II KƆRINTI DIMA 4

1Ka di nyɛ la Naawunni namboo zugu ka ti tumni wa, ti ku toaai n‑kyɛ tama. 2Ay! - di pa lala. Ti za'asi yɛlisɔ'ara seesi m mari vi la, ka bu goori n‑yɔmsira, ti mun bu sa'amni Naawunni yɛligu la. Amaa tin yɛtti yɛlimaŋni maa paalu ni maa zugu kyɛ ka sɔkam baŋŋi ti yɛla suŋŋa u sufu teesa ni, zaŋŋi n‑kpa Naawunni saani. 3Halli ni ti lahabasuŋŋu maa ŋɔn ligi la saariga seeba saani maa zaa yɔri, ban baasiri yɔri la saani ka ka ligi. 4Dama Sintaani n kyɛ ka duniya wa dima nya u n‑gyeemni u, ni, ba Naawunni. U siri kyɛ ka ban ka yɛdda la sufu zoomna, ka bu nyari neesimaŋni: lala neesim maa mun yi la lahabasuŋŋu mooligu ni na - lahabaari zaŋŋi n‑kyaŋŋi Kirisita gyirima, ka ŋɔn Kirisita mun ŋmani la Naawunni deede. 5Pa ti mammansi yɛla ka ti moonna, amaa Yisa Kirisita Masiiya yɛla, ni, u nyɛ la ti Dugma: ka laa m‑moonni, ni, tirima n nyɛ ban gyeemni ya zaa, ŋɔn Yisa zugu. 6Naawunni daa yɛli, ni, “Kyɛ ka neesim neaai zibsim ni!”: tɔ, ŋɔn Naawunni kyɛ ka u neesim neaai ti sufu ni gba, ni di ti ti ti bamsim zaŋŋi n‑kyaŋŋi Naawunni gyirima din bɛ Yisa Kirisita nindaa ni la.

7Ti siri mari arizikki anŋɔ zaa, amaa ti saani a bɛ la hoo buna ŋɔn bɛ sinsi puuni seem. Ka lala zugu nin wulisi yaa din zoaai pam la yɛla - ni, pa tirima saani ka di yi na, amaa di yi la Naawunni saani m‑paai ti na. 8Di mugsi ti ya'ari kam, amaa ti bu ŋmirigi. Ti burimna, amaa ka bu basi tama. 9Ba niŋni ti putoo, amaa ti bu basi yɔri; ba ŋmɛ ti n‑lusi, amaa ti bu sa'am zaa. 10Tin kyɛnni n‑goori seem wa, sahakam ka Yisa kum yɛla kpalim m‑bɛ ti ningbina ni, ni lala ti kyɛ ka Yisa nyɔvuri beesigu gba bɛ ti ningbina ni, ka niriba ti nya. 11Ii - tirima ban nɛ wa, ba kur zaŋŋni ti n‑niŋni kum ziiya, Yisa yɛla zugu; dama lala nin kyɛ ka ŋɔn Yisa nyɔvuri beesigu ti yi paalu, halli ti ningbina an kpiiri la puuni gba. 12Tɔ, ka dizugu kum tumni ti puuni, amaa yarima muna - nyɔvuri tumni ya puuni. 13Di sɔbi n‑dooli, ni, “N daa niŋi yɛdda; dizugu ka n daa tɔ'asi.” Tɔ, ka tirima gba niŋi yɛdda, ka lala zugu ka ti tɔ'asira. 14Dama ti mi halli, ni, Naawunni daa neaai ti Dugma Yisa kum ni. Ka laa m‑mi, ni, ŋɔna n nyɛ sɔ ŋɔn nin kyɛ ka ti gba neaai, tin ni Yisa ŋɔn la'am m‑bɛ ni maa, ka nin taasi tin ni yarima zaa m‑paai u saani na. 15Anŋɔ zaa nyɛ la yarima anfaani zugu; di gbinni nyɛ la: ni, niriba pam ŋɔn deaari Naawunni piinisuma an zoaai nti yakki la, ba nin puusi Naawunni pampam di zugu, ka Naawunni gyirima ti paasira.

16Ka dinŋɔna ti ku basi tama. Halli ni ti ningbina dɔŋŋni maa zaa yɔri, ti mun sufu ni ti maanni n‑leebri bumpaala beoo kam. 17Yɛlimugsa mari ti, amaa a bu tibsa ka a mun ku yuui. Ka anŋɔ zaa nin kyɛ ka ti nya tibsim ni gyirima an gaari zaa ka laa n‑ka naari. 18Ti siri bu zaŋŋi ti nini n‑kpa la bunseesi an nyari la, amaa an bu nyari maa ka ti gɔsira. Dama bunseesi an nyari ni nini bu ya n‑yuui, amaa an bu nyari muna - anŋɔ nin ti kpalim m‑bɛ ni sahakam.

Currently Selected:

II KƆRINTI DIMA 4: maw

Highlight

Copy