Yoane 16

1Nabiribabwira emyatsi eyĩ, neryo simwangahũka-hũkya emitima yenyũ. 2Basyabahiga-hĩganĩa omo manyũmba wabo wʼerĩhĩndanamo. Kandi omugulu asyasa, neryo oyukabĩta asyaganĩrya ngʼakakola omũbĩrĩ wa Nyamuhanga. 3Basyakola emyatsi eyĩ, kusangwa sibetaminya Tata kutse ĩngye. 4Nĩkwa nabiribabwira emyatsi eyĩ, neryo omugulu endambĩ yabo yasyahĩka, imwatoka erĩyĩbũkyayo ngoko mababwira.

Omũbĩrĩ wʼOmũlĩmũ Abũyĩrĩre

Mondababwira emyatsi eyĩ erĩmbere kusangwa nabya haguma nenyũ. 5Nĩkwa lino ngaya ukwʼoyo wanyituma; kandi sihali mundu ũkwʼĩnywe oyũkambũlaya ati, Ukaya hahi kwehĩ? 6Nĩkwa kusangwa nabiribabwira emyatsi eyĩ, emitima yenyũ ĩkũsũla nʼobũlĩge. 7Ngababwira omwatsi wʼekwenene nyiti, Lyowene busana nenyũ inagenda, kusangwa namatendigenda, Omũwatĩkya isiendisyabahĩkako. Nĩkwa namagenda nasyabatumiraye. 8Naye asyabya asa, asyasĩnga ekihugo busana nʼebibi, kandi busana nʼomwatsi wʼebitunganene, kandi busana nʼomwatsi wʼeritswera lya Nyamuhanga. 9Asyasĩngabo omo mwatsi wʼebibi, kusangwa sĩbalĩnykĩrĩraya. 10Kandi asyasĩngakyo busana nʼeritunganene, kusangwa ngaya uku Tata, nenyũ imutaswanyilolako. 11Kandi asyasĩngabo omo mwatsi wʼeritswera, kusangwa omũtabalĩ wʼekihugo kino abiritswerwa.

12Ĩngye nyiwite eyindi myatsi mingi yʼeribabwira, nĩkwa Simwangatoka erĩowayo lino. 13Nĩkwa omugulu Omũlĩmũ wʼomwatsi wʼekwenene asyasa, iye asyabasondola omo myatsi yosĩ yʼekwenene, kusangwa siendĩsyabũga omo hamũlĩ yiwe ĩyowene, nĩkwa asyababwira ebyo akowa, kandi asyabatũlĩra emyatsi eyo eyĩkandĩsyahĩka. 14Asyanyipipa, kusangwa asyimya emyatsi eyo ngabũga nʼerĩbatũlĩrayo. 15Emyatsi yosĩ eyo Tata awite ni yage; kyaleka ĩnabũga nyiti, Asyĩmya emyatsi eyo ngabũga, nʼerĩbatũlĩrayo.

Obũlĩge nʼobutseme

16Hakĩsĩya katambĩ kake, neryo imutaswanyilolako; kandi enyũma wʼaho hake, imwasyanyilolako. 17Abandi bʼoko biga buwe mobabwirana bati, Ekĩ ni kyahi? Ekyo akatubwira ati, Hakĩsĩya katambĩ kake imutaswanyilolako; kandi enyũma wʼaho hake, imwaswanyilolako. Kandi ati, Kusangwa ngaya uku Tata. 18Neryo babya bakabũga bati, Ekĩ ni kyahi akabũga ati, Akatambĩ kake kwehĩ? Sĩtwasĩ ebyo akahula. 19Yesu mwaminya ko bakasonda erĩmũbũlya, neryo mwabwirabo ati, Mongabũga nyiti, Hakĩsĩya katambĩ kake, imutaswanyilolako, kandi enyũma wʼaho hake, imwasyanyilolako. Ebyo byo mũkabũlaya omo katĩkatĩ kenyũ kwehĩ? 20Kwenene, kwenene ngabũga nenyũ nyiti, Mwasyalira nʼerilaka, nĩkwa ekihugo kyasyatsema. Mwasyabya nʼobũlĩge, nĩkwa obũlĩge bwenyũ bwasyahinduka mo butseme. 21Omũkalĩ omugulu akakunda ali nʼobũlĩge kusangwa endambĩ yiwe yabĩrĩhĩka; nĩkwa omugulu amabibuta omwana, sialisyibuka kandi eriagalwa liwe, nĩkwa akatsema ati, Omwana amabibutwa omo kihugo. 22Neryo, nenyũ nibya muli nʼobũlĩge lino; nĩkwa nasyaswabalolako kandi, nʼemitima yenyũ yasyatsema, kandi sihali mundu oyo wasyabasagula obutseme bwenyũ.

23Neryo oko kiro ekyo sĩmwendĩsyanyĩbũlyakĩ. Kwenene, kwenene ngababwira, Ekĩndũkĩ mwasyabũlya Tata, asyabahakyo kusangwa muli biga bage. 24Erĩhĩka lino, sĩmwetabũlyakĩ omo lĩna lyage; mũbũlaye, neryo mwasyabanakyo, obutseme bwenyũ butoke erĩhĩkana.

Erĩkĩnda ekihugo

25Nabiribabwira emyatsi eyĩ omo mĩsyo. Omugulu asyasa neryo sindiendisyababwira umu mĩsyo, nĩkwa nasyababwira ndeke-ndeke emyatsi ya Tata. 26Oko kiro ekyo, mwasyabũlya omo lĩna lyage; sĩndĩbũga nenyũ nyiti, Nasyabũlya Tata busana nenyũ; 27kusangwa ye Tata abanzĩre. Abanzĩre kusangwa mũnyanzĩre, kandi kusangwa mwabĩrĩkĩrĩrya ko nalũa ewa Nyamuhanga. 28Nalũa uku Tata, kandi monahĩka omo kihugo; neryo ngalũa omo kihugo nʼeriya uku Tata.

29Neryo abiga buwe mobamubwira bati, Lero, ũkabũga netu ndeke-ndeke, sũlĩbũga omo mĩsyo. 30Lino tũnasĩ ko wasĩ emyatsi yosĩ, kandi, suli nʼobwaga omundu akakũbũlya mwatsi. Ekĩ kikaleka ĩtwĩkĩrĩrya ko walũa uku Nyamuhanga. 31Yesu mwasũbĩryabo ati, Mwamĩkĩrĩrya lino kwehĩ? 32Lebaya, endambĩ yasyasa, kandi endambĩ eyo yabĩrĩhĩka, omugulu mwasyapanza-panzirwa obuli mundu eka wuwe, mwasyanyĩsĩga ĩngyowene. Nĩkwa Sindi ĩngyowene, kusangwa Tata ali haguma nage. 33Namababwira emyatsi eyĩ imwabana Obuholo busana nʼerimatikana nage. Omo kihugo mwasyabana erĩendererĩbwa. Nĩkwa muhande emitima! Nabĩrĩkĩnda ekihugo!

Currently Selected:

Yoane 16: KB80

Highlight

Copy