Lk 19

Yesus ban Zakeus

1Ndò Yesus anganyian a tisòn Yeriko#19,1Yeriko angabë tisòn makit. Edzoe Roma enòṅò toya etere abui. Ndzoe bënòṅò bë toya ya ete angabë Zakeus., angakë awulu. 2Ondzi na, mod ziṅ, dzoe na Zakeus ya angabë ndzoe bënòṅò bë toya, atoa fë nkukuma mod, 3angayi na ayen e mod emen anë Yesus, dzam da tègè ai zen asu nkunda bod, mbol hm fë angabë etun ntye. 4Ndò angakë mbil osu, abëdë a mod ele a yob, asu yë na ayen, amu Yesus angabë ayean lod ete. 5Akui angakui hom te, ndò Yesus abëbë a yob, nyè ai nyè na: A Zakeus, vologo sus a si, amu mayean tòbò a nda dzoe ana. 6Ndò fò avol sus, asoan ai nyè a nda dzie ai mintag. 7Bod bësë bëyënë adzo di, bëngakë banyiṅ ha na: Akë nyian abë mod minsëm na atòbò we. 8Ndò Zakeus atëbë a si, nyè ai Nti na: A Nti, yënë, mazu vë mimbubua efas akuma dama a zaṅ, ndò fë, ngë mëngafadi mod ziṅ dzom, mayi nyè dzò dugan biyòṅ binyii. 9Yesus nyè ai nyè na: Amos ya ana, akode anyian e nda nyi, amu nyè fë anë mòn Abraham. 10Amu mòn mod angasò na azu dzëṅ, akode fë e ba bënë a zen ndzaṅ.

Nkana minsaṅ mi mòni awom

Mt 25,14-30

11Bëwogo e mam ma, ndò adugan fèd, akuu bò nkana, amu bëngabë bësubu ya babi ai Yerusalem, bëngatsog na edzoe Zamba yazu yene etye etye te. 12Nyè hm na: Ntomba mod ziṅ ongakë a nnam oyab na akë nòṅ edzoe, adugan fë. 13Ndò aloe bëlò boe awom, avëë bò minsaṅ mi mòni awom, nyè ai bò na: Boan mëkit ete, ntye mënë a dulu. 14Bod ya ayòṅ die bësiṅi nyè, ndò bëngalom bod a mvus dzie na bëkë kad na: Biayi ki na e mod nyò adzoe bia. 15Eyòṅ hm akë dugan, hala abi ya edzoe, ndò abò na bëloe nyè bëlò boe ya angavë mòni, asu yë na ayëm anë bëngabò mëkit. 16Ndò e nyò osu angasò, nyè na: A nti, nsaṅ mòni woe obye minsaṅa wom. 17Nyè ai nyè na: Oyëm doe! a mbëmbë olò. Mbol hm obò mod afidi a ban mam, nòṅò edzoe a bëtisòn awom. 18E nyò bèè asòò, nyè na: nsaṅ mòni woe, a nti, obye minsaṅ mifë mitan. 19Nyè ai e nyòlò te na: Wa fë wazu dzoe bëtisòn bëtan. 20E nyò mbòg asòò, nyè na: a nti, nsaṅ mòni woe hi a mëngasòli a atiṅ eyie. 21Amu mëngabë mëmbarëga wa, mbol onë ṅyoyòg mod; wabodo e dzi waandzëki bede, okoe e dzi waandzëki bè. 22Nyè ai nyè na: Wakpèè wamen a adzo a anyu doe, a mbë olò. Ongabë oyëmë na mënë ayòg mod, mëbodogo e hom mandzëki bede, mëkoe e hom mandzëki bè nga? 23Ndò asu dze waandzëki vë mòni wama a baṅ? A hala, eyòṅ mësò ya, mëngakë nyè nòṅ ai mvug a yob! 24Ndò adzo ai e bod bëmbë tëlë nyè a mgbag na: Fadëgan nyè nsaṅ mòni, mivë e nyò abëlë minsaṅa wom. 25Bò ai nyè na: a nti, kë ambëlë ya minsaṅa wom a! 26Makad mina na bayi vë e mod osë ambëlë ya; e nyò abëlë ki, bayi nyè fadi tò e dzi abëlë. 27Mfa minziziṅ miama ya mingabë yi ki na mëdzoe bò, zaan ai bò ha, miwoe bò ha, mëtoa.

