Malakaus 12

Cov Tuabneeg Kws Tu Lub Vaaj Txiv Maab

(Mathais 21.33-46; Lukas 20.9-19)

1Yexus ua lug pevtxwv qha rua puab has tas: “Muaj ib tug txivneej xov tau ib lub vaaj hab cog txiv maab rua huv, nwg khawb ib lub qhov tsuam txiv maab hab ua lub chaw tsomfaaj zuv. Nwg muab tso rua ib cov tuabneeg tu sis faib cov txiv, ces nwg txawm moog rua lwm tebchaws lawm.#Yay 5.1-2 2Thaus txug lub caij dle txiv maab, nwg txawm khaiv nwg ib tug tubkhai moog sau tej txiv kws yog nwg tug lug rua nwg. 3Cov tuabneeg kws tu lub vaaj nteg tug tubkhai ntawd, muab nwg ntaus, hab ntab rov qaab moog teg dlawb teg nplag. 4Tug tswv vaaj rov khaiv dlua ib tug tubkhai moog cuag cov tuabneeg kws tu lub vaaj. Cov tuabneeg kws tu lub vaaj muab tug tubkhai ntawd ntaus taubhau to, hab ua ob peb yaam phem rua nwg. 5Tug tswv vaaj rov khaiv dlua ib tug tubkhai moog. Cov tuabneeg kws tu lub vaaj muab tug tubkhai ntawd tua povtseg; tom qaab ntawd tug tswv vaaj khaiv dlua ntau leej moog los puab ua ib yaam le ua rua cov kws xub moog. Puab muab qee leej ntaus hab muab qee leej tua povtseg. 6Tshuav tug tswv vaaj tug tub xwb txhaj tsi tau moog. Thaus kawg tug tswv vaaj txhaj khaiv nwg tuab leeg tub kws nwg hlub heev moog cuag cov tuabneeg kws tu lub vaaj. Nwg xaav has tas, ‘Puab yuav fwm kuv tug tub.’ 7Tabsis puab sis ntxhi has tas, ‘Tug nuav yog tug tswv vaaj tug tub. Peb ca le muab nwg tua povtseg, peb txhaj tau lub vaaj!’ 8Puab txawm nteg kag tug tub ntawd, muab nwg tua hab muab nwg pov rua saab ntug vaaj nrau.”

9Yexus nug has tas, “Yog le ntawd, tug tswv vaaj yuav ua le caag rua cov tuabneeg kws tu lub vaaj? Nwg yeej yuav moog muab cov tuabneeg ntawd tua povtseg huv tuabsi, hab muab nwg lub vaaj tso rua lwm cov tu. 10Mej tub nyeem Vaajtswv txujlug kws has tas:

‘Lub pobzeb kws cov kws ua tsev

muab povtseg,

lub ntawd tub lug ua lub

thawj lawm.

11Qhov nuav yog tug Tswv ua,

peb xaav tsi thoob le!’ ”#Pnk 118.22-23

12Cov Yudas cov thawjcoj nrhav kev nteg Yexus, rua qhov puab paub has tas, Yexus qha zaaj lug pevtxwv ntawd tawmtsaam puab. Tabsis puab ntshai cov tuabneeg coob coob ntawd, puab txawm ca le tsiv lawm.

Them Se rua Xixas Puas Txhum

(Mathais 22.15-22; Lukas 20.20-26)

13Puab khaiv cov Falixais qee leej hab Helauj cov tuabneeg qee leej moog cuag Yexus hab nug nwg ob peb yaam saib nwg puas yuav has txhum. 14Puab tuaj cuag Yexus hab nug has tas, “Xwbfwb, peb paub has tas, koj yog tug ncaaj nceeg, koj tsi xaiv leejtwg ntsejmuag. Koj tsi ua lawv le tuabneeg lub sab, tabsis koj qha Vaajtswv txujkev tseeb rua tuabneeg. Koj qha rua peb saib, yog peb them se rua Xixas, puas txhum peb txuj kevcai los tsi txhum?”

15Tabsis Yexus tub paub lawm has tas, yog puab tuaj sim nwg xwb, nwg txhaj teb puab has tas, “Mej tuaj sim kuv ua dlaabtsi? Mej ca le muab ib lub nyaj lug rua kuv saib.”

