Malakaus 14

Cov Thawjcoj Nrhav Kev Nteg Yexus

(Mathais 26.1-5; Lukas 22.1-2; Yauhaas 11.45-53)

1Tshuav ob nub xwb txug nub ua Kevcai Hlaa Dlhau hab ua Kevcai Noj Ncuav Tsi Xyaw Keeb. Cov thawj ntawm cov povthawj hab cov xwbfwb kws qha Vaajtswv txuj Kevcai taabtom nrhav kev nteg Yexus tuabywv coj moog tua povtseg.#Tsd 12.1-27 2Puab has tas, “Peb tsi xob rawm ua le ntawd thaus suavdlawg tseem taabtom ua kevcai, nyob tsaam ua rua suavdlawg ntxhuv.”

Muab Roj Tsw Qaab Laub rua Yexus Taubhau

(Mathais 26.6-13; Yauhaas 12.1-8)

3Tom qaab ntawd Yexus su huv Ximoos tug kws thaus mob ruas ib zag lawm lub tsev tom lub zog Npethanis. Thaus Yexus taabtom noj mov, muaj ib tug quaspuj nqaa ib fwj roj tsw qaab kim heev kws muab nroj naludas ua tuaj. Nwg muab lub ncauj fwj luv, hab muab cov roj tsw qaab ntawd laub rua Yexus taubhau.#Luk 7.37-38 4Cov tuabneeg kws nyob ntawd muaj qee leej tsi txaus sab, hab has tas, “Ua le caag nwg yuav muab cov roj tsw qaab ntawd nkim povtseg? 5Yog muab coj moog muag, yuav tau ntau dlua peb puas lub nyaj,#14.5 Peb puas npib nyaj; Saib 6.37 hab muab cov nyaj ntawd moog pub rua cov tuabneeg pluag kuj zoo dlua!” Hab puab thuam tug quaspuj ntawd heev.

6Tabsis Yexus has rua puab tas, “Ca nwg ua nwg! Tsi xob ua rua nwg nyuaj sab! Qhov kws nwg ua rua kuv ntawd yog ib qhov zoo. 7Yeej yuav muaj cov tuabneeg pluag nrug mej nyob moog le, mej xaav paab puab thaus twg los yeej tau, tabsis kuv yuav tsi nrug mej nyob moog ib simneej.#2 Kev 15.11 8Tug quaspuj nuav yeej ua lawv le nwg ua tau. Nwg muab roj tsw qaab laub rua kuv lub cev, tub yog nwg tu kuv lub cev tseg rua nub kws log kuv. 9Kuv qha tseeb rua mej has tas, qhov kws tug quaspuj nuav ua yuav nrov nchaa moog rua txhua qhov huv qaab ntuj kws muaj tuabneeg moog qha Txujmoo Zoo, kuas suavdlawg ncu txug tej kws tug quaspuj nuav tau ua lawm.”

Yudas Ntxeev Sab rua Yexus

(Mathais 26.14-16; Lukas 22.3-6)

10Tom qaab ntawd Yexus kaum ob tug thwjtim tug kws hu ua Yudas Ixakali-us txawm moog cuag cov thawj ntawm cov povthawj, nwg ntxeev sab muab Yexus muag rua puab. 11Thaus puab nov Yudas has le ntawd, puab zoo sab kawg le, puab coglug has tas puab yuav muab nyaj rua Yudas. Yog le ntawd, Yudas txawm nrhav sijhawm muab Yexus rua puab.

Yexus nrug Nwg Cov Thwjtim Ua Kevcai Hlaa Dlhau

(Mathais 26.17-25; Lukas 22.7-14,21-23; Yauhaas 13.21-30)

12Thawj nub kws ua Kevcai Noj Ncuav Tsi Xyaw Keeb, nub ntawd yog nub kws suavdlawg tua mivnyuas yaaj noj ua Kevcai Hlaa dlhau. Yexus cov thwjtim nug Yexus has tas, “Koj xaav kuas peb moog npaaj pluag mov ua Kevcai Hlaa Dlhau rua koj noj qhov twg?”

13Yexus txawm khaiv nwg ob tug thwjtim moog hab qha obtug has tas, “Meb ca le moog huv lub nroog, yuav muaj ib tug txivneej kwv ib hub dlej lug ntsib meb. Meb ca le lawv nwg qaab moog 14rua huv tsev, hab meb has rua tug tswv tsev tas, ‘Xwbfwb has tas koj yuav muab chaav twg rua kuv hab kuv cov thwjtim noj pluag mov ua Kevcai Hlaa Dlhau?’ 15Tug tswv tsev ntawd yuav coj meb nce moog rua txheej sau, hab nwg yuav qha ib chaav dlaav dlaav kws tub muaj rooj muaj tog txhij lawm rua meb. Meb ca le npaaj txhua yaam ca rua qhov ntawd tog peb.”

