Yoane 17

Yesu akasabira abiga buwe

1Neryo Yesu mwabũga emyatsi, neryo mwalalamira elubula ati, Tata endambĩ yabĩrĩhĩka; uhe Omugala wawe olukengerwa, Omugala atoke erikuha olukengerwa. 2Kandi ngoko wabirimuha ehamũlĩ oko bandu bosĩ, iniatoka eriha engebe yʼerikota oko bosĩ wamuha. 3Neryo eyĩ ni ngebe yʼerikota, abandu bakuminye, uwe Nyamuhanga muguma wʼekwenene, nʼeriminya Yesu Kristo, oyo watuma. 4Monakũsĩkya omo kihugo; nabiribuga omũbĩrĩ ogo wamba erikola. 5Na lino, Tata, ũnyĩsĩkaye embere syawe, kandi omo lukengerwa olo nabya nalo haguma nawe ekihugo kite kyahangikwa,

6Monakũmĩnyĩkalya oko bandu wamba omo kihugo. Babya bawe kandi mowambabo. Kandi babirikenga ekĩnywa kyawe. 7Na lino, banasĩ kwʼemyatsi yosĩ eyo wamba ĩkalũa ukʼuwe. 8Kusangwa ebĩnywa ebyo wamba nabirihabyobo, kandi babiriangirirabyo, baririminya kwenene ko nalũa ewawe, kandi mobĩkĩrĩrya ko wanyituma.

9Ngasabirabo. Sindisabira ekihugo, nĩkwa ngasabira abo wamba, kusangwa ni bawe. 10Nʼemyatsi yosĩ ni yawe, nʼemyatsi yawe ni yage, kandi emyatsi eyo yabĩrĩnyĩsĩkya. 11Neryo lino ngakũhĩkako, nage sinyikiri kandi omo kihugo, nĩkwa ibo bali omo kihugo. Tata Iwe Ũbũyĩrĩre! Ũtegayebo omo bũtokĩ bwʼerĩna lyawe, eryo wamba, babye muguma, ngoko tuli muguma. 12Omugulu nabya nabo, monateyabo omo bũtokĩ bwʼerĩna lyawe, eryo wamba. Monateyabo, kandi mohatahera mundu nʼomuguma, yo nʼowʼerihera, busana nʼerĩberererya Amasako. 13Neryo ngasa ukʼuwe, nʼemyatsi eyĩ ngabũgayo omo kihugo, ibatoka eribya nʼobutseme bwage obũhĩkene omo mitima yabo. 14Monahabo ekĩnywa kyawe, nʼekihugo mokyakwabo obusu, kusangwa si bʼekihugo, ngoko nyite wʼekihugo. 15Sĩndĩkũbũlaya nyiti, Ũlũsayebo omo kihugo, nĩkwa ngakũbũlaya nyiti, Ũtegayebo oko Mubi. 16Si bʼekihugo, ngoko nyite wʼekihugo. 17Uhigulebo omo mwatsi wʼekwenene. Ekĩnywa kyawe ni mwatsi wʼekwenene. 18Monatumabo omo kihugo, ngoko wanyituma omo kihugo. 19Kandi ngayiha ukʼuwe busana nabo, ibatoka eribya bawe kwenene.

20Sindisaba busana nʼaba ĩbobene, nĩkwa busana nʼabakandisyanyĩkĩrĩrya busana nʼerĩtũlago lyabo. 21Ngasaba nyiti abosĩ babye muguma. Uwe Tata! Nyiti, bamatikane ũkwʼĩtwe, ngoko umatikene kwĩngye, kandi nage nyimatikene ukʼuwe, neryo ekihugo kĩkĩrĩraye kʼuli inina we wanyituma. 22Nabirihabo olukengerwa olo wabirimba, babye muguma ngoko tuli muguma. 23Ĩngye nyimatikene kubo, nawe umatikene ũkwʼĩngye, nabo bahĩkane omo buguma, neryo ekihugo kiminye kʼuli inina we wanyituma, kandi wabirianzabo, ngoko wabirinyanza.

24Tata, ngasonda nyiti, abo wabirimba babye haguma nage, balangire olukengerwa lwage olo wabirimba; kusangwa wanyanza ekihugo isikiri kyahangikwa. 25Uwe Tata uwe utunganene! Ekihugo nomo kitenetakuminya, nĩkwa nabirikuminya, kandi aba nabo babirikuminya kʼuli inina we wanyituma. 26Kandi nabĩrĩkũmĩnyĩsya kubo neryo nasyaswakũmĩnyĩsya; neryo olwanzo olo wanyanzamo lubye omo mitima yabo, nage inamatikana nabo.

Currently Selected:

Yoane 17: KB80

Highlight

Copy