Lũka 11

Erisaba

(Mt 6.9-13; 7.7-11)

1Oko mugulu muguma Yesu abya iniakayasabira halebe. Abere abuga erisaba, omuguma gʼoko biga buwe mwamubwira ati, Mukama, Ũtũkangĩrĩraye erisaba, ngoko Yoane akakangĩrĩraya abiga buwe. 2Yesu mwabwirabo ati, Omugulu mukasaba ĩmwabũga muti:

Tata,

Erĩna lyawe libye rĩbũyĩrĩre.

Obwami bwawe bwase.

3Utuhe obuli kiro akalyo ketu akatutolere.

4Utubuyire ebibi byetu,

Kusangwa netu tukabuyira obuli mundu oyukatukola nabi.

Sigututwale omwʼirengwako.

5Neryo Yesu mwabwira abiga buwe ati, Nindi kwĩnywe amabya nʼomwĩra wuwe, neryo akaya ewuwe omo katĩkanene, akamubwira ati, Mwĩra unyibweke mandu asatu. 6Kusangwa omwĩra wage, akalũa oko lugendo akambĩkako, nage singwite ebyʼerimuha. 7Nʼoyuli omo nyũmba asyamũsũbĩrya ati, Sũndũhaye; Olũyĩ lũkĩngĩre, nage nʼabana tuli omo ngyingo; sinditoka erihangana nʼerikuha kindu. 8Nyiti nomo atetahangana kusangwa nĩ mwĩra wuwe, nĩkwa busana nʼerimuhatikana, asyahangana nʼerimuha ebyosĩ ali nabyo bwaga. 9Nage ngabũga nenyũ nyiti, Mũbũlaye, neryo mwasyahabwakyo; mũsonda-sondaye, neryo mwasyabanakyo; mukongote oko lũyĩ, neryo mwasyakingulirwalo. 10Kusangwa oyũkabũlaya, asyangirirakyo, nʼoyukasonda-sonda asyabanakyo; nʼolũyĩ lwasyakingukala oko yukakongota kulo. 11Nindi kwĩnywe abotata oyo wangaha mugala wuwe yʼerĩbwe omugulu akabũlaya obundu kwehĩ? Kutse oyo wangamuha enzoka omugulu akabũlaya erĩhere kwehĩ? 12Kutse oyo wangamuha enge, omugulu akabũlaya eriyi kwehĩ? 13Nomo mune ababi, mũnasĩ eriha abana benyũ bʼolũsũnzo lubuya. Tata wenyũ wʼelubula syalabĩre aho eriha Omũlĩmũ Abũyĩrĩre oko bakamũbũlaya kwehĩ?

Yesu na Belzebũlĩ

(Mt 12.22-30; Mk 3.20-27)

14Yesu abya akahigira embĩnga yʼeyĩhya oko yo wabya mũmũ. Neryo embĩnga yabere yabĩmũlũako, omundu oyo mwatsũka erĩbũga. Nʼesyondeko mosyasweka. 15Nĩkwa abandi bʼesyondeko mobabũga bati, Belzebũlĩ, omukama wʼesyombĩnga akamuha maka wʼerihigasyo. 16Nʼabandi mobasonda erimulengako, bati akangayebo ekitiko-tiko ekĩkalũa elubula. 17Nĩkwa Yesu mwaminya obũlengekanĩa bwabo, neryo mwabwirabo ati, Obwami obũkayĩrwanaya bukabya kĩhũma, nʼekĩtũnga ekĩkayĩrwanaya kikasambukala. 18Kandi eSatanĩ yamayĩrwanĩa, obwami bwayo bwasyahangana buti kwehĩ? Kusangwa mũkabũga muti, Belzebũlĩ akamba amaka wʼerihiga esyombĩnga. 19Kandi ĩngye namabya ngahigira esyombĩnga syʼeyĩhya omo maka wa Belzebũlĩ, abana benyũ, bakahigirasyo eyĩhya omo maka wandi kwehĩ? Neryo abana benyũ basyabya batswerĩ benyũ. 20Nĩkwa ĩngye ngahigira esyombĩnga syʼeyĩhya omo maka wa Nyamuhanga, kundi obwami bwa Nyamuhanga bwabĩrĩbahĩkako.

