Lk 17

Bibug bi Yesus

Mt 18,6-7.21-22; Mk 9,42

1Nyè ai bëyègè boe na: asëki dzam bò na mëbobëla mëbò të bò, dzam da amala ai e mod azu ai mò. 2Lakyëbë ai nyè na bëkëlë nyè ngòg ozele a kiṅ, bëwoa nyè a maṅ, alodo na abobolo hë mbòg mbòg ya abobod di. 3Mibò okala! Ngë manyòṅ asëm, kòṅan ai nyè; ngë avëṅan, odzu nyè. 4Tò abyandi wa biyòṅ zamgbal a amos, asò abë wa biyòṅ zamgbal nyè na: Mayi vëṅan, odzu nyè. 5Ndò apostel bëngadzo ai Nti na: Bulugu bia ṅyëbë. 6Nti nyè na: ngë mibëlë ṅyëbë otoa anen anë fes ndoṅ, mikòbò ai mod ele na: Fumiṅi, okë bèban a maṅ; ngë adzo te lëmbòban nala ana. 7Za ya abë mina abëlë olò osye nyè a afub, ngë ki na okalëga nyè biyëm; eyòṅ olò te onkë sòṅ a afub ana, nyè ai wò na: Vologo sòṅ tòbò ha? 8Nga ayi dzo ai nyè na: Bò ma e dzom madi, tsendëge biyie, osye ma ntye madi, mënyaag, a mvus hala, wa ozu di, onyu fë? 9Yë ayi kaṅ mbò-esye mbol abò e mam babende nyè na abò? 10Nala hm fë ai mina, eyòṅ mimana ya bò e mam babende mina, dzoan na: Binë fò hë zëzë bëbò bisye; Bibò hë e dzi bihë bë na biabò.

Yesus asye minzëzam awom

11Eyòṅ akëlë a Yerusalem ha, ndò lazu bò na, angadaṅ a zaṅ Samaria ai Galilea. 12Ndò anganyian a dzal ziṅ, minzëzam mi fam awom misò toban ai nyè, ndò bëngatëbë man ntye, 13ndò bavë kiṅ, bò na: A Yesus, a ṅyëgëlë, yënë bia ngòl. 14Nyè ai bò na: Kaṅan lëdë bëfada nyòl dzan. Ndò labò na, bëkëlë a zen ha, ndò bamana bò mvoè. 15Mbòg ya abë bò, ayen angayen na abò ya mvoè, ndò angadugan, akë ataman Zamba a yob etere, 16ndò aku Yesus a mëkol ai asu a si, angakaṅ nyè. Nyè angabë hm man Samaritan. 17Yesus nyè na: Bësë awom bandzë bò mvoè a? E ba ebul bëvòg bënë ve? 18Bò bandzëki yen mfi ya adugan sòṅ vë Zamba olugu, hë e man ndzin nyò nga? 19Nyè ai nyè na: Tëbëgë, këlë. Ṅyëbë woe onyii wa.

Asò-lë edzoe

Mt 24,23-28.37-41

20Mbol bëfarisea bëngasili nyè abog edzoe Zamba yazu#17,20Bod bëyanga na edzoe Zamba yayi sò ai abui mësimba, ai biduṅ., ndò angayalan bò na: Edzoe Zamba yazu ki mbol wafòmbò, 21ndò fë bayi ki dzo na: Bëbëgë ha, bëbëgë hali, amu edzoe Zamba enë a zaṅ dzan. 22Nyè ai bëyègè na: Mëmos mazu a miayi tsog na miayen mbòg ya mëmos më mòn Zamba, dzam da miayi ki yen. 23Ndò bayi mina kad na: Yënë hali, ngë ki na yënë ha. Mibë kë, mibë bò toṅ. 24Amu akyaè felfes yakad fyè atarigi a abug yob di, akëlë kui e di avòg, nala ngò mòn mod ayi bò a amos woe. 25Dzam da, ayean tari dzugi abui, e mvòṅ nyi etimi fë nyè. 26Ndò akyaè angabë a abog Noe, nala ngò fë wayi bò a mëmos më mòn mod. 27Bëngabë bëdzaag, bënyaag, bëlugu, bëkëlë a mëlug, akui amos Noe anganyian a arka, ndò mvëṅ endëgëlë engasò, emana bò dzèè bësë. 28Anë fë lengabë a abog Lot; bëdzaag, bënyaag, bëkusu, bëkuan, bëloṅo. 29Hë amos Lot angakodo a Sodoma, ndò ndoan ai mëtaag bikye bingatye a yob, bimana bò bësë. 30Nala ngò fë wayi bò amos ya mòn mod ayi kulan. 31Amos te, e mod abëdë a ndil, akuma die atoa a nda, abë sus na akë dò nòṅ; e nyò ki anë a afub, dzam dëda. Abë dugan ai mvus. 32Tsogan mininga Lot. 33E nyò ayi dzëṅ na akode enyiṅ dzie ayi dzò dzèè; e nyò ki ayi dzò dzèè, ayi bëlë enyiṅ. 34Makad mina, alu te, bod bëbè bayi bò na, bëboo enòṅ dzia, bënòṅò mbòg, bëligi e nyò mbòg. 35Bininga bëbè bëkògò ovug fufulu, bënòṅò mbòg, bëligi e nyò mbòg. [ 36#17,36 bod bebè bayi tòbò a afub: bënònò mbòg, bëligi e nyò mbòg. ] 37Bò ai nyè na: Ahe, a Nti? Nyè ai bò na: E hom mbim odzogo, etere ngò fë ndoe yayi koan.

Currently Selected:

Lk 17: NTE12

Highlight

Copy