Lũka 9

Yesu akatuma abiga ĩkũmĩ nʼababiri

(Mt 10.5-15; Mk 6.7-13)

1Neryo Yesu mwabirikira abiga ĩkũmĩ nʼababiri bo haguma, mwahabo obũtokĩ nʼehamũlĩ yʼerihiga esyombĩnga syosĩ, nʼerĩlamya abakonĩ. 2Neryo mwatumabo erĩtũla omwatsi wʼobwami bwa Nyamuhanga nʼerĩlamya abakonĩ. 3Kandi mwabwirabo ati, Simutwale kindu busana nʼolugendo lwenyũ, kutse omũtso, kutse engunza, kutse akalyo, kutse franka, kutse esyokanzu ĩbĩrĩ. 4Nʼomo nyũmba eyo bakabakokayamo, mwĩkalemo erĩhĩka aho mwasyalũĩra oko mũyi oyo. 5Nʼaho abandu bakagana erĩbakokya, omugulu mũkalũa oko mũyĩ oyo imwakunguta olũtũtũ oluli oko bisando byenyũ, busana nʼerĩmĩnyĩsyabo. 6Neryo abiga mobahongoka nʼerigenda omo mĩyĩ yosĩ, erĩtũla Engulu Yowene, nʼerĩlamya abandu ehosĩ.

Herode akatika-tikira Yesu

(Mt 14.1-12; Mk 6.14-29)

7Herode, omũtabalĩ wʼeGalĩlaya, mowa emyatsi yosĩ eyabere, neryo mwahanga-hangya omutima, kusangwa abandi bandu bati, Yoane Mũbatĩsya abĩrĩlũbũka oko baholĩ! 8Abandi bati, Elĩa abiriswahuluka, nʼabandi bati, Omuguma gʼoko bamĩnyererĩ ba kera abirisuba. 9Herode ati, Yoane monamũtwa kʼomutwe, omundu oyo nindi oyo ngowa kwʼemyatsi eyĩ kwehĩ? Neryo Herode mwasonda-sonda erilola uku Yesu.

Yesu akũgũtaya abandu elfu ĩtanu (5,000)

(Mt 14.13-21; Mk 6.30-44; Yn 6.1-14)

10Neryo abakwenda babere babisubula, mobabwira Yesu emyatsi yosĩ bakola. Neryo Yesu mwatwalabo oko mũyĩ owakahulawa mo Betesaĩda. 11Nʼesyondeko syabere syaminya, mosyamukwama. Naye mwakokyabo, iniakabwirabo omwatsi wʼobwami bwa Nyamuhanga, neryo mwalamya ababya nʼobwaga bwʼerĩlamĩbwa.

12Neryo bwabere bwasonda erihumbera, abiga erĩkũmĩ nʼababiri mobamũhikako bati, Ulagane nʼendeko batoke eriya omo mĩyĩ nʼamalima ebĩhererenĩe, batoke eriyagotserayo nʼeribana ebyʼerirya; kusangwa tuli eno yʼomo mbwarara. 13Nĩkwa Yesu mwabwirabo ati, Nenyũ muhebo akʼerirya. Nabo mobabũga bati, Situwite bindi, wa nʼamandu atanu nʼamahere abiri. Wanzĩre itwayagula ebyalya busana nʼabandu bosĩ aba kwehĩ? 14Abalume ababyaho babya nga elfu ĩtanu (5,000). Neryo Yesu mwabwira abiga buwe ati, Mwĩkalaye abandu mo ndeko-ndeko yʼamakũmĩ atanu-atanu. 15Neryo abiga mobakola batya, mobĩkalya abandu bosĩ bʼahisi. 16Neryo Yesu mwĩmya amandu atanu nʼamahere abiri, mwalalamira endata elubula, neryo mwatsumula kalyo ako, neryo mwatsũtsangago mwahabyo oko biga ati bahĩrebyo embere syʼabandu omo ndeko. 17Abosĩ mobalya, mobũgũta. Neryo abiga mobasonga-songya ebyasaka, ebitiri ĩkũmĩ nʼebibiri byʼebitahangukira.

Erĩtũlago lya Petero busana na Yesu

(Mt 16.13-19; Mk 8.27-29)

18Omugulu Yesu abya akasaba ĩyowene, abiga mobamũhĩkako, neryo Yesu mwabũlyabo ati, Esyondeko sĩkabũga siti nyirindi kwehĩ? 19Mobamũsũbĩrya bati, Abandi bati uli Yoane Mũbatĩsya, nĩkwa abandi bati uli Elĩa, nʼabandi bati, omuguma gʼoko bamĩnyererĩ ba kera oyo wabĩrĩlũbũka. 20Neryo Yesu mwabũlyabo ati, Nenyũ, mũkabũga muti nyirindi kwehĩ? Petero mwamũsũbĩrya ati, Uli Kristo wa Nyamuhanga.

