II KƆRINTI DIMA 6
6
1Naawunni tuntuntaaba n nyɛ ti, ka Naawunni pun zaŋŋi u piini n‑ti ti, halli ka ti bu sumsi lala; tɔ, ka di zugu ti kpamsiri ya, ni, yan di kyɛ ka Naawunni piini wa basi yɔri. 2Dama u yɛliya, ni#:-
“Sahasuŋŋu maa deede ka n daa wum n‑ti ya,
Halli tuliginsim dabsiri daari ka n daa suŋŋi ya.”
ka mani n yɛtti ya wa, ni, pampaŋŋɔ n nyɛ Naawunni ‘sahasuŋŋu’ wa, ka ‘tuliginsim daari’ wa n nyɛ zuna. 3Ti bu ta'ari sɔ soori, ka lala nin kyɛ ka ba ku galim ti tuma soori wa. 4Amaa bunseelikam zaa puuni ti ya n‑wulisiri, ni, Naawunni tuntumniba n nyɛ ti. Halli di yi nyɛ wahala diibu puuni gba, ti bɛ la lala n‑diri sugru, ni toom ni yɛlimugsa puuni gba. 5Ba bu ti, ka kpari ti sarika duri ni; niriba mun daa zabri ti yɛla zugu; ti daa tumni tunkpeema, ka ganni gɔgala, ka kpalim m‑bɛ kɔm ni. A zaa puuni ka ti tumni la Naawunni tuma. 6Ti kur zɛ yummu Naawunni saani, m‑mari yɛm, ni sugru, ni nirilim; ti kpalim m‑bɛ Naawunni Vuusim Kasi saani, ka wuri niriba ni yɛlimaŋni. 7Ti mari la yɛlimaŋni yɛligu n‑tumna, ni Naawunni yiiko; ti mari ti tɔppu neema an nyɛ la yɛlimaŋni dina, ka a bɛ la ti nudirigu ni ti nuzaa ni zaa. 8Anŋɔ zaa puuni ka ba pɛ'ari ti, ka laa n‑fiilim ti; ba gyeemni ti ka laa n‑zeemni ti; ba yɛtti, ni, ti yɔmsira, ka laa n‑yɛtti, ni, ti tɔ'asiri yɛlimaŋni. 9Sɔsɔ bu mi ti yɛla, amaa ti yuuri duya; ti nyɛ la hoo ban kpiira, ka kpalim n‑nɛa; ba namsiri ti, amaa ti bu kpi zaa. 10Halli ti bɛ la sufusa'aŋŋu ni, amaa ka mari sufupeelli sahakam; ti bɛ la fara ni, amaa ka kyɛ ka daadam pam leebi la bundaandima; ti ka seela, amaa ka mari bunseelikam.
11Ya bu nya, ti zɔdima? - ti tɔ'asi n‑ti ya Kɔrinti dima wa ka bu mɔŋŋi ya, halli ti yoaai la ti sufu ni teesa n‑ti ya. 12Di pa la ni tirima n mɔŋŋni ya ti wurilim; ay! - amaa yarima n mɔŋŋni ti ya wurilim. 13Dinŋɔna see ka ya dɔli soori n‑labsi n‑ti ma hoo man pun tisi seem - n tɔ'asiri n‑tiri ya hoo m biisi la - ka ya gba yoaai ya sufu ni teesa n‑ti ma.
14Yan di kyɛ ka yan ni ban ka yɛdda la ti la'amni n‑tumni hoo na'akoora ŋɔn tumni seem. Ammi, yɛlimaŋni ni tuppuwumni la'amni n‑suŋŋni taaba? - Ay! Bee, neesim ni zibsim ya niŋi la wula n‑la'amna? - a ku toaai, halli beela! 15Kirisita siri ku toaai n‑lɔ nangbanyinni ni Sintaani; bee, yɛdda daana ku toaai n‑nyɛ ŋɔn za'asi yɛdda niŋbu la taraana. 16Naawunni Gyeeŋŋu Yiri siri bu ŋmanni ba'ari bee bugri ŋɔn bɛ seela. Amaa tirima n nyɛ gyeeŋŋu yiri n‑ti Naawunni Nyɔvuri Daana maa. Hoo ŋɔn Naawunni daa yɛliya#:-
“N nin kpɛ ba saani n‑gbɛa;
Man ni ban nin kyɛnni n‑gyinna;
N nin nyɛ Naawunni n‑ti ba
Ka ba mun nin nyɛ n niriba.”
17Dinzugu, ni#:-
“ ‘Ya yim na ka kyɛ ba,
n‑wɔligi ya mansi m‑bɛ ya kɔkɔa.’
- Lala ka ti Dugma yɛtta.”
Ni#:-
“Ya di siisi bunda'ariga kan kyisira,
Ka n nin deaai ya.
18Ka n nin leebi ya Ba,
Ka yan mun nin leebi m biisi.
- Lala ka ti Dugma Yiiko Zaa Daana yɛtta.”
Currently Selected:
II KƆRINTI DIMA 6: maw
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
