Malakaus 13

Lub Tuamtsev Yuav Puamtsuaj

(Mathais 24.1-2; Lukas 21.5-6)

1Thaus Yexus taabtom tawm ntawm lub Tuamtsev moog, Yexus cov thwjtim muaj ib tug has rua Yexus has tas, “Xwbfwb, koj saib tej pobzeb hab tej tsev ntawd zoo nkauj kawg le!”

2Yexus teb has tas, “Koj pum tej tsev kws luj luj nuav los? Kuv qha rua koj has tas, tej pobzeb kws muab sis dlhos ua ke ntawd, txhua lub yuav pluam nyag nyob nyag taag huv tuabsi.”

Kev Txomnyem hab Kev Tsimtxom thaus Nplajteb Yuav Kawg

(Mathais 24.3-14; Lukas 21.7-19)

3Thaus Yexus nyob peg lub Roob Txiv Ntoo Roj kws nyob ncaaj lub Tuamtsev saab tid, thaus ntawd Petus, Yakaunpaus, Yauhaas, hab Aadales lug nug Yexus tuabywv. 4Puab has tas, “Koj qha rua peb saib, thaus twg maam le muaj tej nuav? Hab yuav muaj yaam dlaabtsi qha rua peb paub has tas, tub txug lub sijhawm kws muaj tej ntawd lawm?”

5Yexus qha rua puab has tas, “Mej yuavtsum ceevfaaj, tsi xob pub leejtwg ntxag tau mej yuam kev. 6Yuav muaj ntau leej tuav kuv lub npe has rua mej tas, ‘Kuv yog nwg!’ Hab puab yuav ntxag ntau leej yuam kev. 7Thaus mej nov suab ntaaj suab rag nyob ze mej hab nov tej tebchaws nyob dleb ua tsuv ua rog, mej tsi xob poob sab, yeej yuav xub muaj tej ntawd, tabsis tej ntawd tsi tau qha has tas, tub txug lub sijhawm nplajteb kawg lawm. 8Ib lub tebchaws yuav sawv tawmtsaam ib lub tebchaws, hab ib tsaav tuabneeg yuav sawv tawmtsaam ib tsaav tuabneeg. Yuav muaj aav qeeg txhua qhov, hab yuav muaj kev tshaib kev nqhes. Tej ntawd zoo ib yaam le tug quaspuj kws nyavnyuas pib mob plaab yuav yug mivnyuas.

9“Mej yuavtsum ceevfaaj, rua qhov yuav muaj tuabneeg nteg mej coj moog rua huv tej tsev has plaub, luas yuav muab mej ntaus huv tej tsev saablaaj, hab yuav coj mej moog sawv taabmeeg tej numtswv hab tej vaajntxwv, vim mej yog cov kws ntseeg kuv, thaus ntawd yog lub sijhawm zoo rua mej qha Txujmoo Zoo.#Mat 10.17-20; Luk 12.11-12 10Tabsis yuavtsum muaj tuabneeg moog qha Txujmoo Zoo rua txhua tsaav tuabneeg ua ntej tsaiv, maam le muaj tej nuav. 11Thaus luas nteg mej coj moog rua huv tej tsev has plaub, mej tsi xob txhawj has tas mej yuav has le caag; thaus txug lub sijhawm ntawd, Vaajtswv yuav qha kuas mej paub has, rua qhov tej lug kws mej has tsi yog mej tej lug; tabsis yog Vaaj Ntsujplig tug Dlawbhuv tej lug. 12Tej kwvtij ib tug yuav muab ib tug coj moog rua luas tua, txiv yuav ua ib yaam le ntawd rua tej mivnyuas. Hab tej mivnyuas yuav tawmtsaam nam txiv hab coj moog rua luas tua. 13Txhua tug yuav ntxub mej, vim mej yog cov kws ntseeg kuv, tabsis tug kws ua sab ntev moog txug nub kawg, tug ntawd yuav dlim.#Mat 10.22

Yaam Kws Phem Kawg Nkaus

(Mathais 24.15-28; Lukas 21.20-24)

14“Mej yuav pum ‘Yaam kws phem kawg nkaus’ nyob huv qhov chaw kws tsi tsimnyog yaam ntawd nyob.” (Tug kws nyeem zaaj nuav, ca le totaub!) “Thaus ntawd cov tuabneeg kws nyob huv lub xeev Yudas ca le tsiv moog rua peg tej roob.#Dan 9.27; 11.31; 12.11 15Tug kws nyob nrau zoov tsi xob rov moog nqaa ib yaam dlaabtsi huv tsev.#Luk 17.31 16Tug kws nyob tom teb, tsi xob rov lug nqaa nwg lub tsho ntev. 17Lub sijhawm ntawd tej quaspuj kws suab mivnyuas hab tej quaspuj kws muaj mivnyuas mog noj mig yuav txomnyem kawg le. 18Mej yuavtsum thov Vaajtswv paab kuas mej tsi xob tau tsiv lub caij ntuj no! 19Txij thaus Vaajtswv tsim lub nplajteb lug txug naj nub nua, tsi muaj kev txomnyem heev npaum le zag nuav, hab yaav tom ntej yuav tsi muaj le zag nuav lawm.#Dan 12.1; Tsm 7.14 20Tabsis tug Tswv tub txav nub txav nyoog kuas tuab lu lawm. Yog nwg tsi ua le ntawd, yeej yuav tsi muaj leejtwg dlim le. Qhov kws Vaajtswv txav nub txav nyoog kuas tuab lu ntawd, tub yog vim nwg hlub nwg tsaav tuabneeg kws nwg tau xaiv ca lawm.

