II KƆRINTI DIMA 3

1Ammi, dinŋɔ wulisi la, ni, ti maali n‑tibgri ti mansi, bee? Ti nyɛ la seeba ban boori ni ba sɔbi gbana n‑kyɛ ka ya baŋŋi ti, fa? Bee, ya sɔbri lala gbana n‑ti ti gba? - hoo seeba ŋɔn boori a seem la. 2Ay! Ti gbana maa n siri nyɛ yarima: ban sɔbi gbanseesi n‑niŋi ti sufu ni n nyɛ ya. Sɔkam nin toaai n‑karim ti lala gbana maa m‑baŋŋi a gbinni ŋɔn nyɛ seem. 3Di kasigi n‑wulisi, ni, Yisa Kirisita mammaŋŋa n sɔbi lala gbaŋŋu maa, di nyɛ la yarima; ka tirima muna - ba tum ti ni ti mari ka na. Ba bu zaŋŋi inki n‑sɔbi ka, amaa Naawunni Nyɔvuri Daana Sii Kasi la ka ba zaŋŋi n‑sɔbra. Halli ba bu boaai n‑sɔbi ka kuglama ni, hoo Musa zaaligu ŋɔn daa sɔbi seem la, amaa ninsaalidima sufu ni.

4Ti yɛtti dinŋɔ, dama ti niŋi yɛdda ka bu birisiri Naawunni tooni, ka di bɛ la Kirisita zugu. 5Seelli ka ti ni din nin wulisi, ni, tirim mammaŋŋa nin toaai n‑tumni tuma maa. Din kyɛ ka ti nin toaai n‑tumni a maa yi la Naawunni saani na. 6Ŋɔn Naawunni n kyɛ ka ti sa'ai ni ti tum u nangbanyinni zaaligu sɔpaalli tuma wa. Ka ka pa la sɔseaa kan dɔli sɔppu la, amaa Sii maa soori n nyɛ ka. Sɔppu zaaligu soori mari la kum, amaa Sii maa soori tisiri la nyɔvuri.

7Tɔ; amaa zaalikurigu la muna - ba daa boaai ka n‑sɔbi n‑niŋi kuga ni, ka ka daa mari kum na; amaa ka tuma soori daa mari gyirima pam. Halli di daa kyɛ ka Musa nindaa la daa nya'ari nyain, ka Izraɛli dima daa bu nyaŋŋi n‑gɔsira. U nindaa neesim daa baligri ni; amaa di zaa yɔri, gyirima n‑daa siri la. 8Ka di yi bɛ lala, gyirima pam nin ti dɔli Sii maa zaaligu soori tuma, halli nti yakki: bee, m ma'ai ni? 9Daŋŋni soori wa n daa kari niriba sariya n‑lusi ba; halli ni di zaa yɔri, ka daa mari gyirima. Ka sɔpaalli la muna - sɔseaa kan deaai ba, ni, yɛlimaŋni dima - lala soori bu ya mari gyirima pam n‑gaari ka? Ay, ka nin mara! 10Sɔkurigu gyirima bu laa n‑ŋmani la gyirimamaŋni, dama sɔpaalli gyirima gaari ka halli nti yakki. 11Daŋŋni soori neesim daa baligri m‑basira, halli ka di daa piili ni gyirima; dizugu sɔseaa kan kpalim m‑bɛ gyirima ni ka bu naari la mari la gyirima n‑gaari ka.

12Lala zugu tin mari tama kanŋɔ maa zugu, ti gbaari ti mansi n‑tumna, ka vi ka ni. 13Tirima bu ŋmani la hoo Musa, dama ŋɔna n daa zaŋŋi saariga n‑ligi u nindaa, ni Izraɛli niriba di ti nya gyirima neesim la ŋɔn daa baligri n‑naari seem maa. 14Amaa di zaa yɔri, Izraɛli dima maa yɛm na kpalim n‑ligi ni; ba yi kur karimni gbankurigu la, saariga maa na kpalim m‑pili la ba yɛm. Ka bu piligi m‑basi, dama Yisa kɔkɔ n nyɛ ka piligra. 15Halli ni zuna, ba yi ti karimni Musa zaaligu gbaŋŋu la, saariga maa na kpalim m‑pili la ba yɛm. 16Amaa ba nin toaai m‑basi ka, hoo Litaafi la ŋɔn yɛli Musa yɛla seem la, ni, “Ŋɔn daa ti ŋmaligi n‑kpa Naawunni saani maa, di saha ka saariga maa daa piligi.” 17Tɔ: ti Dugma n nyɛ Sii maa, ka ti Dugma Sii yi bɛ seelli zaa, bɛni ka sumaŋŋa nin bɛ ni. 18Tirima muna - ti ka saariga kan ligi ti nini: ti kur gɔsiri ti Dugma gyirima maa ka nya'asiri n‑labsiri na. Di yiiri la ti Dugma, ŋɔn nyɛ Sii maa, saani na, ka takkri ti ni ti kyaŋŋi tooni n‑ŋmani hoo ŋɔn mammaŋŋa ŋɔn nyɛ seem; ti siri yiiri la gyirima zii ni, m‑paari gyirima din zoaai n‑gaari lala.

Currently Selected:

II KƆRINTI DIMA 3: maw

Highlight

Copy