16Puab muab ib lub nyaj lug rua Yexus. Yexus nug puab has tas, “Lub ntsejmuag hab lub npe ntawm lub nyaj nuav yog leejtwg lub?”

Puab teb has tas, “Yog Xixas lub.” 17Yexus has tas, “Yog le ntawd, yaam kws yog Xixas le, mej ca le muab rua Xixas, hab yaam kws yog Vaajtswv le, mej ca le muab rua Vaajtswv.”

Thaus puab nov Yexus has le ntawd, puab xaav tsi thoob le.

Nug Txug Cov Tuabneeg Kws Tuag Sawv Rov Qaab Lug

(Mathais 22.23-33; Lukas 20.27-40)

18Cov Xadukais qee leej kws tsi ntseeg has tas, tuabneeg yuav sawv huv qhov tuag rov qaab lug, qee leej tuaj ntsib Yexus hab nug has tas, #Ten 23.8 19“Xwbfwb, Mauxes sau ib txuj kevcai qha rua peb has tas, ‘Yog tug quasyawg tuag thaus nwg tug quaspuj tseem tsi tau muaj mivnyuas, nwg tug kwv yuavtsum yuav tug namtij, tug tijlaug txhaj muaj xeebntxwv.’ #2 Kev 25.5 20Thaus muaj xyaa leej kwvtij; tug tijlaug yuav quaspuj tabsis tseem tsi tau muaj mivnyuas, nwg txawm tuag lawm. 21Tug kwv yuav tug namtij ntawd, tsi tau muaj mivnyuas, tug kwv txawm tuag lawm, tug kwv ob tsua yuav tug namtij, tabsis nwg kuj tuag lawm hab, 22Taagnrho xyaa leej kwvtij kws yuav tug quaspuj ntawd puavleej tuag huv tuabsi tsi tau muaj mivnyuas. Thaus kawg tug quaspuj ntawd kuj tuag lawm hab. 23Yog le ntawd, thaus txug nub kws cov tuabneeg tuag sawv rov qaab lug, tug quaspuj ntawd yuav yog leejtwg tug quaspuj? Rua qhov puab xyaa leej kwvtij puavleej tau yuav nwg lawm.”

24Yexus teb has tas, “Mej xaav yuam kev lawm, rua qhov mej tsi totaub Vaajtswv txujlug hab tsi paub Vaajtswv lub fwjchim. 25Thaus cov tuabneeg kws tuag lawm sawv rov qaab lug, puab yuav zoo ib yaam le cov timtswv kws nyob sau ntuj ceebtsheej, puab tsi yuav quaspuj tsi yuav quasyawg lawm. 26Has txug qhov kws cov tuabneeg tuag sawv rov qaab lug, mej puas tau nyeem Mauxes phoo ntawv kws has txug cov nplaim tawg kws cig ntawm tsob ntoo? Vaajtswv has rua Mauxes has tas, ‘Kuv yog Anplahaas tug Vaajtswv, Ixaj tug Vaajtswv, hab Yakhauj tug Vaajtswv,’ #Tsd 3.6 27Vaajtswv tsi yog cov tuabneeg tuag tug Vaajtswv, tabsis nwg yog cov tuabneeg caj tug Vaajtswv. Mej xaav yuam kev lawm!”

Nqai Kevcai Kws Tseemceeb Dlua Ndlais

(Mathais 22.34-40; Lukas 10.25-28)

28Muaj ib tug xwbfwb kws qha Vaajtswv txuj Kevcai nyob ntawd nov puab sis thaam. Nwg pum Yexus ua tuab zoo teb cov Xadukais, nwg txawm lug nug Yexus has tas, “Vaajtswv txuj kevcai, nqai twg yog nqai kws tseemceeb dlua ndlais huv tuabsi?”#Luk 10.25-28

29Yexus teb has tas, “Nqai nuav yog nqai kws tseemceeb dlua ndlais; ‘Cov tuabneeg Yixalayees, mej ua tuab zoo noog! Tug Tswv kws yog peb tug Vaajtswv, nwg tuab leeg xwb txhaj yog tug Tswv.#12.29 Tug Tswv kws yog peb tug Vaajtswv, nwg tuab leeg xwb txhaj yog tug Tswv; lossis Tug Tswv yog peb tug Vaajtswv, muaj tuab tug Tswv xwb.#2 Kev 6.4-5 30Mej yuavtsum hlub tug Tswv kws yog mej tug Vaajtswv kawg sab kawg ntsws, kawg plaab kawg plawv, hab kawg mej tug dlaag tug zug.’ 31Nqai ob kws tseemceeb has le nuav tas, ‘hlub mej tej kwvtij zej zog ib yaam le mej hlub mej lub cev.’ Tsi muaj dlua lwm nqai kws tseemceeb tshaaj ob nqai nuav lawm.”#Lek 19.18

