohannes Ndu-bodo, bëvòg badzo na onë Elias, bëvòg bò ki na, profet ziṅ mbòg. 29Ndò asili bò na: Mina ki, miadzo na mënë za? Ndò Petrus ayalan nyè na: Wa onë Kristus. 30Ndò abende bò na të balèè mod adzo die te.

Yesus adzo na ayi wu, akui fë a sòṅ

Mt 16,21-28; Lk 9,22-27

31Ndò hm akèè na ayëgëlë bò na, mòn mod ayean bi abui mintye, ai na mvindi ai bëfada bënen ai bësaṅa bëkalara bayi nyè sie, ayi woeban, adugan kui a sòṅ a mvus mëlu mëlè. 32Akòbògò adzo di a ngëëṅ. Ndò Petrus adudu nyè a mgbag, akèè na akòṅan ai nyè. 33Ndò akilan, abëbë bëyègè boe, angakòṅan ai Petrus, nyè na: Kodogo ma a zen, a Satan, amu mintsogan mie miasëki e mi mi Zamba, watsog hë mam më bod. 34Ndò aloe bëyègè boe ai nkunda bod, nyè ai bò na: Ngë mod ayi na azu abye ma, asyege emen, anòṅò klos dzie, azu atoṅ ma. 35Amu, e mod ayi na anyii enyiṅ dzie, ayi dzò dzèè. E nyò ki ayi dzèè enyiṅ dzie asu dama ai asu Mbëmbë Foe, ayi dzò nyii. 36Amu, mfi dze onë na mod ahaman si esë, ngë adzèè enyiṅ dzie? 37Dze ki mod anë vë eban asu enyiṅ dzie? 38Amu, e mod awog osòn asu dama ai asu bibug biama a e ngongo bod b'ebamba ai minsëm ba, mòn mod nyè ayi fë wog osòn asu die abog ansò a duma esya ai mimfufub benglès.

Currently Selected:

Mk 8: NTE12

Highlight

Copy