21Omugulu embangĩ yamabiambala ebindu byʼamalwa, akategaya omũyĩ wuwe, ebindu biwe biri nʼobuholo. 22Nĩkwa omugulu omundu oyũmũlengĩre amaka akamuhamba nʼerĩmũkĩnda, akamũlũsaya kwʼebindu biwe byosĩ byʼamalwa, ebyo ayiketere, kandi akagaba ebyo ahũnga.

23Oyute haguma nage, akanyigana, nʼoyutegesa haguma nage akapanza-panza.

Ekĩrĩmũ kibi kikasubamo

(Mt 12.43-45)

24Omugulu ekĩrĩmũ kibi kĩkalũa omo mundu, kikalendera ikyalaba ahate magetsi, ikikasonda-sonda ahʼeriluhukira; kyamabulaho, kikayibwira kiti, Ngandisuba omo nyũmba yage eyo nasĩga. 25Neryo kyamabĩhĩkaho kĩkeya enyũmba eyo ĩyĩnabĩrĩrye, ĩyĩnakomĩre. 26Neryo kikahuluka ikyaleta ebindi bĩrĩmũ birinda bibi kwilabakyo, neryo ibingiramo nʼerĩĩkalamo. Endũlĩ yʼomundu oyo ikabya nyibi kwilaba erĩmbere.

Obutseme bwʼekwenene

27Yesu abere abĩbũga omwatsi oyũ, omũkalĩ muguma gʼoko ndeko mwabũga naye ati, Obutseme buli oko mũkalĩ oyo wakubuta nʼamabere ago walyako! 28Nĩkwa Yesu mwamũsũbĩrya ati, Ko bite bitya, nĩkwa obutseme buli oko bakowa ekĩnywa kya Nyamuhanga nʼerikolakyo.

Endeko bakabũlaya ekitiko-tiko

(Mt 12.38-42)

29Neryo esyondeko babya bakakama, Yesu mwabũga ati, Abandu bʼomugulu ono ni babi! Bakasonda-sonda ekitiko-tiko ngʼekiminyikalo. Nĩkwa sibendisyahabwakyo, kyenʼekitiko-tiko kya Yona. 30Kusangwa ngoko Yona abya kĩmĩnyĩsyo busana nʼabandu bʼeNĩnawe, litya Omugala wʼOmundu asyabya kĩmĩnyĩsyo busana nʼabandu bʼolulengo olũ. 31Omwami wʼobũkalĩ wʼeLutambi lwʼeYĩkwa asyahangana oko kiro kyʼeritswerwa, nʼerĩsĩnga abandu bʼolulengo olũ, kusangwa alũa oko ndũlĩ syʼekihugo busana nʼerĩowa amenge wa Solomono; neryo lebaya, oyũlengĩre Solomono ane hano. 32Abandu bʼeNĩnawe basyahangana oko kiro kyʼeritswerwa nʼerĩsĩnga abandu bʼolulengo olũ, kusangwa babindula emitima erireka ebibi okwʼĩtũlago lya Yona. Kandi lebaya, oyũlengĩre Yona ane hano!

Etala nʼomubiri

(Mt 5.15; 6.22,23)

33Sihali mundu oyũkakaya etala neryo akahĩrayo ahabĩsamĩre, kutse omwisi wʼekitiri, nĩkwa oko mbaniko, neryo abandu abakingira omo nyũmba batoke erilangira ekyakakala. 34Etala yʼomubiri rye rĩso. Omugulu erĩso lyawe likalangira, omubiri wawe gosĩ akũsũla nʼekyakakala; nĩkwa erĩso lyawe lyamabya libi, omubiri wawe akũsũla mʼomwĩrĩmya. 35Neryo mũtegaye ekyakakala ekiri omwisi wenyũ sikibye mwĩrĩmya. 36Neryo omubiri wawe gosĩ amabya oswĩre nʼekyakakala, isiawite omwanya ali mʼomwĩrĩmya, asyabya nʼerĩkangabasanĩa ehosĩ, ngoko etala ĩkakoleraya nʼerĩhenĩa lyayo.

