Avaefeso 1

1Ye nene Pawulo umwigendo va Kilisito Yesu kwa uwende wa Nguluvi, nguvandikila nyenye mwevanu va Nguluvi ye muli mu Efeso ye yemwihuvilwa mukuhanga na Kilisito Yesu. 2Nguvasukila uwuwuya na uwikalakunoga ukuhuma kwa Nguluvi Udadetu na Umutwa Yesu Kilisito.

Uwufunyilile wa mu muhe ukwimila Kilisito

3Alumbwagwe Nguluvi na Udade va Umutwa vetu Yesu Kilisito! Pakuva, kwa ukuhanga na Kilisito atufunyilye kwa ukutupela ifipelwa mbefili fya Mumuhe ukuhuma kuchanya. 4Nguluvi atuhagwe pe na ing'i wesiyilagawa, sambi tuve vanu vakwe mukuhanga na Kilisito, sambi tuve twivelu twivagaya uwananzi palumwene, ukwimila uwende wakwe. 5Nguluvi alahosise muwende wakwe uluhuma pamuvango tuve vanakwe ukugendela kwa Yesu Kilisito. Ndawe lweeahosise 6pakulumba uwuwuya wakwe uwunyandolo wetwapelitwe hwehwe Mumwanakwe Umwende!

7Pakuva kwa idanda yakwe Kilisito hwehwe twivakombole, kwekuta inzanangifu setu sihesiswe. Ulo lwelwiwali ukwimila uwukomi wa uwuwuya wakwe, 8weatupelye uwugaya nambi kigelo! Kwa uluhala na uwuseela wakwe mbewuli. 9Nguluvi akwisise kila chealahosise, nu kutulongela sealawendite isesifihitwe, sealagelanise ukukwisa mung'asi ya Kilisito. 10Lula lweawendite ukulukwisa mulusika lwayo, lwa ukufikong'asa ifigawa mbefili, sambi fihange pamwi mwa Kilisito, fya kuchanya na fya mung'i.

11Ifinu mbefili fyafigawa kwa ukwimila muwukele na uwulamusi wa Nguluvi; nave Nguluvi atuhagwe hwehwe sambi tuve vanu vakwe kwa uwende wakwe mukuhanga na Kilisito, ndawe lweeawendite yumwene mukuhanga na Kilisito ukwimila uwulamusi wakwe wealakelite. 12Sweno, hwehwe yetwatasile ukumwihuvila Kilisito lutuvaje ukusilumba indolo sa Nguluvi!

13Kangi nyenye mulumwene mukapulike ulukani ulwa nachene, Ulukani Ulunofu ulwa uwupoki, mukamufuuvitwe umwene, mwatemitwe uluhagi ukwimila uluhuviso lwa Umuhe Umwelu. 14Uyu Umuhe che kipingiko cha ililila lya fila mbefili fye Nguluvi fyealavahuvise avanu vakwe, na ulukani ulu lukutulagila ukuta Nguluvi avakombolela ng'ani avanu vakwe mbevali. Tusilumbage indolo sakwe!

Ulwifunyo kwa Pawulo

15Nambi kwa lulo, uluhuma ulusika lwe ndapuliche ulwa ulufuuwo lwenyu kulumutwa Yesu, na uwende wenyu ku vanu va Nguluvi, 16Sindalekiti nambi kimunyi kimwi na ukumulumba Nguluvi ukwimila nyenye. Nyele nguviwuka mukwifunya kwangu, 17Sambi Nguluvi va Umutwa vetu Yesu Kilisito, Dada umunyandolo, avapele nyenye Umuhe va uluhala na uva uwugubulilwe mumukagula Nguluvi, 18sambi mugine ukumukagula hilo munumbula senyu ulwa uluhuvi lweavakemelelye mu wunono na indolo ingomi iya ililila lyeavaviche avanu avelu vakwe, 19uwukomi uwulutye wa uludali lwakwe mwahwehwe yetwifuuwa ukuling'ana na ikipigo cha uludali lwakwe ulukomi, 20ulwakwilye pe amusilibwe Kilisito ukuhuma kuvafwe, neke amukong'omeke kundyo kwakwe kuchanya. 21Uko, Kilisito atemile muvalongola mbevali, uwuvina na uludali na uwutwa mung'i uwuvina wewewuvesaga wewitambulwa mung'i umu na kung'i iyikusa. 22Nguluvi afivikite mbefili pasi pa amagulu gakwe, swe akumutawula ku likanisa iva muvina va mufinu mbefili. 23Likanisa gwe muvili gwa Kilisito, na uwukwilanifu wakwe yumwene yeikwilanisa mbefili na apono bahapavesaga.

Currently Selected:

Avaefeso 1: HeNT2004

Highlight

Copy