Yesus anyian a Yerusalem ai duma

Mt 21,1-11; Mk 11,1-11; Yoh 12,12-19

28Akòbògò e mam ma, ndò akë ai dulu osu, angabed a Yerusalem. 29Ndò labò na, eyòṅ angakui babi a Betfage ai Betania, a nkol baloe na nkol bile bi mbòn, ndò alom bëyègè bëbè 30nyè na: Kaṅan e dzal anë osu di, eyòṅ miayi nyian ete, miayi kòb man ozele atii, a mod ziṅ abë ya ki bed ete; mitii nyè, mizu ai nyè. 31Ngë mod ziṅ asili mina na: Asu dze miatii nyè? Mikada nyè na: Nti woe ayaṅan ai nyè. 32E ba bëngalom ba bëtye, bëkòbò fë anë angakad bò. 33Ndò batii man ozele, e bod bawoge ai nyè bò ai bò na: a dze miatii man ozele? 34Bò na: Nti ayaṅan ai nyè. 35Ndò bakë ai nyè abë Yesus, ndò bamana kub man ozele biwòman biaban a nyòl, bëbede Yesus ete. 36Ndò ayëm zen, bëngatè biwòman biaban a zen. 37Akui angakui babi a bëbod nkol bile bi mbòn, nguma nkunda bëyègè bëngatag, bëlugu Zamba a yob ete asu biyëṅ bi mam bisë bëngayen, 38bò na: Alugëban, e nyò azu, nkukuma, a dzoe Nti #19,38Bs 118,26. Mvoè a yob, duma a yob etere. 39Bëfarisea bëvòg ya nkunda ete ha bëngadzo ai nyè na: A ṅyëgëlë, kòbògò ai bëyègè boe. 40Nyè na: Makad mina, ngë bëku bivol, mëkòg mayi dò yedan a yob. 41Ndò eyòṅ angakui babi, ayënë tisòn, ndò angayon dzò a nyòl, 42nyè na: ngë wa oyëm amos hi e mam mazu ai mvoè! Etoa dzi, anë wa ndimba a mis. 43Amu mëmos mazu wa a nyòl a minziziṅ mie miayi wa loṅ oloṅ a nyòl#19,43Bëtisòn bëngabë nloṅan ai mod mfim mëkòg a nyòl a tè, amu bëmbarëga bita. Asu yë na bëzimbi bënyian etere a abog bita, bayean loṅ oloṅ na bëdaṅa nnëm ete., bëloṅo wa edinga a nyòl, bëngaluman ai wa mimfag misë, 44abog te bayi wa dib a si#19,41-44Yerusalem angaku mimboṅ asi a mbu 70 a mvus abyali Yesus., ai e bòn bënë wa a nyòl, të lig akòg abëdë e di avòg a yob, hë etòm ya na waandzëki yëm abog akode doe.

Yesus abò tempel mfuban

Mt 21,12-17; Mk 11,15-19; Yoh 2,13-22

45Ndò akë nyian a tempel, atari na atsidan bod bë mëkit, 46nyè ai bò na: Anë ntilan na: Nda dzama yayi bò nda ngogëlan#19,46Is.56,7, mina mibò ya dzò etoa miṅwuwub. 47Antoa, ayëgëlë a tempel amos osë. Bëfada bënen ai bësaṅa bëkalara bëngadzëṅ na bawoe nyè, tò bëtëbë bë osu ya nnam, 48bò të yëm mbol bënë dzam bò, amu nnam osë odiṅi na wavogolo nyè.

Currently Selected:

Lk 19: NTE12

Highlight

Copy