Avagalatiya 6

Twikangalilage na ukwitanga

1Vanyalukolo wone mumuwone umuyenyu ananzile, nyenye yemwilongoswa na Umuhe mumukenyelage umunu uyo hilo, ulwene mupigilage iso muwulele, kono we mukwikomalila yinyenye, mulongamugelwe na yinyenye kangi. 2Mwitangage ukwitegusa ifitegulo fyenyu na palulo mukwisa ululagilo lwa Kilisito. 3Wone uyumwi akwipulika ulwa umwene kinu kumbi si kinu, uyo ava akwisanga weiyena. 4Yeyeavesaga munu igosage mumikalile jakwe. Wone give minofu apo peahwanite ihela mwa cheapigite wesi akwiyiganisa na umunu uyungi. 5Pakuva yeyeavesaga munu inacho ikitegulo chakwe yumwene ikimuvaje ukwitwika.

6Umunyakwigisa ulukani lwa Nguluvi nave amugavilage na umwigisi vakwe cheakwambula mukipigo chakwe.

7Mulisanga yinyenye; Nguluvi sivakwihesigilwa, cheavyalite umunu chekicho chesaabeta. 8Ye ivyala muwudobokesi wa isa mung'i, saabeta wuwo uwanangifu, neke yeivyala mu muhe, saabeta ukuhuma kwa umuhe uwumi uwutasila. 9Lino, tulafulugala mukupiga inofu, pakuva wone tulemwe ukudedela satubeta isanga ulusika pelufikite. 10Lwide, pakuva twina ikilega, tuvapigilage avanu mbevali uwunofu; na hilo hilo avanyalukolo va mulufuuwo lwetu.

Ing'ani isisindilisa na inyungila

11Mulavage tasi, lwenguvandikila na Uwandike wukomi pengwandika kwa iliwoko lyangu yinene! 12Vala avisaka ukwilagila ukuta vanofu ukwimila ifipigo fya mwivala fya umuvili, ve vawo vekuvakangala nyenye nanye muwoolwe. vipiga ulo sambi valemwe ukutesekela umusalaba gwa Kilisito. 13Pakuva iwo vavene sivakwinatila indagilo, viwenda nyenye muwolwe sambi vivahile ikilagilo kicho mumivili jenyu. 14Neke nene sisandivahila ikinu kingi pesi umusalaba gwa Umutwa vetu Yesu Kilisito, pakuva ukukola umusalaba ugo ing'i yafwe kwa nene, nane ndafwe kung'i. 15Ukuwoolwa na uwutawoolwa si kinu, ikikomi hilo tupitukage na ukuva ikigawa kipya. 16Kwa vala vevifwata uwulongosi wuwo nguvasukila uwikalakunoga na ulusungu, uwikalakunoga na ulusungu kwa Isilaeli-vanu va Nguluvi. 17Sweno, umunu alafwahisa kangi pakuva ndina amavamba ga Yesu mumuvili gwangu. 18Vanyalukolo, nguvasukila nyenye mbemuli uwuwuya wa Umutwa vetu Kilisito, Ena.

Currently Selected:

Avagalatiya 6: HeNT2004

Highlight

Copy