Yesu akahandikirira Abafarĩsayo nʼabakangĩrĩrya bʼEmigambo

(Mt 23.1-36; Mk 12.38-40)

37Neryo Yesu abere abibuga erĩtũlago, Umũfarĩsayo mwamũbũlya ati alye haguma naye; neryo Yesu mwayamo mwĩkala okwʼirya. 38Omũfarĩsayo mwasweka kusangwa Yesu mwatatsũka erinaba embere wʼerirya. 39Nĩkwa Omukama mwamubwira ati, Ĩnywe Bafarĩsayo mũkeraya endambi syʼolũtehĩ nʼekibindi; nĩkwa omwisi moswĩre erinyega nʼobubi. 40Ĩnywe bakĩrũ! Nyamuhanga oyo wahangika endambi, mwatahangika nʼomwisi nibya kwehĩ? 41Nĩkwa mugabire abandu bera ebiri omwisi wʼolũtehĩ nʼekibindi, neryo ebyosĩ byasyera.

42Nĩkwa obũlĩge kwĩnywe Bafarĩsayo! Kusangwa mukaha Nyamuhanga ekiguma kyʼomwʼĩkũmĩ kya munanaa, nʼomũchĩcha, nʼesindi nyenyĩ syosĩ, nĩkwa ĩmũkasĩganaya erĩbanza nʼerianza Nyamuhanga. Kumbe mukakola ebĩ nʼerĩtendĩsĩganĩa ebindi.

43Obũlĩge kwĩnywe Bafarĩsayo! Mukanza ebĩtũmbĩ byʼembere omo manyũmba wʼerĩhĩndanamo, nʼerĩkerĩbwa omo hitale. 44Obũlĩge kwĩnywe, kusangwa muli ngʼesisinda esitaminyikere, nʼabandu bakalaba endata kusyo ĩsĩbasĩsyo.

45Omuguma gʼoko bakangĩrĩrya bʼEmigambo mwamubwira ati, Mũkangĩrĩrya, omugulu ũkabũga utya ukatutsuma nibya. 46Yesu mwasũbĩrya ati, Obũlĩge kwĩnywe bakangĩrĩrya bʼEmigambo nibya! Kusangwa mũkahekaya abandu emiheke eyĩkalĩre erihekwa, nenyũ sĩmwetũlaya oko miheke eyo kʼomunwe erĩwatĩkyabo erihekayo. 47Obũlĩge kwĩnywe! Kusangwa mwahĩmba esisinda syʼabamĩnyererĩ, kandi abotata-kulu benyũ bo banĩtabo. 48Kandi muli balangĩrĩ ĩmũkalĩga emĩbĩrĩ yʼabotata-kulu benyũ; kusangwa mobĩta abamĩnyererĩ, nenyũ mũkahĩmba esisinda syabo. 49Busana nʼomwatsi oyũ, Amenge wa Nyamuhanga mwabũga ati, Nasyatumirabo abamĩnyererĩ nʼabakwenda, kandi basyĩta abandi ba kubo nʼerĩendererya abandi. 50Neryo abandu ba sesene basyasuyirwa busana nʼomusasi wʼabamĩnyererĩ bosĩ erĩtsũka omugulu Nyamuhanga ahangika ekihugo, 51erĩtsũka oko musasi wa Abelĩ, erĩhĩka oko musasi wa Zakarĩa oyo wakwĩra omo katĩkatĩ kʼekiherero nʼenyũmba ya Nyamuhanga. Ega, ngababwira nyiti, abandu bʼomugulu ono basyasuyirwa busana nʼabosĩ abo!

52Obũlĩge kwĩnywe, abakangĩrĩrya bʼEmigambo! Mwabiritwala olufungula lwʼenyũmba yʼamenge; nenyũ simwetingira, kandi momwakakĩrya ababya bakasonda eriingiramo.

53Neryo abere alũayo, abakangĩrĩrya bʼEmigambo, nʼAbafarĩsayo mobatsũka erilwa naye nʼerĩmũbũlya nabi busana nʼemyatsi mingi, 54ibakamulinda erimutega omo myatsi angabũga.

Currently Selected:

Lũka 11: KB80

Highlight

Copy