Lũka 12

Erikunga busana nʼerĩyĩtendererya

(Mt 10.26-27)

1Omugulu amaelfu wʼabandu babya ĩbabĩrĩhĩndana haguma; kyaleka ibalyatangirirana, Yesu mwatsũka eribwira abiga buwe ati, Mũyĩtegaye busana nʼekĩhamya kyʼAbafarĩsayo. Ekyo nĩ ʼyĩtendererya. 2Nĩkwa sihali ekĩkũnĩngĩrwe ekitendisyabĩsũlwa, nʼekĩbĩsamĩre ekitendisyamĩnyĩkalĩbwa. 3Neryo omwatsi wahi ogo mwabĩrĩkanĩrya omo mwirĩmya asyowĩrwa omwʼitungi, nʼebyo mwabĩrĩbũga omo bihwehwe omo bisenge byʼenyũmba byasyatũlwa oko lutwe lwʼenyũmba.

Twangubahandi?

(Mt 10.28-31)

4Bĩra bage, ngababwira nyiti, simubahe abakĩta omubiri, nʼenyũma wʼaho isibawite ebyo bangaswakola. 5Nĩkwa ngandĩbakangya abo mwangubaha: Mubahe Nyamuhanga, oyo amabĩta, iniawite ehamũlĩ erigusa omo Kũlĩmũ. Ega, ngababwira nyiti, mumubahe!

6Ehĩnyonyũ hitanu sĩhyegũlĩbawa oko senge ĩbĩrĩ kwehĩ? Nĩkwa Nyamuhanga Sialibirirawa nʼakaguma ka kuhyo. 7Kandi esyonzwiri syʼoko mitwe yenyũ sĩnaganzĩrwe esyosĩ. Neryo simubahe, muli bʼobũgũlĩ bunene kwilaba obũgũlĩ bwʼehĩnyonyũ hingi.

Erĩkanganĩa Kristo embere syʼabandu

(Mt 10.32-33; 12.32; 10.19-20)

8Ngababwira, nyiti, obuli mundu ũkanyĩkanganaya embere syʼabandu, Omugala wʼOmundu asyamũkanganĩa embere syʼabamalaĩka ba Nyamuhanga. 9Nĩkwa oyukanyigana embere syʼabandu, Omugala wʼOmundu asyamugana embere syʼabamalaĩka ba Nyamuhanga.

10Kandi obuli mundu oyo wasyanegulira Omugala wʼOmundu, asyabuyirwa; nĩkwa oyukatsuma Omũlĩmũ Abũyĩrĩre, siendisyabuyirwa.

11Omugulu bakabaleta embere syʼamanyũmba wʼerĩhĩndanamo, nʼabatabalĩ, nʼabʼehamũlĩ, sĩmũhahũkaye emitima nga mwasyasũbĩrya bokĩ, kutse ebyo mwangabũga. 12Kusangwa Omũlĩmũ Abũyĩrĩre asyabakangĩrĩrya oko ndambĩ eyo ebyo mutolere erĩbũga.

Omũsyo wʼomundu mũkĩrũ wʼebindu

13Neryo omundu gʼoko ndeko mwabwira Yesu ati, Mũkangĩrĩrya, ubwire mugala wetu uti, tugabe obũsokĩ obo tata wetu atũsĩgĩra. 14Nĩkwa Yesu mwamubwira ati, Uwe mulume, nindi wanyiyira mo mũtswerĩ wenyũ, kutse mo mũgabĩ wʼobũsokĩ bwenyũ kwehĩ? 15Neryo Yesu mwabwirabo ati, Mũlebaye, kandi mũyĩtegaye okwʼirumwa lyosĩ, kusangwa engebe yʼomundu si busana nʼobungi bwʼebindu biwe. 16Neryo Yesu mwabwirabo omũsyo oyũ ati, Ekitaka kyʼomundu wʼebindu mokyerya bingi. 17Neryo omundu oyo mwatsũka erĩganĩrya omo mutima wuwe ati, Nasyakolakĩ kwehĩ? Kusangwa singwite ahʼeribika ebyalya byage byosĩ. 18Neryo mwayibwira ati, Ngandikola ekĩ: ĩnahĩmbũla ebigona byage, ĩnahĩmbabyo mo binene kwʼebĩ, nʼeyo, nasyabika ebyalya byage nʼebindu byage. 19Neryo nasyabwira omutima wage nyiti, Mutima, uwite bindu binene bĩbĩkĩre busana nʼemyaka mingi. Uhumule, ulye, Ũpũlaye, ũyĩtsemesaye. 20Nĩkwa Nyamuhanga mwamubwira ati, Uwe mũkĩrũ, omo kiro ekĩ engebe yawe ikandibirikirwa, nʼebindu ebyo wabiribika byasyabya byandi kwehĩ? 21Neryo, omundu oyukayibikira ebindu, kwʼali atya, nĩkwa siawite bindu busana na Nyamuhanga.

