Lk 18

Nkana nkus mininga ban ntsigi-ntol

1Angabë akuu bò nkana na alëdë bò na bayean kogëlan mban, të tigbi, 2nyè na: Ntsigi-ntol ziṅan gabë a tisòn ziṅ, nyè ha të mbara Zamba, të kam mod. 3Nkus mininga wa ongabë a tisòn te, ndò akarëga sòṅ a bë nyè, nyè na: Komo ma adzo mëbëlë ai nziziṅ wama. 4Ndò eban engakog, nyè të yi kom adzo. A mvus hala, ndò abindi, nyè na: Tò anë mambara ki Zamba, ma të kam mod, 5mbol nkus mininga hi waandëgëlë ma, mayi nyè tsig ntol asu yë na të adugan ma sòṅ ndëgëlë abim mban te. 6Nti nyè na: vogëlan e dzam ndzodzongo ntsigi-ntol wadzo! 7Yë Zamba ayi bò të tsig ntol e bod boe angatòb, a bayon nyè a mis ai alu, ai amos, tò abò të bò vol vòli? 8Makad mina na ayi bò tsig ntol etye etye. Hë da, eyòṅ mòn mod ayi sò, yë ayi fò kòb ṅyëbë a si-ndon nga?

Nkana man farisea ban man nnòṅò ntòlò nnam

9Ndò aku bod bëziṅ ya bëtsogo na bënë sosoo, bëbyandigi e bod bëvòg nkana hi: 10Bod bëbè bëngabed a tempel na bakë kogëlan, mbòg man farisea, e nyò mbòg nnòṅò ntòlò. 11Ndò man farisea angatëbë, angakogëlan a nnëm etere na: A Zamba, makaṅ wa mbol masëki anë e bod bëvòg: bafadi, bënë dzongo, bandaman mëlug; masëki anë nnòṅò ntòlò nyò. 12Maki bidi a nguma sòndò biyòṅ bibè#18,12Man farisea adzo ha na aki bidi a nguma sòndò biyòṅ bibè. Bëfarisea bëbaala fò mvende abui, amu mvende edzoo na mod wayean ki bidi a nguma sòndò hë eyòṅ dzia, ndò bëfarisea bëngadzo na bayi kad ki biyòṅ bibè. Bëluman fò ai ngul abui na bëbò bësosoo bë bod., mayaan toya a e dzom esë mëbëlë. 13Mfa nnòṅò ntòlò, atëlë oyab nali, të të yi na abede mis a yob, dzam da angakud#18,13Eyòṅ mod wakud wamen ongon, nala osëki anë mfag binë mu na wakam, otaman wamen. Nala onë a nnam Yesus na wayëm na onë zëzë mod. emen a nkug, nyè na: A Zamba, yënë ma nsëmë minsëm ngòl. 14Makad mina: e nyò angadugan a nda dzie mfuban alodo e nyò mbòg. Amu e mod osë abede emen ayi dzòdiban, e nyò adzòdi emen ayi bedëban.

Yesus afubu ban bòngò

Mt 19,13-15; Mk 10,13-16

15Ndò bazu ai nyè ban bòngò na anamba bò. Bëyègè bëngayi yen nala, bëngasog ai bò. 16Ndò Yesus angaloe bòngò a fëfël, nyè na: Dzogan ban bòngò bëzu abë ma, të miakad kaman ai bò, amu edzoe Zamba yawoge ai kan te. 17Amen, makad mina na: E nyò osë ayi ki soan ai edzoe Zamba anë man mòngò, ayi ki nyian ete.

Nkukuma ndzoe ziṅ

Mt 19,16-30; Mk 10,17-31

18Ndò ndzoe ziṅ asili nyè na: A mbëmbë ṅyëgëlë, mayean bò dze asu yë na mëkyëbë ai enyiṅ kòm? 19Yesus nyè ai nyè na: Asu dze wadzo na mënë mbëṅ? Mod ziṅ asëki mbëṅ, hë Zamba etam. 20Wayëm mëmvende: Të wabò bisog, të wawoe, të wadzib, të watsig mbë mvaa#18,20: Em 20,13-16 (Dt.5,17-20), olugu esoa ban nyoa#18,20: Em 20,12 (Dt.5,16). 21Mod te nyè na: Mëbaala ya mam mëte mësë atarigi mëtoa mòngò. 22Awog Yesus angawog nala, nyè ai nyè na: Dzom engënë edzëman wa dzia: Kuan ai e byem bisë obëlë, okab mimbubua, abog te wayi bi ntam mëbugban a yob, ozu wabie ma. 23Angayi wog nala, antoa fò olun; Amu angabë nkukuma eyëgan. 24Mbol Yesus angayen anë angavëṅan olun, nyè na: Layi hm bò aye o, na e bod bëbëlë akuma bënyian a edzoe Zamba! 25Amu anë ebugbu abui na kamele alod a alò ondondò, alodo anë nkukuma anyian a edzoe Zamba. 26E bod bëvogolo bò na: Ndò hm za anë dzam kodeban? 27Nyè na: E dzom yakad bod yakad ki Zamba. 28Petrus nyè na: Yënë, bingamana lig bisë, bisò biatoṅ wa. 29Nyè ai bò na: Amen, makad mina na: Mod ziṅ asë na angalig nda, ngë nyia, ngë babënyaṅ, ngë bivuvuman, ngë bòn, asu edzoe Zamba, 30ndò ayi bò të bi nala abui biyòṅ a enyiṅ dzi, abii fë enyiṅ kòm a enyiṅ yazu.

Yesus akad eyòṅ lala na ayi wu, akui fë a sòṅ

Mt 20,17-19; Mk 10,32-34

31Ndò anòṅ bë awom ai bëbè, nyè ai bò na: Ma nyò mabed a Yerusalem, ndò e mam mësë mënë ntilan a bëprofèt mëtyan ai mòn mod mayi toban. 32Amu ayi kaban a mò bëhaiden, bëkpëlë nyè, bëtè nyè, bëtui nyè mëtè a nyòl, 33bëyidi nyè, bëwoe fë nyè, dzam da, a amos lala, atëbë a sòṅ. 34Bò të wog tò dzom; ndò adzo te angalaṅan bò ndimba nala, bò të wog e dzam Yesus angadzo.

Yesus abò ndindim mod mvoè a Yeriko

Mt 20,29-34; Mk 10,46-52

35Ndò angabò na, mbol angabë asubugu a Yeriko, ndindim ziṅ otoa a mgbag ndzòṅ, adzaègè byem. 36Mbol angawog nkunda bod olodo hi, angasili e dzom yalod. 37Ndò bakad nyè na Yesus man Nazaret ṅnyè alod. 38Asò hm vë kiṅ, nyè na: A Yesus, man David, yënë ma ngòl. 39E ba bëkëlë osu ha bëngasog ai nyè, bò na atòbò evol; nyè hë abam a yob ete na: A man David, yënë ma ngòl. 40Ndò Yesus angakom etye, abende na bëzu ai nyè abë nyè. Eyòṅ angasubu babi, ndò asili nyè na: 41Dze wayi na mëbò wa? Nyè na: a Nti, bò na mëyen! 42Yesus nyè ai nyè na: Yënë! Ṅyëbë woe onyii wa. 43Etye etye te, angayen, angakë atoṅ nyè, alugu Zamba. Ayen bëngayen nala, bod bësë bëngavë Zamba duma.

Currently Selected:

Lk 18: NTE12

Highlight

Copy