16Ob tug thwjtim txawm moog huv lub nroog, hab pum txhua yaam lawv le Yexus qha rua obtug lawm, obtug txawm npaaj pluag mov ua Kevcai Hlaa Dlhau rua qhov ntawd.

17Thaus yuav tsaus ntuj, Yexus hab kaum ob tug thwjtim lug txug. 18Thaus puab taabtom noj mov ntawm rooj, Yexus has tas, “Kuv qha tseeb rua mej has tas, mej cov kws nrug kuv noj mov ntawm nuav, muaj ib tug yuav ntxeev sab rua kuv, nwg yog tug kws nrug kuv noj ua ke.”#Pnk 41.9

19Thaus cov thwjtim nov Yexus has le ntawd, puab nyuaj sab, puab nug Yexus zum zawg has tas, “Koj has le ko puas yog kuv?”

20Yexus teb has tas, “Mej kaum ob leeg nuav yog ib leeg ntaag, tug ntawd yog tug kws nrug kuv koom ntsw ib lub taig. 21Tuabneeg leej Tub yeej yuav tuag lawv le Vaajtswv txujlug sau has txug nwg lawm, tabsis tug kws ntxeev sab rua Tuabneeg leej Tub, nwg yuav raug kev puamtsuaj! Yog nwg tsi xob yug lug kuj yuav zoo dlua!”

Yexus Rooj Mov

(Mathais 26.26-30; Lukas 22.14-20; 1 Kauleethaus 11.23-25)

22Thaus puab tseem taabtom noj mo, Yexus muab ib lub ncuav lug tuav ntawm teg. Nwg ua Vaajtswv tsaug hab muab lub ncuav ntawd ndlais cev rua nwg cov thwjtim hab has tas, “Lub ncuav nuav yog kuv lub cev, mej ca le txais moog noj.”

23Tom qaab ntawd, Yexus muab ib khob cawv txiv maab lug hab ua Vaajtswv tsaug, nwg muab khov cawv ntawd cev rua puab, hab puab txhua tug txais haus. 24Yexus has rua puab tas, “Cov cawv txiv maab nuav yog kuv cov ntshaav kws ndlwg lug ntxuav ntau leej lub txim. Kuv cov ntshaav yog ua lub homthawj kws nas rua Vaajtswv txujlug cog tseg.#Tsd 24.8; Yel 31.31-34 25Kuv qha rua mej has tas, kuv yuav tsi haus cov cawv txiv maab nuav moog txug nub kws kuv haus cov cawv txiv maab tshab huv Vaajtswv lub tebchaws.”

26Thaus puab hu ib zaaj nkauj taag, puab txawm tawm moog rua peg Roob Txiv Ntoo Roj lawm.

Petus Yuav tsi Leeg Paub Yexus

(Mathais 26.31-35; Lukas 22.31-34; Yauhaas 13.36-38)

27Yexus has rua puab tas, “Mej txhua tug yuav tsiv huv tuabsi tso kuv tseg, rua qhov Vaajtswv txujlug sau tseg lawm has tas, ‘Vaajtswv yuav tua tug tswv yug yaaj, hab paab yaaj yuav tawg nyag tsiv nyag moog taag huv tuabsi.’ #Xak 13.7 28Tabsis thaus kuv sawv huv qhov tuag rov qaab lug lawm, kuv yuav ua mej ntej moog rua peg Kalilais.”#Mat 28.16

29Petus teb Yexus has tas, “Txawm yog suavdlawg tso koj tseg taag lawm los kuv yuav tsi tso koj tseg!”

30Yexus has rua Petus has tas, “Kuv qha rua koj has tas, ‘Mo nuav thaus qab tsi tau qua ob tsig, koj yuav has peb zag has tas, koj tsi paub kuv.’ ”

31Petus teb tawv qhawv has tas, “Txawm yog kuv yuav nrug koj tuag los kuv yuav tsi has tas, kuv tsi paub koj ib zag le!”

Hab taagnrho cov thwjtim puavleej has ib yaam nkaus.

Yexus Thov Vaajtswv huv Lub Vaaj Khexemanes

(Mathais 26.36-46; Lukas 22.39-46)

32Yexus nrug nwg cov thwjtim moog rua ntawm qhov chaw kws hu ua Khexemanes. Nwg has rua cov thwjtim has tas, “Mej nyob ntawm nuav kuv yuav moog thov Vaajtswv tod.” 33Yexus txawm coj Petus, Yakaunpaus, hab Yauhaas nrug nwg moog. Yexus nyuaj sab hab ntxhuv sab kawg le. 34Nwg has rua puab tas, “Kuv nyuaj sab kawg le, tub yuav tuag, mej ca le nrug kuv nyob ntawm nuav tsi xob tsaug zug.”

