Lũka 13

Ũlũe kwʼebibi byawe, ubinduke

1Oko mugulu oyo habya bandu ababwira Yesu omwatsi wʼAbanya Galĩlaya abo Pilato ĩta omugulu babya bakahera ehongo uku Nyamuhanga.

2Yesu mwasũbĩryabo ati, Mũkaganĩraya muti Abanya Galĩlaya aba babya bakola-nabi kwilaba abandi Banya Galĩlaya bosĩ, kusangwa bagalĩbawa batya kwehĩ? 3Ngababwira nyiti, Iyihi! Nĩkwa nenyũ, mwamatendibindula emitima yenyũ erireka ebibi, ĩnywe bosĩ mwasyahera ngoko banahera batya. 4Kutse mũkaganĩraya muti abandu erĩkũmĩ nʼomunani eSĩloamũ abatererawako nʼenyũmba eyĩsũngũlĩkĩre, abahola, muti babya babi kwilaba abandu bosĩ abĩkere eYerũsalema kwehĩ? 5Ngababwira nyiti, Iyihi! Nĩkwa mwamatendibindula emitima yenyũ erireka ebibi, ĩnywe bosĩ mwasyahera ngoko banahera batya.

Omũsyo wʼomũtĩnĩ owataheta

6Neryo Yesu mwatwĩrabo omũsyo oyũ ati, Omundu abya nʼomuti wʼomũtĩnĩ owaherawa omwʼirima liwe lyʼebĩnyũ. Neryo omundu oyo mwahĩka erisonda kwʼebĩgũma, mwatabana byoko. 7Neryo mwabwira Omũlĩmĩ wuwe ati, Talebaya, emyaka ĩsatu nabĩrĩhĩka ngasonda-sonda ebĩgũma oko muti wʼomũtĩnĩ oyũ isinditabana byoko. Ukondego! Busana nakĩ akalũhaya ekitaka kwehĩ? 8Nʼomũlĩmĩ oyo mwamũsũbĩrya ati, Watalekago, Mukama, oko mwaka oyũ nataswatakula hakũhĩ nago nʼerĩhĩra omuboga. 9Omuti amahetya ebĩgũma oko gundi mwaka, lyowene. Nĩkwa amatendiheta oko gundi mwaka, iwakondago.

Yesu akalamaya omũkalĩ oyũlehemĩre

10Oko kiro kyʼeSabato Yesu abya akakangĩrĩrya omo nyũmba nguma yʼerĩhĩndanamo. 11Omũkalĩ abyaho oyo wabya kwʼekĩrĩmũ kibi ekyamũlwalaya emyaka erĩkũmĩ nʼomunani. Omũkalĩ oyo abya akondomĩre isialitoka erĩũnamukala. 12Yesu abere amulolako, mwamubirikira ati, Mũkalĩ, wamaboholwa kwʼendwala yawe! 13Neryo Yesu mwamũhĩra kwʼebyala biwe; neryo-neryo mwatũngananĩbwa, neryo mwatsũka eripipa Nyamuhanga. 14Nĩkwa omũtabalĩ wʼenyũmba yʼerĩhĩndanamo mwahitana, kusangwa Yesu mwalamya abandu oko kiro kyʼeSabato, neryo mwabwira abandu ati, Hali biro ndatu byʼerikolwamo omũbĩrĩ; mubye mukasa omo biro ebyo mũlamĩbawe, butsira ekiro kyʼeSabato! 15Nĩkwa Omukama mwamũsũbĩrya ati, Ĩnywe batebya! Obuli mundu kwĩnywe sialihangula ende yiwe kutse epunda yiwe eyiri omo nyũmba, nʼerĩnywĩsyayo oko kiro kyʼeSabato kwehĩ? 16Nʼomũkalĩ oyo, mwali wa Abrahamũ, oyo eSatanĩ yaboha emyaka erĩkũmĩ nʼomunani, siritolere akaboholwa omo mũlĩkĩ oyũ, oko kiro kyʼeSabato kwehĩ? 17Neryo abere akabũga ebĩ, esyonzĩgũ siwe syosĩ mosyahemuka; nʼendeko yosĩ moyatsemera emyatsi yosĩ yʼeriswekera eyo Yesu akola.