32Tug xwbfwb kws qha Vaajtswv txuj kevcai teb Yexus has tas, “Yog lawm, Xwbfwb! Yeej muaj tseeb le koj has tag, tsuas muaj tuab tug Tswv kws yog Vaajtswv xwb, tsi muaj dlua lwm tug Vaajtswv lawm.#2 Kev 4.35 33Yog le ntawd, yuavtsum hlub Vaajtswv kawg sab kawg ntsws, kawg plaab kawg plawv, hab kawg tug dlaag tug zug, hab hlub kwvtij zej zog ib yaam le yug hlub yug lub cev. Yog ua lawv le ob nqai nuav kuj tseemceeb dlua le yug muab tej tsaj tua theej txhoj, hab muab khoom hlawv fij rua Vaajtswv.”#Hau 6.6

34Yexus pum has tas nwg muaj tswvyim teb, ces Yexus txawm has rua nwg tas, “Koj nyob tsi dleb Vaajtswv lub Tebchaws lawm.”

Tom qaab ntawd tsi muaj leejtwg kaam nug Yexus le lawm.#Luk 10.25-28

Tug Mexiyas Yog Leejtwg Tub

(Mathais 22.41-46; Lukas 20.41-44)

35Thaus Yexus taabtom qha huv lub Tuamtsev, nwg nug has tas, “Ua le caag cov xwbfwb kws qha Vaajtswv txuj Kevcai has tas, tug Mexiyas yog Daviv tug Tub? 36Vaaj Ntsujplig Tshoov Daviv sab, Daviv txhaj has tas:

‘Tug Tswv has rua kuv

tug Tswv has tas,

Koj ca le lug nyob ntawm kuv

saab xis moog txug thaus

kuv muab koj cov yeebncuab

lug rua koj tsuj.’ #Pnk 110.1

37Daviv tub hu nwg has tas ‘Tug Tswv’; yuav ua le caag has tau has tas, tug Mexiyas yog Daviv tug Tub?”

Yexus Qha Kuas tsi Xob Ua Le Cov Xwbfwb Kws Qha Kevcai

(Mathais 23.1-36; Lukas 20.45-47)

Cov tuabneeg coob coob kws taabtom noog Yexus qha ntawd, puab zoo sab kawg le. 38Yexus qha puab has tas, “Mej yuavtsum ceevfaaj cov xwbfwb kws qha Vaajtswv txuj Kevcai, puab nyam naav tej tsho ntev ncig moog ncig lug tom kab kuas suavdlawg fwm puab, 39hab puab xaiv tej chaw kws zoo huv tej tsev saablaaj lossis huv tej rooj noj rooj haus nyob xwb. 40Puab txhaav tej puj ntsuag tej vaaj tse yuav, hab thov Vaajtswv ntev ntev kuas suavdlawg qhuas puab. Puab yeej yuav raug txim nyaav dlua lwm tug huv tuabsi!”

Tug Puj Ntsuag Tso Nyaj

(Lukas 21.1-4)

41Yexus nyob ze lub phijxaab kws suavdlawg coj nyaj tuaj tso huv lub Tuamtsev, Yexus saib cov tuabneeg kws tuaj tso nyaj. Muaj cov tuabneeg npluanuj ntau leej tso nyaj ntau ntau rua huv lub phijxaab; 42hab muaj ib tug puj ntsuag pluag pluag muab ob lub txaj toog tuaj tso rua huv. 43Yexus hu nwg cov thwjtim lug cuag nwg hab has rua puab tas, “Kuv qha tseeb rua mej has tas, tug puj ntsuag kws pluag pluag ntawd tso nyaj ntau dlua lwm tug. 44Rua qhov lwm tug muab puab tej nyaj kws seem coj tuaj tso xwb; tabsis tug puj ntsuag kws pluag pluag nuav muab hlo ob lub txaj toog kws nwg muaj tuaj tso huv tuabsi.”

Currently Selected:

Malakaus 12: HNJ2000

Highlight

Copy