II KƆRINTI DIMA 2

1Dinzugu n daa teesi n‑gbaai n sufu ni, ni, n bu ya kyɛ ya saani na n‑laa n‑nya sufusa'aŋŋu yaasa. 2Dama man yi ti sa'am ya sufu, ŋɔni m bɛ ni n‑ya kyɛ ka man mun sufu maai? - ka di pa la man sa'am seeba sufu maa, di nyɛ la yarima. 3N daa sɔbi lala maa, ni n ti kyɛ ka man yi kyɛ ya saani na maa, ya ku sa'am n sufu maa; dama yarima n nyɛ ban sum ni ya kyɛ ka n sufu maai. Ay! - n siri daa mari yɛdda, ni, ya zaa nin la'am n‑nya n sufumaasim maa. 4Dama sufusa'aŋŋu ni beerim ni nintam zugu n daa kyɛ ka n sɔbi n‑ti ya maa. Ka di pa la ni n kyɛ ka ya sufu ti sa'am, amaa ni ya ti baŋŋi man wuri ya pam seem.

5Ninvugsɔ ŋɔn daa taasi sufusa'aŋŋu na maa, pa man sufu ka u daa sa'am amaa ya zaa sufu - bee, n tɔ'asiri lala n‑yakkri sɔsuŋŋu? 6Ya daadam bɔbgu ŋɔn pun darigi u tubri seem la - tɔ di sakkiya! 7Dinzugu ya kyɛri u taalli m‑pɛŋŋi u, ka suŋŋi u ka u ti nya sufumaasim: di yi pa lala, di pa seem sufusa'aŋŋu nin nyaŋŋi u. 8Di zugu n kpamsiri ya ni, ni, ya kur kyɛ ka u baŋŋi, ni, ya wuri u ni. 9Halli din daa kyɛ ka n daa sɔbi n‑ti ya daa nyɛ la: ni, n ti zamsi ya yɛdda yɛla, m‑baŋŋi ya nin deaai n noori seelikam puuni deede, bee, ya bu ya deaai? 10Ya yi pun kyɛ sɔ taalli m‑pɛŋŋi u, man gba kyɛ di daama taalli m‑pɛŋŋi u: man mun daa kyɛ taaliseaa m‑pɛŋŋi u la - taalli yi siri daa bɛ ni - n daa kyɛ m‑pɛŋŋi yarima zugu, Kirisita Masiiya tooni. 11Ka di nin kyɛ ka Sintaani ku nyaŋŋi ti. Dama ti pa la seeba ban zi u teesibeeri yɛla an nyɛ seem la.

12Tɔ, man ŋɔn daa kyaŋŋi Tirɔ'asi tiŋŋa, ni n ti mooli Kirisita lahabasuŋŋu yɛla maa, n daa nya ka ti Dugma pun yoaai soori n‑ti ma. 13Amaa n daa na kpalim n‑ka sufudoaa dama n daa bu nya m mabii Taituusi la bɛni. Lala zugu ka n daa kyeoosi ba ka gaari n‑kyaŋŋi Masidoonya.

14Amaa ti puusiri Naawunni dama u suŋŋni ti sahakam. Ka Kirisita ŋɔn nyaŋŋi zaa ka kyɛnni u gyirima gyingaari ni kyɛnni sahanseaa la, ŋɔn Naawunni n kyɛ ka ti dɔli la Kirisita nyaaŋŋa. Halli u kyɛ ka tirima zugu ka ba baŋŋi u bamsim maa seela zaa, hoo nyunya'asiri ŋɔn kpeeri yiri ya'akam zaa puuni la ka niriba zaa wumna. 15Ii, ti siri ŋmani la hoo Kirisita turaali n‑tiri Naawunni, ka di nyɛ la ban nyari tuliginsim maa saani, ni ban bɔrigri la gba saani. 16Ban mun saani ti ŋmani la kum nyupoosiri, banla saani muna ti ŋmani la nyɔvuri nyunya'asiri. Ka ŋɔni n nin nyaŋŋi lala tumni maa? 17Tirim bu ŋmanni daa biisi, ti bu zaŋŋi Naawunni yɛligu n‑diri daa n‑koosiri m‑boori ligri di zugu. Ay - ti tɔ'asiri yɛdda ni yɛlimaŋni yɛla: ti tɔ'asiri hoo Naawunni ŋɔn tum seeba la, ka di nyɛ la ŋɔn Naawunni ni Kirisita tooni ka ti tɔ'asira.

Currently Selected:

II KƆRINTI DIMA 2: maw

Highlight

Copy