II KƆRINTI DIMA 5

1Tɔ: ka ti baŋŋi ti duniya wa ningbina yɛla: ni, a ŋmani la hoo suga, bee, tanti leensi; ni, a yi ti wurim m‑basi, sɔkam mari u dusuŋŋu, Naawunni ŋɔn mɛ seaa n‑ti ti, pa ninsaala; ka lala duu maa zɛ la arizana ni, ka ka nin ti yuui halli saha kan ka naari. 2Tin ŋɔn kpalim m‑bɛ kpa wa, ti na nyuusiri ni, dama ti sufu kur boori la ti paai dupaala wa n‑kpɛ a ni, bee, ti nya suturipaala Naawunni saani n‑yɛ a. 3Ya bu nya? - ti yi nya sutura n‑yɛa, dinŋɔ wulisiri, ni, ti ku laa n‑kyɛnni yɔri. 4Tin mun na kpalim n‑gbeeri kpa wa sugri la ni, ti kur nyuusiri ni ka fabinna; di pa la tin boori la ni ti kyɛnni yɔri, amaa tin boori ni ti yɛ suturiveela, bee, n‑kpɛ ti duseesi an zɛ arizana ni la. Di saha ka ti bunseesi an kpiiri la nin ti basi zaa, ka nyɔvuri nin nyaŋŋi a zaa. 5Halli lala zugu ka Naawunni daa naam ti m‑maali ti siri; ka u wulisi ti lala, dama u pun daŋŋi n‑zaŋŋi u Siiya n‑ti ti.

6Tɔ: ka dinŋɔna ti kpamsiri ti sufu, dama ti mi halli, ni, ti yi na kpalim m‑bɛ ningbina wa puuni, di wulisi, ni, ti na ka Naawunni saani. 7Pampaŋŋɔ saha ti mari yɛdda n‑kyɛnna: pa ti nini ka ti mari n‑nyari deede. 8Ii, ti siri kpamsiri ti sufu: tin ŋɔn mun boori ni ti yi ningbina wa ni, ni ti ti bɛ Naawunni saani. 9Ka dinzugu ti kpaŋŋi ti mansi n‑tumni din kyɛ ka ŋɔn Naawunni nini tigra, halli tin bɛ duniya wa ningbina puuni maa, bee, ti ka a ni. 10Dama Kirisita nin ti zi u sariya karibu bimbinni zugu, ni u ti boosi ti zaa boosa zaŋŋi n‑kyaŋŋi ti ningbina wa ni tuma, a yi ti nyɛ bunsuma, bee, bumpoosa. Soori ka ni ni sɔ za'asi: ti sɔkam zaa nin zɛ u tooni n‑deaai ti laara sanyoaa hoo ti tuma wa ŋɔn sumsi seem.

11Ka dinŋɔna ti mi Naawunni yɛla ŋɔn mari dabeem seem: lala zugu ka ti kpaŋŋni ti maŋŋa ni ti moonni Naawunni lahabaari n‑kyɛ ka niriba ti sakki. Ti beebu bu sɔ'ai Naawunni saani, ka ti laa m‑mari tama, ni, di bu sɔ'ai ya gba sufu teesa saani. 12Di pa la ti maali m‑boori ti tibgi ti maŋŋa ya saani yaasa; ay! - ti ya n‑ti ya la soori ni ya ti nyuuri bara ti yɛla zugu. Ka dinŋɔna, ninvugseeba yi ya nyu bara zaŋŋi n‑kyaŋŋi bunseesi an nyari wa yɛla, ka pa sufu ni yɛlimaŋni yɛla, ni ba ti zeem ya - tɔ! yan mun nin nyaŋŋi n‑labsi ba labsisuŋŋu. 13Ni, yinyaari mari ti - tɔ, di yi bɛ la lala, di nyɛ la Naawunni zugu ka ti kɔŋŋi yɛm. Tin mun yi nyɛ ninvugmaŋa, di nyɛ la yarima zugu ka ti mari ninneesim. 14Yisa Kirisita Masiiya wurilim bɛ ni m‑mugsiri ti: ti ku toaai n‑yɛli seela, na'ala, ninvugyinni ŋɔn daa kpi n‑ti sɔkam la zugu, lala wulisi, ni, sɔkam mun kpiya. 15Ka ŋɔn daa kpi maa gbinni nyɛ la: ni, ban kpalim m‑bɛ ni la, pa ba mammaŋŋa zugu ka ba bɛ ni, amaa ŋɔn Kirisita zugu ka ba bɛ ni, dama u daa kpi n‑ti ba ka laa n‑yisigi.

16Ka di zugu pampaŋŋɔ zaŋŋi n‑kyɛnna ti ku laa n‑gɔsiri niriba hoo duniya wa ninsaadima maa ŋɔn gɔsiri ba seem m‑bugsiri ba yɛla: halli ti yi daa gɔsiri Kirisita mammaŋŋa gɔsibu wa, ti ku laa n‑niŋi lala. 17Dinŋɔna ninvugsɔ yi bɛ Kirisita saani, ba naam u la bumpaalli: u beesikurigu la gaariya, ka bunseelikam leebi la beesipaalli. 18Ka anŋɔ zaa yi la Naawunni saani. U daa kyɛ ka Kirisita zɔ ti sindaani u saani m‑maali yɛttɔ'a zaa, ka daa laa n‑zaŋŋi sindaani zoobu tuma wa n‑ti ti ni ti ti tumna. 19Ni, ŋɔn Naawunni daa bɛ la Kirisita saani n‑zɔri sindaani, ni u ti maali u yɛttɔ'a zaa n‑ti duniya wa dima, ni u ku laa n‑teesi ba tumbeeri yɛla halli beela. Ka u zaŋŋi sindaani zoobu wa yɛla n‑ti ti ni ti ti moonna. 20Dama Naawunni tum ma, hoo ŋɔn tum bisɔ ni u ti mari ŋɔn Naawunni kukɔri n‑kyɛ na n‑susira. Lala ka u tum ti zaa gba. Ti susiri niriba nimmoosi Kirisita zugu, ni, ba labi Naawunni saani na n‑niŋi nangbanyinni. 21Ŋɔn Kirisita mun daa ka bumbɛseelli u ni, ka Naawunni daa zaŋŋi u n‑kyɛ ka u ti leebi bumbeoo, ka di daa nyɛ la tirima zugu. Lala ka u daa kyɛ ka tirim tumbeeri dima wa ti leebi yɛlimaŋni dima n‑ti ŋɔn Naawunni.

Currently Selected:

II KƆRINTI DIMA 5: maw

Highlight

Copy