Lũka 10

Yesu akatuma Amakũmĩ Alinda

1Enyũma wʼaho, Omukama mwayisoga abandi bandu makũmĩ alinda, mwatumabo mo babiri babiri embere siwe, eriya oko mĩyĩ yosĩ aho iye asonda erĩhĩka. 2Neryo mwabwirabo ati, Ebyʼerigesa ni bingi, nĩkwa abahĩngĩ ni bake. Neryo musabe Omukama wʼerigesa atume abahĩngĩ omwʼigesa liwe. 3Mugende, mũlebaye, ngabatuma ngʼehyana hyʼesyombũlĩ omo katĩkatĩ kʼesyombwa syʼomolĩ. 4Simuheke erĩtũsĩ, kutse engunza, kutse esyongendero; kandi sĩmũbũkaye mundu omo nzira. 5Omugulu mukingira omo nyũmba, mũtsũke erĩbũga, muti, Obuholo bubye omo nyũmba eyĩ! 6Omundu wʼobuholo amabya aneho, Obuholo bwenyũ bwasyamubyako; nĩkwa bite bitya, ibwasuba ũkwʼĩnywe. 7Mwĩkale omo nyũmba eyo, imwalya ĩmwapũlya ebyo bakabaha; kusangwa omũhĩngĩ anatolere oluhembo luwe. Simubye mũkahũma-hũmĩra omo wandi manyũmba. 8Omugulu mukaya oko mũyĩ, bamabakokya, mulye ebyo bakabaha. 9Mũlamaye abakonĩ abali oko mũyĩ oyo, mubwire abandu bako muti, Obwami bwa Nyamuhanga bwamahĩka hakũhĩ nenyũ. 10Nĩkwa omugulu mukaya oko mũyĩ, bamatendĩbakokya muye oko syonzira syako nʼerĩbũga muti, 11Olũtũtũ lwʼomũyĩ wenyũ olukamakirira oko bisando byetu, tukakungutalo eribakunga; nĩkwa muminye ekĩ: obwami bwa Nyamuhanga bwamahĩka hakũhĩ nenyũ. 12Ngababwira nyiti, olubanza lwʼeSodomo lwasyabya luke kwilaba olubanza lwʼomũyĩ oyo ekiro kyʼeritswerwa.

Emĩyĩ eyagana erĩkĩrĩrya

(Mt 11.20-24)

13Obũlĩge ukʼuwe Korazĩnĩ! Obũlĩge ukʼuwe Betesaĩda! Kusangwa kumbe ebitiko-tiko ebyakolawa omwisi wenyũ, byalikolawa eTĩro nʼeSĩdona, kumbe babiribindula emitima nʼerireka ebibi kera ibanambite emisarandwe nʼerĩĩkala omwʼĩbũ! 14Kusangwa olubanza lwʼeTĩro nʼeSĩdona lwasyabya luke kwilaba olwenyũ oko kiro kyʼeritswera. 15Nawe Kapemaũmũ, wasyahamĩbwa elubula kwehĩ? Wasyandagalĩrĩbwa eKũlĩmũ!

16Yesu mwabwira abiga buwe ati, Oyũkabowa, akanyowa; nʼoyukabagana, akanyigana; nʼoyukanyigana, akagana oyo wanyituma.

Erisubula lyʼAmakũmĩ Alinda

17NʼAmakũmĩ alinda mobasubula nʼobutseme bati, Mukama, esyombĩnga mosyatowĩre omugulu twahanasyo omo lĩna lyawe! 18Yesu mwasũbĩryabo ati, Monalangira eSatanĩ ikatoga ngʼerĩpalya ĩkalũa elubula. 19Lebaya, nabiribaha ehamũlĩ yʼeriryatangirira esyonzoka, nʼesyonge, nʼerirenga obũtokĩ bosĩ bwʼenzĩgũ, isihali kindu kyangabahũtalya. 20Nĩkwa simutseme kusangwa ebĩrĩmũ bibi byabĩrĩbowa, nĩkwa mutseme kusangwa amena wenyũ abirisakwa elubula.

Yesu akatsema

(Mt 11.25-27; 13.16-17)

21Oko ndambĩ eyo Yesu mwatsema kutsibu omo Mũlĩmũ Abũyĩrĩre ati,

Ngakupipa uwe Tata, Omukama wʼelubula nʼowʼekihugo, wabĩrĩbĩsa emyatsi eyĩ oko bʼamenge nʼabanyima. Kandi Ega, Tata, kusangwa wabĩrĩbĩsũlĩrayo oko bana balere; ko byakũtsemesaya bitya omo meso wawe.