Uyiketere Nyamuhanga

(Mt 6.25-34)

22Neryo Yesu mwabwira abiga buwe ati, Busana nʼomwatsi oyũ ngababwira nyiti, Simubye nʼerĩyĩlũhya nʼamaganĩryo busana nʼengebe yenyũ, muti mwasyalyakĩ, kutse busana nʼomubiri, nga mwasyambalakĩ. 23Kusangwa engebe ĩrengĩre ebyalya, nʼomubiri alengĩre esyongimba. 24Mũlebaye ebikororo, kusangwa sibyebiba kutse sibyegesa; wite embĩso kutse ekigona; nĩkwa Nyamuhanga akalĩsayabyo; nenyũ muli bʼobũgũlĩ bungi kwilaba esyonyonyũ esyo! 25Nindi kwĩnywe amayĩlũhya busana nʼamaganĩryo anganatoka eritomekera emyaka yiwe kwehĩ? 26Neryo mwamataluka oko mwatsi muke, busana nakĩ mũkayĩlũhaya nʼamaganĩryo busana nʼeyindi myatsi kwehĩ? 27Mũlebaye ebiranga-ranga, ngoko bikalasa; Sibyenuba, kutse eriluka esyongimba; nikwa ngababwira nyiti, Solomono nʼolukengerwa luwe losĩ mwatambala ndeke ngʼomusanga muguma oyũ. 28Nĩkwa Nyamuhanga oyũkambalaya ebiti byʼomolĩ, ebikabyaho mũnabwĩre nʼomo ngyakya bikagusawa omo lĩko. Siendisyabambalya kwilaba aho kwehĩ? Ĩnywe bandu bʼerĩkĩrĩrya ĩke. 29Kandi simusonde ebyo mwasyalya, nʼebyo mwasyapũlya, kandi simuhanga-hangaye emitima. 30Kusangwa ebihanda byʼekihugo bikasonda-sondaya ebindu byosĩ ebyo, nĩkwa Tata wenyũ anasĩ ebibali bwaga. 31Nĩkwa mũtsũke erisonda obwami bwa Nyamuhanga, naye asyabaha ebindu ebĩ.

Ebindu ebiri elubula

(Mt 6.19-21)

32Ekĩhyo kike, simubahe kusangwa kikatsemesaya Tata wenyũ yo ndeke, eribaha Obwami. 33Mũgũlaye ebindu byenyũ, muhe esyofranka syʼoko bera. Muyibanire amatũsĩ awatekula, muyibikire ebindu elubula ebitekeha, ahatehĩka mũrahĩ, nʼehinyurugunzu sihyeherayabyo. 34Kusangwa ahali ebindu byenyũ, hʼemitima yenyũ yasyabya nibya.

Abagombe abakategaya

35Mubye imunambite, ĩmũnasĩkĩre, mwakaye esyotala syenyũ. 36Mubye ngʼabagombe abakalinda omukama wabo aho asyasubulira okwʼirya lyʼerĩherũkya. Omugulu asyasa nʼerikongota oko lũyĩ, basyamukingulira lũba. 37Obutseme buli oko bagombe abo omugulu omukama wabo akegayabo ibabiribuka ĩbanasĩkĩre! Kwenene ngabũga nenyũ, asyaboha embindi yiwe, ĩnĩkalyabo okwʼirya, neryo ĩnĩahĩkaho, nʼerikolerabo. 38Obutseme buli nʼabagombe abo mukama wabo ameyabo ĩbanasĩkĩre kutse amasa omo kĩsĩsĩmũko kyʼakabiri, kutse ekyʼakasatu. 39Kandi muminye ndeke kumbe Omwenye nyũmba alibya asĩ endambĩ yahi omũrahĩ akandĩhĩka, kumbe Sĩangalekĩre enyũmba yiwe ikatulwa. 40Nenyũ nibya, mubye ĩmũnasĩkĩre; kusangwa Omugala wʼOmundu asyasa oko ndambĩ mũtalengekenĩe.