Omũsyo wʼembuto yʼeharadalĩ

(Mt 13.31-32; Mk 4.30-32)

18Neryo Yesu mwabũga ati, Obwami bwa Nyamuhanga bulingene nakĩ kwehĩ? Kandi nasyalĩngĩrĩranĩabo nakĩ kwehĩ? 19Bulingene nʼembuto yʼeharadalĩ eyo mundu ĩmaya nʼeribibayo omwʼirima liwe; nayo moyakula moyabya muti munene, nʼesyonyonyũ syʼekyanya mosyahĩmba esyonyutu syasyo oko mitahi yago.

Omũsyo wʼekĩhamya

(Mt 13.33)

20Kandi Yesu mwabũlya ati, Nasyasosekanĩa Obwami bwa Nyamuhanga nakĩ kwehĩ? 21Busosene nʼekĩhamya omũkalĩ ĩmaya; mwabĩsakyo omo hĩrengĩ hisatu hyʼeyĩsyano, nʼeyosĩ moyahama.

Olũkyo luke

(Mt 7.13-14,21-23)

22Kandi Yesu mwalaba omo mĩyĩ nʼehĩyĩ, ĩnĩakakangĩrĩraya, nʼerikwama enzira yiwe eriya eYerũsalema. 23Neryo omundu mwamũbũlya ati, Mukama, abakalamĩbawa ni bake kwehĩ? Yesu mwamũsũbĩrya ati, 24Mulenge kutsibu eriingira omo lũkyo luke, kusangwa ngababwira nyiti, Ni bangi abasyasondasonda eriingiramo, isibendisyatoka. 25Omwenye enyũmba amabihangana nʼerikinga Olũyĩ, nenyũ mũkatsũka erihangana eyĩhya nʼerikongota oko lũyĩ, muti, Mukama, utukingulire! Neryo asyabasũbĩrya nʼeribabwira ati, Sĩnyasĩ eyo mũkalũa. 26Neryo mwasyatsũka erĩbũga muti, motwalya, motwapũlĩrya embere syawe; kandi mowakangĩrĩrya omo nzira syʼewetu. 27Naye asyabũga kandi ati, Ngababwira nyiti, Sĩnyasĩ eyo mũkalũa. Mũlũe aho nyiri, ĩnywe bosĩ abakolĩ bʼebibi! 28Eyo hasyabya eririra nʼerikeregeta ameno, omugulu mukalangira Abrahamũ na Ĩsaka, na Yakobo, nʼabamĩnyererĩ bosĩ omo Bwami bwa Nyamuhanga, nenyũ imukagusawa eyĩhya. 29Abandu basyalũa eyo eryuba likahulukira, nʼeyo likalengera, nʼoko Lutambi lwʼeNdata, nʼoko Lutambi lwʼeYĩkwa, basyĩkala oko mesa okwʼirya omo Bwami bwa Nyamuhanga. 30Neryo lebaya, hali bʼenyũma abasyabya bʼerĩmbere, kandi hali abʼerĩmbere abasyabya bʼenyũma.

Yesu akalira busana nʼeYerũsalema

(Mt 23.37-39)

31Oko katambĩ ako, abandi Bafarĩsayo mobahĩka bakamubwira bati, Ugende, Ũlũe hano, kusangwa Herode anzĩre erĩkwĩta. 32Yesu mwasũbĩryabo ati, Mugende mubwire eboha eyo muti, Lebaya, ngahiga esyombĩnga nʼerikola omũbĩrĩ wʼerĩlamya mũnabwĩre nʼomo ngyakya, nʼoko kiro kyʼebisatu nasyabugirira omũbĩrĩ wage. 33Nĩkwa litolere inakwama olugendo lwage mũnabwĩre, nʼomo ngyakya, na mwalindi; siritolere omũmĩnyererĩ akakwĩra eyĩhya wʼeYerũsalema.

34Uwe Yerũsalema, Yerũsalema! Ũkĩta abamĩnyererĩ nʼerĩĩtabo omo mabwe abatumawa ukʼuwe! Ngendo singahi nabya nyanzĩre erĩhĩndanĩa abana bawe bo haguma, ngʼerĩbũtĩ ko lĩkahĩndanaya emĩpyege yalyo omo bĩpũpa byalyo, nĩkwa Simwabya mwanzĩre! 35Mũlebaye, oko wenyũ kwasyasĩgala mo kĩma. Ngababwira nyiti, Simwendisyanyilolako erĩhĩka aho mwasyabũgĩra muti, Nyamuhanga atsumule oyukasa omo lĩna lyʼomukama!

Currently Selected:

Lũka 13: KB80

Highlight

Copy