35Yexus moog tom ntej mivntsiv, ces nwg txawm txhus caug ndlua rua huv aav thov Vaajtswv has tas, yog tau, thov kuas nwg tsi xob raug txujkev txomnyem nuav. 36Nwg thov ntxiv has tas, “Kuv Txiv, kuv Txiv! Koj ua tau ib puas tsaav yaam huv tuabsi, thov koj muab lub khob nuav tshem ntawm kuv moog. Txawm le caag los thov koj tsi xob ua lawv le kuv lub sab nyam, tabsis ua lawv le koj lub sab nyam xwb.”

37Thaus Yexus rov qaab lug rua ntawm nwg peb tug thwjtim, nwg pum puab tsaug zug taag lawm. Nwg has rua Petus has tas, “Ximoos, koj tsaug zug lawm los? Koj tub yoo tsi taug dlaab ndlub nrug kuv nyob ib txoog teev le los?” 38Hab Yexus has rua puab tas, “Mej yuavtsum ceevfaaj hab thov Vaajtswv paab, kev sim sab txhaj yuav ntxag tsi tau mej. Lub sab mas kub quas lug, tabsis lub cev qaug zug heev.”

39Yexus rov qaab moog thov Vaajtswv dlua ib zag, hab has ib yaam le qub. 40Thaus nwg rov qaab lug, nwg pum cov thwjtim tsaug zug taag lawm; puab rua tsi taug qhovmuag le, hab puab tsi paub yuav has le caag rua nwg.

41Thaus nwg rov qaab lug zag peb, nwg has rua puab tas, “Mej tseem yuav tsaug zug hab su kuas txaus tsaiv los? Tsaug zug le ko xwb txaus lawm! Tub txug lub sijhawm lawm! Mej saib, Tuabneeg leej Tub yuav raug luas nteg coj moog rua cov tuabneeg txhum txhais teg. 42Mej ca le sawv peb moog. Mej saib, tug tuabneeg kws ntxeev sab rua kuv tub tuaj txug lawm!”

Nteg Yexus

(Mathais 26.47-56; Lukas 22.47-53; Yauhaas 18.3-12)

43Thaus Yexus tseem taabtom has le ntawd, ces Yudas kws yog ib tug ntawm kaum ob tug thwjtim txawm tuaj txug. Muaj ib paab tuabneeg coob coob nqaa ntaaj nqaa qws nrug nwg tuaj. Paab ntawd yog cov thawj ntawm cov povthawj, cov xwbfwb kws qha Vaajtswv txuj Kevcai hab cov txwjlaug tso tuaj. 44Tug kws ntxeev sab rua Yexus tub xub qha rua cov tuabneeg ntawd lawm has tas, “Kuv nwj tug twg, ces yog tug ntawd ntaag. Mej ca le nteg nwg hab coj nwg moog, mej saib zoo zoo tsi xob pub nwg tsiv.”

45Thaus Yudas tuaj txug, nwg ncaaj nraim moog rua ntawm Yexus hab has tas, “Xwbfwb!” ces nwg txawm nwj kag Yexus. 46Cov tuabneeg kws nrug Yudas tuaj txawm sau nthwv lug nteg Yexus hab tuav Yexus ruaj ruaj. 47Ces cov tuabneeg kws sawv ze ntawd, muaj ib tug rhu hlo nwg raab ntaaj lug tuab ntaag rua tug Povthawj Hlub ib tug tubqhe saab nploojntseg xis tu nrho. 48Yexus has rua puab tas, “Mej nqaa ntaaj nqaa qws tuaj nteg kuv ib yaam le kuv yog tubsaab los? 49Kuv naj nub qha mej huv lub Tuamtsev, ua le caag mej tsua tsi nteg kuv? Tabsis yeej yuav muaj le nuav, txhaj tav lawv le Vaajtswv txujlug.”#Luk 19.47; 21.37

50Cov thwjtim txawm tsiv taag lawm tso Yexus tseg.

51Muaj ib tug tub hluas lawv Yexus qaab, nwg tsi naav rig tsho, nwg npua ib dlaim ntaub maag xwb. Cov tuabneeg ntawd yuav nteg nwg hab, 52tabsis nwg muab dlaim ntaub ntawd hle hlo tseg hab tsiv labqaab ploog lawm.

