Lucas 3
3
PURPARAÇON DE L MENISTÉRIO
Juan Batista
(Mateus 3,1–12; Marcos 1,1–8; Juan 1,19–28)
1Quinze anhos apuis de Tibério César ser amperador, sendo Póncio Pilatos gobernador de la Judeia, Harodes gobernador de la Galileia, sou armano Felipe gobernador de la Eitureia i de la Traconídite, i Lizánias, gobernador de Abilena, 2sendo Anás i Caifás ls Sumos Saçardotes, la palabra de Dius fui ambiada a Juan, filho de Zacarias, ne l zerto. 3Juan andaba por toda la region de l Jordan, apregonando un batismo pa la cumberson i l perdon de ls pecados, 4cumo stá screbido ne l lhibro de l porfeta Eisaías: Hai ũa boç que bózia ne l zerto: Purparai l camino de l Senhor, andreitai ls sous carreirones. 5Todas las baixas seran acobelhadas, todos ls altos i cabeços seran alisados; ls caminos tuortos quedaran dreitos i ls derramados quedaran cumpuostos. 6I toda la criatura berá la salbaçon de Dius.
7Anton, el dezie-le als juntouros de pessonas que benien para séren batizadas por el: «Raça de bíboras, quien bos ansinou a scapar de la rábia que bai a benir? 8Dai fruitos que amóstren que stais arrependidos i nun ampécedes a pensar, “Tenemos a Abraan cumo nuosso pai”, puis digo-bos que Dius puode fazer nacer filhos d’Abraan destas piedras. 9La machada yá stá apuntada a la raiç de la arble i toda l’arble que nun dir fruito será cortada i botada pa l lhume.»
10I toda aqueilha giente preguntaba-le a Juan: «L quei tenemos de fazer?» 11El respundie-le: «Quien tubir dues capas, debe de dar ũa a quien nun ten ningũa i quien tubir quemido faga la mesma cousa.»
12Alguns publicanos tamien fúrun alhá pa que ls batizara i preguntórun-le: «Mestre, l quei debemos de fazer?» 13El respundiu-le: «Nun quebreis mais do que l que stubir stabelecido.» 14Ls suldados tamien le preguntórun: «I nós, l quei debemos de fazer?» El respundiu-le: «Nun le fágades mal a naide, nun fágades falsas acusaçones i cuntentai-bos cula paga que bos dan.»
15Cumo l pobo staba a la spera, preguntaba-se, ne l sou coraçon, se Juan nun serie l Messias. 16Juan dixo-le a todos: «You batizo-bos cun auga, mas bai a benir quien ye mais fuorte do que you, alguien a que nien sequiera sou dino de le zatar las correias de ls çapatos. El bai-bos a batizar ne l Sprito Santo i ne l fuogo. 17El bai a agarrar na mano ũa pala de lhimpar, para lhimpar las sues eiras i arrecadar l trigo na sue tulha, mas la palha bai-la a queimar nun fuogo que nunca se apaga.»
18I, assi, de muita maneira, anunciaba la buona nobidade al pobo.
19Mas cinçuraba al gobernador Harodes por bias de Harodíade, mulhier de l armano del, i por muita cousa mala que habie feito, 20mas el inda fizo ũa mais mala acion, mandou meter a Juan na cadena.
Batizado de Jasus
(Mateus 3,13–17; Marcos 1,9–11)
21Un die, apuis de haber batizado to la giente, de Jasus tamien se haber batizado i quando staba a rezar, abriu-se l cielo 22i l Sprito Santo abaixou porriba del, an figura de palomba, i de l cielo bieno ũa boç: «Tu sós l miu amado Filho, an ti pongo l miu ancanto.»
Genealogie de Jasus
(Mateus 1,1–17)
23Quando ampeçou la sue atebidade, Jasus tenie alredror de trinta anhos i, cumo cuidaba todo mundo, era filho de Jesé, filho de Eli, 24filho de Matat, filho de Lebi, filho de Melqui, filho de Janai, filho de Jesé, 25filho de Matatias, filho de Amós, filho de Naun, filho de Esli, filho de Nagaí, 26filho de Maat, filho de Matatias, filho de Semei, filho de Josec, filho de Judá, 27filho de Joanan, filho de Reça, filho de Zorobabel, filho de Salatiel, filho de Neri, 28filho de Melqui, filho de Adi, filho de Cozan, filho de Elmadan, filho de Her, 29filho de Jasus, filho de Eiliézer, filho de Jorin, filho de Matat, filho de Lebi, 30filho de Simeon, filho de Judá, filho de Jesé, filho de Jonan, filho de Eiliaquin, 31filho de Meleia, filho de Mená, filho de Matatá, filho de Natan, filho de Dabide, 32Filho de Jessé, filho de Oubed, filho de Booç, filho de Salá, filho de Naaçon, 33filho de Aminadabe, filho de Admin, filho de Arni, filho de Esron, filho de Farés, filho de Judá, 34filho de Jacó, filho de Eisaac, filho de Abraan, filho de Tera, filho de Nacor, 35filho de Seruc, filho de Ragau, filho de Paleg, filho de Éber, filho de Salá, 36filho de Quenan, filho de Arfaxad, filho de Sen, filho de Noé, filho de Lamec, 37filho de Matusalen, filho de Heinoc, filho de Jared, filho de Malaleel, filho de Quenan, 38filho de Einós, filho de Set, filho de Adan, filho de Dius.
Currently Selected:
Lucas 3: EM14
Highlight
Share
Copy
Want to have your highlights saved across all your devices? Sign up or sign in
Evangelhos em Mirandês © Sociedade Bíblica, 2014.