21“Thaus ntawd, yog leejtwg has rua mej has tas, ‘Mej saib, tug Mexiyas nyob ntawm nuav!’ Lossis has tas, ‘Nwg nyob tod!’ Mej tsi xob ntseeg tug ntawd tej lug. 22Rua qhov yuav muaj tej Mexiyas cuav hab tej cevlug cuav lug ua tej txujci tseemceeb ntxag Vaajtswv tsaav tuabneeg saib puas yuav ntxag tau kuas puab yuam kev. 23Mej yuavtsum ceevfaaj, rua qhov kuv tub qha tej nuav rua mej paub ua ntej lawm.

Tuabneeg Leej Tub Yuav Lug

(Mathais 24.29-31; Lukas 21.25-28)

24“Thaus tej kev txomnyem ntawd dlhau lawm, lub nub yuav tsaus, lub hli yuav tsi ci, #Yay 13.10; Yau 2.10,31; 3.15; Tsm 6.12; Tsd 13.10; Exk 32.7 25tej nubqub sau ntuj yuav poob lug, hab txhua yaam kws muaj fwjchim nyob sau nruab ntug yuav ua zug koog huv tuabsi.#Yay 34.4; Tsm 6.13; Yau 2.10 26Thaus ntawd suavdlawg yuav pum Tuabneeg leej Tub tshwm sau cov fuab lug, nwg lub fwjchim hab tug tshwjchim ci ntsaa ab.#Dan 7.13; Tsm 1.7 27Nwg yuav khaiv nwg cov timtswv moog txhua nrho plaub ceg kaum ntuj, hu cov tuabneeg kws Vaajtswv tub xaiv ca lawm, saab ntuj tim nuav moog txug saab ntuj tim u, lug nyob ua ke.

Tsob Txiv Ncuav Pas Pib Hlaav Nplooj

(Mathais 24.32-35; Lukas 21.29-33)

28“Mej saib tsob txiv ncuav pas qha le caag. Thaus nwg tej ceg rov ntsuab hab pib hlaav nplooj mog nyoos, ces mej paub has tas, tub yuav txug lub caij ntuj naag. 29Ib yaam nkaus le ntawd, thaus mej pum tej ntawd, mej yuav paub has tas, nwg tub lug ze lawm.#13.29 Lub sijhawm ntawd tub lug ze lawm; lossis nwg lug ze lawm, hab npaaj txhij lawm. 30Kuv qha tseeb rua mej has tas, thaus cov tuabneeg tam nuav tseem tuag tsi tau taag, tub xub muaj tej ntawd lawm. 31Lub ntuj hab lub nplajteb yuav pluj moog, tabsis kuv tej lug yuav tsi muaj ib lus poob le.

Tsi Muaj Leejtwg Paub Nub hab Lub Sijhawm ntawd

(Mathais 24.36-44)

32“Tabsis nub ntawd hab lub sijhawm ntawd, tsi muaj leejtwg paub. Txawm yog cov timtswv ceebtsheej lossis Tuabneeg leej Tub los yeej tsi paub; tsuas yog leej Txiv tuab leeg txhaj paub xwb.#Mat 24.36 33Mej yuavtsum ceevfaaj hab zuv tog, rua qhov mej tsi paub has tas, thaus twg yuav txug lub sijhawm ntawd. 34Lub sijhawm ntawd zoo ib yaam le ib tug txivneej kws tawm huv nwg lub tsev moog rua lwm qhov, tseg nwg cov tubkhai zuv tsev hab faib num rua puab, nyag muaj nyag ib teg num. Hab nwg has kuas tug zuv qhovrooj, zuv zoo zoo.#Luk 12.36-38 35Yog le ntawd, mej yuavtsum zuv zoo zoo, rua qhov mej tsi paub has tas thaus twg mej tug Tswv yuav rov lug. Tej zag nwg yuav lug thaus tsaus ntuj lossis thaus ib taag mo lossis thaus qab qua lossis thaus kaaj ntug. 36Nyob tsaam nwg lug taamsim, hab pum mej tseem pw tsaug zug. 37Tej lug kws kuv qha rua mej, kuv has rua suavdlawg ib yaam nkaus tas, mej yuavtsum zuv Tog!”

Currently Selected:

Malakaus 13: HNJ2000

Highlight

Copy