Yoane 15

Muhangane tũlũe hano.

Yesu nĩ mũlĩkĩ wʼebĩnyũ wʼekwenene

1Ĩngye indi mũlĩkĩ-rĩkĩ wʼebĩnyũ wʼekwenene, kandi Tata wage nĩ mũlĩmĩrĩ. 2Obuli mutahi owamatikene nage, owateheta kwʼebĩgũma, akatwago; kandi oko buli mutahi Owakahetaya ebĩgũma, akasara kugo kwʼebĩtawene, Omutahi oyo atoke eriheta kwʼebindi bĩgũma. 3Mwabiriera busana nʼekĩnywa ekyo nabiribabwira. 4Mumatikane kwĩngye, nage ngandimatikana kwĩnywe. Ngoko Omutahi sialĩhetaya ebĩgũma ĩgowene, amatendimatikana nʼendĩna yʼebĩnyũ, litya nenyũ Simwangatoka erireta endũndĩ uku Nyamuhanga mutamatikene ũkwʼĩngye.

5Ĩngye indi ndĩna yʼebĩnyũ, nenyũ muli mitahi. Oyumatikene nage, nage nyimatikene naye, yo yukayira endũndĩ nene busana na Nyamuhanga. Kusangwa mutamatikene nage Simwangatoka erikolakĩ. 6Omundu amatindamatikana nage, akagusawa eyĩhya ngʼomutahi, iniuma, Emitahi ngʼeyĩ ikakumirawa haguma, iyaguswa omo muliro iyahya. 7Mwamamatikana kwĩngye, nʼebĩnywa byage bĩkĩkala omo mitima yenyũ, mũbũlaye ekĩndũkĩ ekyo mwanzĩre, neryo mwasyakolerwakyo. 8Mwamayira endũndĩ nene, Tata wage akasĩkĩbawa busana nʼekyo, kandi mũkakangaya ko muli biga bage. 9Nabiribanza ngoko Tata abirinyanza. Mwĩkale omo lwanzo lwage. 10Mwamakenga ebihano byage, mwasyĩkala omo lwanzo lwage, ngoko nage nabirikenga ebihano bya Tata wage, neryo nyĩkere omo lwanzo luwe. 11Nabiribabwira emyatsi eyĩ, obutseme bwage bubye omo mitima yenyũ, kandi obutseme bwenyũ bũhĩkane. 12Ekihano kyage kiti: mwanzane, ngoko nabiribanza. 13Sihali mundu oyuwite olwanzo lũlengĩre olũ, ati omundu akasiga engebe yiwe busana nʼabĩra buwe. 14Nenyũ muli bĩra bage, mwamakola ebyo ngabahana. 15Sindibahula kandi mo bagombe kusangwa omugombe sialiminya ebyo mukama wuwe akakola. Nĩkwa ngabahula mo bĩra, kusangwa nabĩrĩbamĩnyĩsya emyatsi yosĩ eyo ngowa uku Tata wage. 16Simwetayisoga ngye, nĩkwa nayisoga nywe, kandi nabĩrĩbahĩra eriyatunda endũndĩ, kandi endũndĩ yenyũ iyatoka eribyaho. Neryo Tata asyabaha ekĩndũkĩ ekyo mũkabũlaya omo lĩna lyage. 17Neryo ngabahana nyiti, Mwanzane.

Obusu bwʼekihugo

18Ekihugo kyamabakwa obusu, muminye ko kyanyĩkwa obusu embere wʼerĩbakwabo. 19Nga muli bʼekihugo, kumbe ekihugo kyangabanzĩre ngʼabakyo. Nĩkwa nayisoga nywe omo kihugo kino, kandi Simuli bakyo; kikaleka ekihugo ĩkyabakwa obusu. 20Mwibuke ekĩnywa ekyo nababwira nyiti, Omugombe sialengĩre omukama wuwe. Bamabya babĩrĩnyendererya, nenyũ basyabendererya nibya; bamabya bakengĩre ekĩnywa kyage, basyakenga nʼekyenyũ nibya. 21Nĩkwa basyabakola emyatsi yosĩ eyĩ kusangwa muli bandu bage, kusangwa sĩbasĩ oyo wanyituma. 22Kumbe nyitasa nʼerĩbũga nabo, nga sibawite olubanza lwʼebibi, nĩkwa lino sibawite eriyigana ebibi byabo. 23Oyũkanyĩkwa obusu, akakwa Tata wage yʼobusu. 24Kumbe sinditakola emĩbĩrĩ omo katĩkatĩ kabo eyitakolawa nʼogundi mundu, Sibangabya nʼolubanza lwʼebibi; nĩkwa lino babirinyilolako, kandi babĩrĩnyĩkwa obusu, ĩngye na Tata wage nibya. 25Nĩkwa babirikola ekĩ, ekĩnywa kibererere ekyasakawa omo Migambo yabo, iti, Banyĩkwa obusu butsira ekikaleka.

26Omugulu Omũwatĩkya asyasa, oyo nasyatuma akalũa ewa Tata, Omũlĩmũ wʼomwatsi wʼekwenene, oyũkalũa uku Tata, akandĩsyatũla omwatsi wage. 27Nenyũ nibya, mwasyatũla omwatsi wage, kusangwa mwabiribya haguma nage erĩtsũka erĩmbere.

Currently Selected:

Yoane 15: KB80

Highlight

Copy