22Tata wage abirimba emyatsi yosĩ, kandi sihali oyo wasĩ Mugala nga nindi, nina Tata; kandi sihali oyo wasĩ Tata nga nindi, nina Mugala, nʼomundu oyo Mugala anzĩre erĩmũbĩsũlĩra.

23Neryo Yesu mwabindukira abiga buwe mwabwirirabo ahate mundu ati, Obutseme buli oko bakalangira emyatsi eyo mũlangĩre! 24Kusangwa ngababwira nyiti, abamĩnyererĩ bangi nʼabami mobasonda erilangira ebyo mukalangira, nĩkwa mobatalangirabyo, nʼerĩowa emyatsi eyo mũkowa, nĩkwa mobatowayo.

Omũsyo wʼOmũsamarĩa mubuya

25Neryo omũkangĩrĩrya wʼEmigambo mwahĩkaho nʼerimulengako ati, Mũkangĩrĩrya, nyikolekĩ inatoka eribana engebe yʼerikota kwehĩ? 26Yesu mwamũsũbĩrya ati, Ebĩsakĩre omo Migambo ni byahi kwehĩ? Ukasomabyo uti kwehĩ? 27Naye mwasũbĩrya ati, Litolere iwanza Omukama Nyamuhanga wawe omo mutima wawe gosĩ, nʼekĩrĩmũ kyawe kyosĩ, nʼomo maka wawe gosĩ, nʼomo bũlengekanĩa bwawe bosĩ; kandi iwanza mũlĩkyenyũ ngoko ũyanzĩre. 28Yesu mwamũsũbĩrya ati, Wabĩrĩsũbĩrya ndeke; Ukole utya, wasyabyaho. 29Nĩkwa omũkangĩrĩrya wʼEmigambo iniakasonda eriyiyira mo mutunganene, mwabũlya Yesu ati, Mũlĩkyetu nindi kwehĩ? 30Yesu mwamũsũbĩrya ati. Habya omundu oyo wabya akandagalira eYerĩko ĩnĩakalũa eYerũsalema. Neryo abanyeyĩ mobamũhũnga kwʼebyosĩ, mobamũhũnza neryo mobamũsĩga hakũhĩ nʼerihola. 31Neryo mũhererĩ muguma mwahĩkaho, iniakalaba omo nzira eyo. Omugulu omũhererĩ amulolako, mwayihengeka erilaba. 32Neryo Omũlawĩ abere ahĩkaho, naye mwamusamalira nʼeriyihengeka, mwalaba elutambi. 33Nĩkwa Omũsamarĩa, oyo wabya oko lugendo, mwahĩka ahali omundu oyo, neryo abere amulolako, mwamuganyira. 34Neryo mwaya aho ali, mũta amagũta nʼebĩnyũ oko bironda biwe nʼerisenga ebironda ebyo; kandi mwamũhĩra oko punda yiwe, mwamutwala oko hotele neryo mwamũtwanira. 35Omo ngyakya mwĩmya esyofranka magana abiri mwahasyo oko mwenye hotele ati, Ũnyĩtwanirireye, neryo ekiro nasyaswasa nasyakuha ebyo ukamulihira kwilaba esĩ. 36Neryo Yesu ati, Ũkaganĩraya uti nindi oko basatu aba yo wabya mũlĩkyabo mundu oyo wahambawa nʼabanyeyĩ kwehĩ? 37Omũkangĩrĩrya wʼEmigambo mwasũbĩrya ati, Oyo wamuganyira. Neryo Yesu mwamubwira ati, Ugende, nawe Ukole utya.

Marata na Marĩa

38Neryo omugulu Yesu nʼabiga buwe babya oko lugendo, mobingira oko kayĩ nʼeyo omũkalĩ oyo wahulawa mo Marata mwamũkokya omo nyũmba yiwe. 39Naye abya awite mwali wabo oyukahulawa mo Marĩa, oyo wĩkala hakũhĩ nʼebisando bya Yesu, nʼerĩowa ekĩnywa kyʼomukama. 40Nĩkwa Marata mwahanga-hangya omutima omo mĩbĩrĩ mingi yiwe; neryo mwahĩka uku Yesu mwabũga naye ati, Mukama, sulitanyĩkwĩra bũlĩge kusangwa mwali wetu abirinyitekera emĩbĩrĩ yosĩ kwehĩ? Umubwire uti anyĩwatĩkaye! 41Nĩkwa Omukama mwamũsũbĩrya ati, Marata, Marata! Ukayiganyira nʼeriganga-ganga busana nʼemyatsi mingi; 42nĩkwa omwatsi muguma atolere, kusangwa Marĩa abiriyisoga omwatsi mubuya owate angasagulwa.

Currently Selected:

Lũka 10: KB80

Highlight

Copy