Mk 9

1Nyè ai bò na: Makad mina bëbëla, bod bëziṅ bëtëtëlan va, a bëngayen ki awu akui anë bayen edzoe nkukuma Zamba esòò ai ngul esë.

Yesus atsende nyòl

Mt 17,1-13; Lk 9,28-36

2A mvus mëlu mësaman, ndò Yesus anòṅ Petrus ai Yakob, ai Yohannes, abëdë ai bò a mod nkol a yob, bò we etam. Ndò angatsende bò a mis, 3biwòman bie bingafum akyaè yë na tò ten ya si esëki dzam bò na bifum nala. 4Bëntala Elias ban Moses bëlègè ai Yesus. 5Ndò Petrus adzo ai Yesus na: A ṅyëgëlë, anë hm fò mbëṅ na bitòbò va, nloṅan bibëm bilè, wa dzia, Moses dzia, Elias fë dzia. 6Amu angabë yemë ki e dzam anë dzo, bësë bëtoa ai wòṅ a minnëm. 7Ndò nkut ongasus bò a yob, kiṅ engasò a nkut vi na: Ndindiṅ mòn wama hili, mivogolo nyè. 8Etye etye na, ndò badugan bëbë, tègè fë yen tò mod, hë Yesus etam ṅnyè atoa ai bò. 9Eyòṅ bësusu a nkol a si, ndò abende bò na të balèè tò mod e mam bëngayen, akëlë kui anë mòn mod atëbë a sòṅ bëwu. 10Ndò bëngabaala adzo di, hë bësiligi bò a bò e dzom yatyan na atëbë a sòṅ bëwu. 11Ndò basili nyè na: Asu dze bësaṅa bëkalara badzo na Elias ayean tari zu? 12Nyè ai bò na: Elias ayean tari zu na amana kom mësë. Ndò ki, asu dze anë ntilan abëbëgë mòn mod na ayean bi abui mintye, bëbyandigi fë nyè? 13Ndò hm fò makad mina na Elias angasò ya, ndò bëngabò ai nyè anë bëyii, e kan bëngatil asu die.

Yesus asye mòngò abëlë mbë nsisim

Mt 17,14-20; Lk 9,37-43

14Ndò azu mfa bëmbë, ayënë mod nkunda atoa ai bò, ai bësaṅa bëkalara bëdoan ai bò. 15Ayen nkunda osë hi ongayen nyè, bësigan fò, bëngatye mimbil, bëkëlë nyè sug. 16Ndò asili bò na: Dze mialaṅëdan ai bò? 17Ndò mod ziṅ ya nkunda ete ayalan nyè na: A ṅyëgëlë, mësò ai mòn wama abë wa, abëlë mvumvug mbë nsisim. 18Akad bò na, e hom osë abi nyè, adibi nyè a si, avul angakui nyè a anyu, angaladan mësoṅ, amana kat. Ndò mësili bëyègè boe na bëtsidan nyè, bò tègè ai ngul. 19Ndò ayalan bò na: A e ngongo bod minë tègè ai ṅyëbë ba, mayi tòbò ai mina akui oden? Mayi mina dzibi akui oden? Zaan ai nyè abë ma! 20Ndò bëngasò ai nyè abë nyè. Mbë nsisim angayi nyè yen, angasugzu mòngò, akuu a si, angakë abigidi, avul akui a anyu. 21Ndò asili esya na: Lakad ya nyè bò nala atarigi abog afe? Nyè na, atarigi atoa man mòngò. 22Biyòṅ bivòg biben, akad nyè woa a ndoan, ngë ki na a mëndim na awoe nyè. Ngë anë ebugbu, yënë të bia ngòl, ovòli bia. 23Yesus nyè ai nyè na: Ngë anë ebugbu ṅnyè atyan ya? Ngë obëlë ṅyëbë, dzom esë enë ebugbu. 24Esya e mòngò nyò angayëdan fò na: Mayëbë. Vòligi të obobòd ṅyëbë wama. 25Ndò Yesus angayen nkunda bod ozaa mbil, ndò abam ai mbë nsisim na: A mvumvug ai ndondòg nsisim, ma mabende wa: kodogo e mòngò nyòlò a nyòl, të nyè bad nyian a nyòl. 26Ndò angakui, abama, asugzu nyè abui. Mòngò andzogo anë mbim, abui bod angadzo na awu ya. 27Hë da, ndò Yesus angabi nyè a wò, atëlë nyè mëkol a si, atëbë. 28Anyian anganyian a nda, ndò bëyègè boe basili nyè a omomoa na: Asu dze biandzëki bi ngul ya atsidan nyè? 29Nyè ai bò na: E kan nyili esëki dzam kodo ngë së na ai ngogëlan.