Yesu akahula obũlĩge buwe nʼoluholo

(Mt 16.20-28; Mk 8.30—9.1)

21Neryo Yesu mwaganĩabo nʼerihanabo ati sibabwire omwatsi oyũ go mundu, 22ati, Omugala wʼOmundu atolere iniagalwa kutsibu, nʼeriganwa nʼabakulu, nʼabahererĩ bakulu, nʼabakangĩrĩrya bʼEmigambo nʼakandi ĩnĩĩtwa, neryo enyũma wʼebiro bisatu ĩnĩalũbũkĩbwa.

23Neryo Yesu mwabwira abosĩ ati, Omundu amanza erinyikwama, ayigane, aheke omusalaba wuwe obuli kiro, anyikwame. 24Kusangwa omundu Oyukasonda erĩlamya engebe yiwe asyatalyayo; nʼomundu Oyũkatalaya engebe yiwe busana nage asyalamyayo. 25Omundu akabana endũndĩ yahi; amatunda ekihugo kyosĩ nĩkwa akatalya engebe yiwe kwehĩ? 26Nĩkwa omundu amanyĩkwa esĩsonĩ, nʼeripona ebĩnywa byage, Omugala wʼOmundu asyamũkwa esĩsonĩ omugulu asyasa omo lukengerwa luwe, nʼolwa Tata wuwe, nʼolwʼabamalaĩka babũyĩrĩre. 27Nĩkwa ngababwira kwenene nyiti, Hali abandu abimene hano, abatendisyahola bate balangira Obwami bwa Nyamuhanga.

Yesu akakanaya na Musa na Elĩa oko kitwa

(Mt 17.1-8; Mk 9.2-8)

28Neryo enyũma wʼerĩbũga emyatsi eyĩ, nga biro munani, Yesu mwĩmya Petero na Yakobo na Yoane haguma naye, mobaya oko kitwa eriyasabirayo. 29Neryo abere anemusaba, erisosa lyʼobũsũ buwe molyahinduka, nʼesyongimba siwe mosyahenĩa nʼerĩkangabasanĩa. 30Neryo lebaya, abandu babiri babya bakakanĩa naye; babya Musa na Elĩa. 31Ibakabutuka omwʼĩkangabasanĩa lyʼelubula, ĩbakakanaya omwatsi wʼoluholo luwe olo akasyaholera eYerũsalema. 32Nĩkwa Petero nʼababya naye mobayitsingirako nʼotũgotserĩ; nĩkwa babere babuka, mobalangira erĩkangabasanĩa liwe nʼabandu babiri ibanahangene haguma naye. 33Neryo abandu abo omugulu basonda erigenda, Petero mwabũga na Yesu ati, Mukama, lyowene ko tuli hano; tũhĩmbe amahema asatu, enguma busana nawe, nʼenguma busana na Musa, nʼenguma busana na Elĩa, ĩsĩasĩ ngʼakabũgakĩ. 34Abere anemũbũga ebĩ, ekĩtũ mokyahuluka mokyasũkũlĩryabo; nabo mobubaha omugulu ekĩtũ kyasũkũlĩrayabo. 35Neryo omulenge mwalũa omo kĩtũ ati, Oyũ ni Mugala wage, Omusombolwa wage; mũmowe! 36Neryo omulenge abere abĩũmbya, Yesu mwabanikaho ĩyowene. Abiga mobabya bũkũtũ, mobatabwira mundu omo biro ebyo emyatsi eyo balialangira.

Yesu akalamaya omũlwana oyuli kwʼesyombĩnga

(Mt 17.14-18; Mk 9.14-27)

37Neryo engyakya mobandagala bakalũa oko kitwa, nʼendeko nene moyahĩndana na Yesu. 38Neryo omundu oyo wabya omo ndeko mwabũga nʼomulenge munene ati, Mũkangĩrĩrya! ngakulembalemba nyiti Ũlebaye omwana wage oyo nyĩbũtĩre, ĩyowene musa! 39Neryo akahambawa nʼekĩrĩmũ, neryo inialaka, kandi kĩkamũsala-salaya, iniaburura erĩhũlo, kandi kĩkamũhũnzanga, sikirimuleka lũba. 40Monalemba-lembĩre abiga bawe nyiti bakiguse eyĩhya, nĩkwa mobatalũkĩre. 41Yesu mwasũbĩrya ati, Ĩnywe lulengo lwʼerĩtendĩkĩrĩrya nʼolwʼobuhaka, nasyĩkala nenyũ omo mugulu gungahi, nasyababegerya mugulu gungahi kwehĩ? Ulete mugala wawe yo hano. 42Neryo abere anemwasa embĩnga eyo moyamugusa ahisi, moyamũgala-galya. Nĩkwa Yesu mwakunga ekĩrĩmũ kibi ekyo, mwalamya omwana, neryo mwamũsũbya ũkwʼĩse wuwe. 43Nĩkwa abandu bosĩ mobasweka kutsibu busana nʼobũtokĩ bunene bwa Nyamuhanga.