Cov Numtswv Taug Yexus Zaaj

(Mathais 26.57-68; Lukas 22.54-55,63-71; Yauhaas 18.13-14,19-24)

53Tom qaab ntawd, puab coj Yexus moog rua tom tug Povthawj Hlub lub tsev, cov thawj ntawm cov povthawj, hab cov xwbfwb kws qha Vaajtswv txuj Kevcai tub tuaj ua ke saablaaj qhov ntawd lawm. 54Petus lawv Yexus qaab nrug dleb dleb, nwg moog txug ntawm lub tshaav puam ntawm tug Povthawj Hlub lub tsev. Nwg moog nrug cov tuabneeg kws zuv tug Povthawj Hlub lub tsev nte tawg. 55Cov thawj ntawm cov povthawj nrhav lug nkaug Yexus, kuas puab tau cai muab Yexus tua povtseg, tabsis puab nrhav tsi tau.

56Muaj ntau leej tuaj ua timkhawv dlaag has tas, Yexus ua txhum, tabsis tej lug kws puab has tsi sis thooj.

57Muaj qee leej sawv ua timkhawv nkaug Yexus has tas, 58“Peb nov nwg has tas, ‘Kuv yuav muab lub Tuamtsev kws yog tuabneeg txhais teg ua nuav lauj povtseg. Hab tom qaab ntawd peb nub, kuv yuav ua tau ib lub tshab kws tsi yog tuabneeg txhais teg ua.’ ”#Yhs 2.19 59Txawm yog puab has ib zaaj xwb los puab tej lug tsi sis thooj.

60Tug Povthawj Hlub txawm sawv tseeg nug Yexus has tas, “Puab nkaug koj le ntawd, koj tsi muaj lug teb puab le los?”

61Tabsis Yexus ua tuabywv tsi teb ib lus le. Tug Povthawj Hlub rov nug Yexus has tas, “Koj puas yog tug Mexiyas kws yog Vaajtswv tug kws Dlawbhuv tug Tub?” 62Yexus teb has tas, “Kuv yog! Hab mej yuav pum Tuabneeg leej Tub nyob ntawm Vaajtswv tug kws muaj Fwjchim Luj kawg nkaus saab xis, hab nrug fuab nrug cua lug sau ntuj lug!”#Ten 7.13

63Thaus tug Povthawj Hlub nov le ntawd, nwg txawm dlua rhe nwg lub tsho hab has tas, “Tsi taag peb yuav moog nrhav timkhawv ntxiv lawm! 64Mej tub nov nwg tej lug thuam ntawd lawm. Mej yuav has le caag?”#Lek 24.16

Puab suavdlawg teb has tas, “Nwg ua txhum lawm, tsimnyog muab nwg tua povtseg.”

65Cov tuabneeg ntawd muaj qee leej ntu quavncaug rua Yexus, puab muab phuam paav Yexus qhovmuag hab ntaus Yexus. Puab has rua Yexus has tas, “Koj sim twv saib yog leejtwg ntaus koj?”

Cov tubrog coj Yexus moog hab xuas tawg ncuav rua Yexus.

Petus tsi Leeg Paub Yexus

(Mathais 26.69-75; Lukas 22.56-62; Yauhaas 18.15-18,25-27)

66Petus tseem nyob ntawm tshaav puam, tug Povthawj Hlub ib tug ntxhais qhev tuaj 67pum Petus nyob quastsawg nte tawg, nwg saib ntsoov Petus hab has tas, “Koj yog tug kws ibtxwm nrug Yexus tug kws yog tuabneeg Naxales hab los sav.”

68Tabsis Petus tsi leeg le. Petus teb has tas, “Koj has le ko, sov yog koj has leejtwg, kuv tsi paub le…” Petus tawm moog txug ntawm roojvaag. Taamsim ntawm qab txawm qua.#14.68 Tej phoo qub tsi muaj cov lug has tas, qab txawm qua.

69Thaus tug ntxhais qhev pum Petus nyob ntawd, nwg txawm has rua cov tuabneeg kws sawv ntawd tas, “Tug nuav yog Yexus puab paab ib tug tag!” 70Tabsis Petus tsi leeg dlua ib zag.

Tom qaab ntawd mivntsiv, cov tuabneeg kws sawv ntawd has rua Petus has tas, “Koj tsi xob has tas, koj tsi yog puab paab ntawd ib tug, rua qhov peb tub paub has tas, koj yog tuabneeg Kalilais.”

71Petus txawm twv has tas, “Yog kuv dlaag, thov Vaajtswv rau txim rua kuv. Kuv tsi paub tug txivneej kws mej has ntawd le.”

72Taamsim ntawd qab txawm qua zag ob. Petus ncu dlheev txug tej lug kws Yexus has rua Petus has tas, “Thaus qab tsi tau qua ob tsig, koj yuav has peb zag has tas, koj tsi paub kuv.” Petus quaj tu sab kawg le.

Currently Selected:

Malakaus 14: HNJ2000

Highlight

Copy