Yesus akad eyòṅ bèè na ayi wu, akui fë a sòṅ

Mt 17,22-23; Lk 9,43-45

30Ndò bëngakodo hala, bëngakë ai nnam Galilea osë, nyè tègè yi na tò mod ayëm. 31Amu angabë ayëgëlë bëyègè boe, akada bò na: Mòn mod ayi kuan a mò më bod, bayi nyè woe, a mvus mëlu mëlè yë na ngë awu, ayi tëbë a sòṅ. 32Bò tègè wog adzo di, dzam da, bëmbarëga nyè sili.

Za anë e mod osu ana?

Mt 18,1-5; Lk 9,46-48

33Ndò bazu a Kafarnao. Bëtoa a nda, ndò asili na: Dze mihë fëdan ai zen esë? 34Bò hë bivol. Amu bëzaa bafëdan bò bò ai zen esë e mod adaṅ mfaṅ. 35Ndò angatòbò a si, aloe b'awom ai bëbè, nyè ai bò na: Ngë mod ayi na abò mod osu, abò mod mvua ai olò bësë. 36Ndò anòṅ man mòngò, atëlë nyè a zaṅ dzaban, anòṅò nyè a mò moe, nyè ai bò na: 37E mod ayi soan ai mbòg ya e ban bòngò ba a dzoe dama, ma asoan ai nyè. E mod ki asoan ai ma, sëki ma asoan ai nyè, asoan ai e nyò angalom ma.

E mod osë aluman ki ai bia anë ai bia ngam

Lk 9,49-50

38Yohannes nyè ai nyè na: A ṅyëgëlë, biayen mod atsama bëbe minsisim a dzoe doe, ndò biayi nyè dò tele mvende, amu asëki ai bia esamba. 39Ndò Yesus adzo na: Të miakaman ai nyè. Amu mod ziṅ asëki dzam bò eyëṅ dzam a dzoe dama, angadugan vol kòbò ai ma abe. 40E mod asëki ai bia e ngam y'ayat, anë ai bia ngam dzia. 41E mod angânyuu mina elè mëndim hë asu miasye a dzoe Kristus, makad mina bëbëla na, angâdzèè ki efaè dzie.

Të wasogolo e mod mbòg a nsëm

Mt 18,6-9; Lk 17,1-2

42E mod angâbò na mbòg ya e ban abobod bayëbë ma ba aku mbëg, mbëṅ onë abui asu die na bëkëlë nyè akòg a kiṅ, bëwoa nyè a yòm. 43Ngë wò woe wakpè wa mbëg, tsigi wò. Anë mbëṅ na onyian ai wò mbòg a enyiṅ alodo na okë ai mò mëbè a tolendoṅ, a e ndoan enë të dim. [ 44#9,44 e hom nsòṅ waban wawu ki, ndoan dzaban tègè dim. ] 45Ngë akol doe lakpè wa mbëg, tsigi dò. Anë mbëṅ na onyian a enyiṅ ai akol da, alodo na bëwoa wa a tolendoṅ ai mëkol mëbè. 46Ngë dis doe lakpè wa mbëg, tui dò. Anë mbëṅ na onyian a edzoe Zamba ai dis dëda, alodo na bëwoa wa a tolendoṅ ai mis mëbè, [ 47#9,47 e hom nson waban wawu ki, ndoan dzaban tègè dim. ] 48mfa nsòṅ waban onë të wu, ndoan të dim. 49Amu mod osë ayi kidiban a nku ai ndoan. 50Nku onë mbëṅ. Ngë nku odzèè zam dzie, bayi wò bad kidi ai dze? Baalan nku abë mina, minyiṅ hm fë mvoè a zaṅ mina mina.

Currently Selected:

Mk 9: NTE12

Highlight

Copy