Yesu akahula oluholo luwe kandi

(Mt 17.22,23; Mk 9.30-32)

44Nĩkwa omugulu abandu bosĩ babya bakaswekera emĩbĩrĩ Yesu abya akakola, Yesu mwabwira abiga buwe ati, Muhulikirire ebĩnywa ebĩ, kusangwa Omugala wʼOmundu asyahoterwa oko bandu. 45Nĩkwa mobataminya ekĩnywa ekĩ, kandi mokyabĩswa kubo, sibaminyekyo, kandi babya bakubaha erĩmũbũlya enzumwa yʼomwatsi oyũ.

Omukulu nindi?

(Mt 18.1-5; Mk 9.33-37)

46Neryo mohabya obuhaka omo katĩkatĩ kabo nindi nga yo mukulu. 47Nĩkwa Yesu mwaminya ebyo babya bakaganĩrya omo mitima yabo, neryo mwĩmya omwana mulere mwamũhanganĩa hakũhĩ naye, 48neryo mwabwirabo ati, Omundu oyũkakokaya omwana mulere ngʼoyũ omo lĩna lyage akanyĩkokaya; nʼoyũkanyĩkokaya, akakokaya oyo wanyituma. Kusangwa oyuli muke omo katĩkatĩ kenyũ yo mukulu.

Oyute bwanĩse nawe ali oko luhande lwawe

(Mk 9.38-40)

49Neryo Yoane mwasũbĩrya ati, Mukama motwalangira omundu akahiga esyombĩnga omo lĩna lyawe; neryo motwalenga erĩmũkakĩrya kusangwa isiali oko ndeko yetu. 50Nĩkwa Yesu mwamubwira ati, Sĩmũmũkakĩraye, kusangwa oyute nzĩgũ yenyũ iniali oko luhande lwenyũ.

Abanya Samarĩa bakagana erĩkokya Yesu

51Neryo ebiro bya Yesu byʼeritwalwa elubula byabere byasonda erĩhĩka hakũhĩ, mwahĩra omutima wuwe oko lugendo lwʼeriya eYerũsalema. 52Neryo mwatuma abakwenda embere siwe. Nabo mobahongoka, mobingira omo mũyĩ wʼAbanya Samarĩa, erĩkokotya aho angahĩkĩra. 53Nĩkwa abandu bayo mobatamũkokya kusangwa ĩnĩabĩrĩhĩra omutima wuwe eriya eYerũsalema. 54Neryo omugulu abiga buwe, ye Yakobo na Yoane balangira omwatsi oyũ, mobabũga bati, Mukama, wanzĩre itwabirikira omuliro alũe elubula nʼeribugabo kwehĩ? 55Nĩkwa Yesu mwakeberabo, mwakungabo ati, Sĩmwasĩ omũsĩndo wʼekĩrĩmũ muliko. 56Kusangwa Omugala wʼOmundu mwatasa erĩherya esyongebe syʼabandu, nĩkwa busana nʼerĩlamyasyo. Neryo mobaya oko gundi mũyĩ.

Erikwama Yesu nĩkĩ?

(Mt 8.19-22)

57Neryo babere banemugenda omo nzira, omundu muguma mwabwira Yesu ati, Ngandikukwama ehosĩ ukandiya. 58Yesu mwamubwira ati, Esyoboha sinawite ebyũna, nʼesyonyonyũ syʼomo kyanya esyonyutu; nĩkwa Omugala wʼOmundu siawite aho angagotserya omutwe wuwe. 59Neryo Yesu mwabwira ogundi mundu ati, Unyikwame; nĩkwa mwabũga ati, Mukama, uleke nyĩtsũke eriyata tata wage. 60Nĩkwa Yesu mwamubwira ati, Uleke abaholĩ bate abaholĩ babo. Nĩkwa uwe ugende ehosĩ ũtũle omwatsi wʼobwami bwa Nyamuhanga. 61Ogundi mundu mwabũga ati, Mukama, ngandisyakukwama, nĩkwa uleke ngayalagana nʼabʼewetu. 62Yesu mwamubwira ati, Sihali oyukawata okwʼĩsũka neryo akakebera enyũma, akatolera obwami bwa Nyamuhanga.

Currently Selected:

Lũka 9: KB80

Highlight

Copy