Omugombe oyuteregula

(Mt 24.45-51)

41Neryo Petero mwabũga ati, Mukama, ũkatwa omũsyo oyũ busana netu, kutse busana nʼabandu bosĩ kwehĩ? 42Neryo Omukama mwasũbĩrya ati, Omwĩmanĩrĩ oyuteregula owʼamenge nindi kwehĩ? Ni mundu oyo mukama wuwe asyamũhĩra erĩrebya abagombe buwe, erihabo erĩgabo lyabo lyʼakalyo oko mugulu atolere. 43Obutseme buli oko mugombe oyo mukama wuwe amamweya akakola atya omugulu akahĩka eka! 44Kwenene ngababwira nyiti, Omukama oyo asyamuyira mo mũteya wʼebindu biwe byosĩ. 45Nĩkwa omugombe oyo amayibwira omo mutima wuwe ati, Omukama wage sialitasa lũba, ĩnĩatsũka erĩswĩrya abagombe bʼobulume nʼabʼobũkalĩ, nʼerirya, nʼerĩpũlya nʼerĩkũnda, 46omukama wʼomugombe oyo asyasa ekiro atemulindirira, nʼoko ndambĩ atasĩ; omukama oyo asyamũtsũtsanga mo bitswe-bitswe, nʼerimuha omwanya haguma nʼabatĩkĩrĩrye.

47Nĩkwa omugombe oyo wabya wasĩ erisonda lyʼomukama wuwe mwatayĩtegekanĩa, kutse erikola ebyo mukama wuwe anzĩre, asyaswĩrĩbwa esyonyambĩ nyingi. 48Nĩkwa omugombe oyũtasĩ ebyo mukama wuwe anzĩre, neryo akakola emĩbĩrĩ eyitolere akaswĩrĩbwa, asyaswĩrĩbwa nyike. Omundu oyukahabawa bingi, asyabũlĩbwa bingiĩ nʼomundu oyo wabĩkĩbawa bingi, asyabũlĩbwa bingi.

Yesu akagaba abandu

(Mt 10.34-36)

49Nabĩrĩhĩka erĩtwana omuliro oko kihugo; nyanzĩre kumbe abiriaka! 50Nĩkwa ngwite erĩbatĩsya eryo nangabatĩsĩbwamo, kandi ngakwa engitsi eririnda ekiro lyasyabererera. 51Mũkaganĩraya muti nasa erireta Obuholo omo kihugo kwehĩ? Nyiti iyihi, nĩkwa erigabana. 52Erĩtsũka lino omo nyũmba nguma hasyabya bandu batanu abagabene. Abasatu basyalwa nʼababiri, nʼababiri basyalwa nʼabasatu. 53Basyagabana, tata asyalwa nʼomwana; nʼomwana asyalwa nʼĩse wuwe; nyĩnya asyalwa na mwali, na mwali asyalwa na nyĩnya; nyĩnyĩ-byala asyalwa na mwalĩana, na mwalĩana asyalwa na nyĩnyĩ-byala.

Eriminya emigulu

(Mt 16.2-3)

54Kandi Yesu abya akabwira endeko ati, Omugulu mukalangira ekĩtũ kikahangana ebwanga bwʼeyĩkwa, mũkabũga muti, embũla ikandiwa, ko biri bitya. 55Nʼomugulu mũkowa erihunga lyʼeLutambi lwʼeYĩkwa likabuhirira, muti, Bukandikya mũnabwĩre; neryo ko biri bitya. 56Ĩnywe batebya! Mũnasĩ eriminyerera erisosa lyʼekihugo nʼeryʼekyanya; nĩkwa busana nakĩ sĩmwasĩ eriminyerera omugulu wa sesene kwehĩ?

Usangane nʼenzĩgũ yawe

(Mt 5.25,26)

57Busana nakĩ simwetswera ĩnywebene ekitunganene kwehĩ? 58Omundu amakutsongera akakutwala oko kilondero, ulenge erisangana naye omo nzira, sĩakũkolaye oko mũtswerĩ, nʼomũtswerĩ erĩkũhererya omũpolĩsĩ, nʼomũpolĩsĩ iniakugusa omo mũlĩkĩ. 59Ngakubwira nyiti, Sĩwendĩsyalũaho ute waliha esenge yʼenyũma-nyũma eyikabugirira olubanza olo.

Currently Selected:

Lũka 12: KB80

Highlight

Copy