Avagalatiya 5

Mwibatilisage uwutemapenyu

1Kilisito atupelye uwutemapetu, alaje hwehwe tunanage muwutemapetu, sweno, mwimage munoge, na mulidikila uyungi avavike mulupanda lwa uwunyawingi kangi. 2Lino nene Pawulo nguvalongela ukutigila! Wone mwidikile ukuwoolwa Kilisito ava sikinu savapeli cha kwambula kwa nyenye. 3Kangi nguvapavila wima hela: umunu yeidikila ukuwoolwa lumuvaje ukwinatila, indagilo mbesili. 4Wone mwihosa ukuwuyapwa vagolofu ukukola mu ndagilo, sweno, yemutyesile muhele pataali na Kilisito: Yemuve kwivala mu wuwuya wa Nguluvi. 5Neke kulubali lwetu hwehwe, twilavisa kwa luhuvi ukuta muludali lwa Umuhe twiwuyapwa vagolofu ukwimila ulufuuwo. 6Pakuva wone yetuhanzile na Kilisito Yesu, ukuwoolwa nambi uwutawoolwa uko kufwaha hela, ikikomi ipo lwe lufuuwo ulwipigaga ikipigo muwende.

7Mukabitige wunofu, minofu! Lino, nani yeakavapinging'ise mulemwe ukwinatila inachene? 8Yeakalesile ulukani ulo si Nguluvi yeavakemelye nda. 9“Uwuhahu wukefu hela wawihahya ikisilo mbekili!” 10Ukwimila ukuhanga kwetu na Umutwa, ngwihuvila pakomi ukuta nyenye simuva wungi na nene. Kangi yula yeakavasasing'ise nambi ave muvina ndawuli nachene uyo saahigwa neke apume.

11Na kulubali ulwangu, vanyalukolo, wone mbe ngaali ndidalika ukuta ukuwolwa luvaje mbepali, mbi lweki mbe pe ndagiliswa. Wone luke luve ndahihyo, uwudalisi wangu wa umusalaba wa Kilisito siwuke wuleta inyoni sesivesaga. 12Luke lunogela wone vawo vevakuvasasing'asa, vake visawule vavene!

13Neke nyenye vanyalukolo vangu mwakemelitwe muve vanu mwivatemapenyu. Neke nambi ndahihyo uwutemapetu sawulava lifinga lyambuse tuve pasi ya wutema wa uwudobokesi wa isa mung'i; pesi ukuta luvavaje mwipigilage muwende. 14Pakuva indagilo mbesili sasikwilanikila mululagilo ulu ulumwi, “Umwendage umunyafivawo vako ndawe lukwiyenda yiveve.” 15Neke wone mwilume na ukwilya ndawe amakoko ga mwihala, mwikomalilage samulisinda we yinyenye ng'ani!

Imikalile ja Umuhe na ija mung'i

16Nambi nene nguvalongela de, imikalile jenyu gilongoswage na Umuhe, nanye pesimwiga kangi uwudobokesi wa isa mung'i. 17Pakuva uwudobokesi wa isa mung'i wisutanaga mbepali na isa Umuhe, uwudobokesi wa isa umuhe sisutanaga na isa umuhe mbepali sisakwiyidikisa, ukwimila lulo simuhwana ukupiga na semwiwenda yinyenye. 18Wone mulongoswe na Umuhe, sweno, simuli pasi ya uwutema wa indagilo.

19Sweno, ifipigo ifya umuvili fili pelu hela; uwuyamba, uwaafu, uwudobokesi, 20uwusunyalila ifihwananguluvi, uwuhavi, uwutavangu, ulwitakilo, uwifu, lilakali, uwimi, ulwigawo, 21gila, uwugaasi, uwuhatufu, ulubesa na isingi isindawe siso. Nguvalongela kangi ndawe lwendendonzile pamwandi avanu vevipiga ing'ani iso, sisavava na ikilega chawo ukwingila muwutwa wa Nguluvi.

22Neke isihumaga mukulongoswa na Umuhe we uwende, uluhekelelo, uwikalakunoga, uwukangalisi, uwunofu, ulusungu, uwufuuwa, 23uwulele na ukwitanila, ukwimila iso sisukuli indagilo isihwanite ukubesa iso. 24Vala avali mwa Kilisito vakawutumbike uwunu wawo wa mung'i na uwudobokesi na amahosa ga mung'i. 25Wone twikale muwutanzi wa Umuhe, lutuvaje twigage uwulongosi wakwe. 26Tulemwe ukwidudumba, nambi ukwisagala nambi ukwiwonela gila.

Currently Selected:

Avagalatiya 5: HeNT2004

Highlight

Copy